Taro na Dauwiliwili
Na cava na ibalebale ni lotu “vakayalo” vei Jiova?
Ni vunau tiko vua na marama ni Samaria e mai taki wai ena ikeliwai nei Jekope volekati Saika, a kaya o Jisu Karisito: “A Yalo na Kalou: ia ko ira sa lotu vua, e dodonu me ra lotu vakayalo ka vakaidina.” (Joni 4:24) Na lotu dina e dodonu me muria na ‘ka dina’ e vakaraitaka na Kalou o Jiova me baleti koya kei na nona inaki ena iVolatabu. E dodonu meda qarava na Kalou ena yaloqaqa kei na lomakatakata ni uqeti keda na noda loloma kei na vakabauta. (Taito 2:14) Ia, ni raici kece na vosa i Jisu ena gauna e tukuna kina na ‘lotu vakayalo vua na Kalou’ e laurai ni sega ni tukuna wale tiko ga na yalo ni qaravi Kalou.
Rau sega ni veivosakitaka o Jisu kei na marama ena ikeliwai na noda lomakatakata se sega ena noda lotu se sokalou. E rawa ni lomakatakatataki tale ga na sokalou lasu. Ia, ni tukuna oti o Jisu ni na sega ni qaravi o Tamana ena dua na ulunivanua e Samaria se ena valenisoro e Jerusalemi—ni rau vanua vakayago—e qai vakaraitaka o Jisu na ivalavala vou ni sokalou e veiraurau kei na kena ituvaki na Kalou. (Joni 4:21) E kaya: “E kabula vakayalo na Kalou.” (Joni 4:24, Charles B. Williams) E sega ni vakavatukana na Kalou dina, e sega ni laurai se rawa ni tarai. E sega gona ni vinakati na valenisoro se ulunivanua ena nona qaravi. Oya na vuna e tukuna kina o Jisu na lotu se sokalou e vakayalo.
E sega wale ga ni vinakati me vakaidina na sokalou, na sokalou e vakadonui ena dusimaki tale ga ena yalo tabu, na igu tawarairai ni Kalou. E “dikeva na ka kecega na Yalo Tabu,” e vola na yapositolo o Paula, okati kina “na veika titobu ni Kalou.” E kuria: “Eda sa sega ni rawata na yalo ni vuravura, na Yalo ga sa mai vua na Kalou; me da kila kina na veika sa solia walega mai vei keda na Kalou.” (1 Korinica 2:8-12) E rawa ga ni vakadonui noda qarava na Kalou ke dusimaki keda na yalo tabu. E bibi tale ga meda vakamua na yaloda, se vakasama ina veidusimaki ni yalo tabu ni Kalou nida vulica na nona Vosa da qai bulataka.
[iYaloyalo ena tabana e 28]
Qarava na Kalou “vakayalo ka vakaidina”