Taro na Dauwiliwili

E vei beka a veiyalayalati kina kei Eparama o Jiova, mai Uri se mai Karana?

Na itukutuku makawa duadua ni nona veiyalayalati kei Eparama o Jiova e kune ena Vakatekivu 12:1-3, eda wilika kina: “Sa kaya oti vei Eparama ko Jiova, Mo lako tani e na nomu vanua, ka biuti ira na wekamu, kei na vale nei tamamu, ka lako ki na vanua ka’u na vakatakila vei iko: ia ka’u na vakayacori iko mo matanitu levu, . . . ena kalougata talega e na vukumu na veimataqali kecega e vuravura.”a Kena irairai ni o Jiova e veiyalayalati kei Eparama mai Uri, oti oya qai tokaruataka ni sa lai vakaitikotiko mai Karana o Eparama.

Ena imatai ni senitiuri, a dusia lesu kina o Sitiveni na ivakaro i Jiova vei Eparama me toki i Kenani. A kaya oqo o Sitiveni vei ira na lewe ni Sanadrini: “A Kalou vakaiukuuku sa rairai eliu vua na noda qase ko Eparaama, ni sa tiko mai Mesopotemia, sa tiko emuri mai Karana, a sa kaya vua, Lako tani e na nomu vanua, ka maivei ira na wekamu, ka lako ki na vanua ka’u na vakatakila vei iko.” (Cakacaka 7:2, 3) A lewenivanua taumada kei Uri o Eparama, qai vakaraitaka e ke o Sitiveni ni a rogoca mai kea ena imatai ni gauna na ivakaro me lako i Kenani. (Vakatekivu 15:7; Niemaia 9:7) A sega ni cavuta o Sitiveni na veiyalayalati ni Kalou kei Eparama, ia ena Vakatekivu 12:1-3, erau semati vata kina na veiyalayalati oya kei na ivakaro me baleta na toki i Kenani. Sa kilikili ga meda vakabauta ni a veiyalayalati kei Eparama mai Uri o Jiova.

Ia nida dikeva vakavinaka na kena itukutuku ena Vakatekivu, eda raica ni o Jiova a tokaruataka vei Eparama mai Karana na nona veiyalayalati, me vaka ga nona cavuta vakavica qai vakamatailalaitaka e so na tikina mai Kenani. (Vakatekivu 15:5; 17:1-5; 18:18; 22:16-18) E vakamacalataki ena Vakatekivu 11:31, 32 ni a biuti Uri me gole i Kenani na tama i Eparama o Tira, ratou tomani koya o Eparama, Sera, kei Loti. Ratou vakaitikotiko i Karana me yacova ni sa mate o Tira. Na dede ni nona tiko e Karana o Eparama e lai levu sara kina na nona iyau. (Vakatekivu 12:5) Yaco na gauna me toki tale ga yani i kea o Neori, na taci Eparama.

E volai ena iVolatabu na mate i Tira, oti oya, sa qai volai na vosa i Jiova vei Eparama kei na ka e qai yaco: “A sa lako tani ko Eparama, me vaka ka vosa vua ko Jiova.” (Vakatekivu 12:4) Nida wilika gona na Vakatekivu 11:31–12:4, e vaka me dusia vei keda ni vosa e tauca o Jiova ena Vakatekivu 12:1-3 a qai tau tiko ni sa mate oti o Tira. Ke dina oya, e vakaraitaka ni a biuti Karana o Eparama qai toki ina vanua e dusimaki koya kina o Jiova baleta na ivakaro e se qai rogoca ga e kea, bau kina na ivakaro a rogoca ena vica vata na yabaki yani e liu mai Uri.

A vakaroti Eparama o Jiova ena Vakatekivu 12:1: “Mo lako tani e na nomu vanua, ka biuti ira na wekamu, kei na vale nei tamamu.” Dua na gauna, a “vanua” tu i Eparama o Uri, a tu tale ga e kea na “vale” nei tamana. Ia a tokitaki iratou na nona lewenivale i Karana na tama i Eparama, mai wiliki koya sara kina o Eparama me sa kai vanua oya. Ni oti e vica na yabaki mai Kenani, sa qai tala e dua na nona dauveiqaravi me gole ‘ina nona vanua vei ira na wekana’ me lai qara mai kina e dua na wati Aisake. A gole na dauveiqaravi oya ina “koro i Neori” (de o Karana se dua tale na koro volekata). (Vakatekivu 24:4, 10) A kunei Repeka sara na dauveiqaravi vei ira na weka i Eparama, oqo na vuvale levu i Neori.​—Vakatekivu 22:20-24; 24:15, 24, 29; 27:42, 43.

A cavuti Eparama o Sitiveni ena nona vosa vei ira na lewe ni Sanadrini: “Ni sa mate ko tamana sa tuberi koya tani maikina na Kalou, ka sa vakatikora e na vanua oqo, dou sa qai tiko kina.” (Cakacaka 7:⁠4) E vakaraitaka oqo ni o Jiova a veitaratara kei Eparama mai Karana. Ena donu vinaka gona ke da vakabauta ni a baci tukuna tale o Jiova ena gauna oya vei Eparama na nona veiyalayalati me vaka e volai ena Vakatekivu 12:1-3, baleta ni a qai tekivu me yaco na veiyalayalati ni sa toki i Kenani o Eparama. O koya gona, nida vakasamataka na veitikina kece eda sa raica oti mai, na vakasama ga eda na taura rawa mai kina oya ni a cavuta taumada o Jiova na nona veiyalayalati kei Eparama mai Uri, oti sa qai tokaruataka vua mai Karana.

[iVakamacala e ra]