Eparama ​—Na iTokani ni Kalou

OTI na Waluvu, era a lai tiko na tamata ena dua na vanua e vakatokai me o Uri. Ni toso na gauna sa rogo na koro o Uri, ni levu na kena vale rairai vinaka. Ia era sokaloutaka na kalou lasu na lewenivanua, me vakataki ira ga na lewe i Pepeli. Era sega ni vakataki Noa kei na luvena o Semi ni rau qaravi Jiova tiko ga.

Lakolako, sa qai mate na tamata yalodina o Noa ni oti tale e 350 na yabaki mai na waluvu. Oti tale e rua na yabaki, sa qai mai sucu na tamata o raica toka oqori. E tamata talei vua na Kalou. Na yacana o Eparama. E tiko vata kei na nona vuvale ena korolevu o Uri.

Dua na siga a kaya vei Eparama o Jiova: ‘Biuti Uri kei ira na wekamu, lako ina vanua au na vakaraitaka vei iko.’ A talairawarawa beka o Eparama, me biuta nona vale kei na iyau mai Uri? Io, a cakava vaka kina. Na nona dau talairawarawa gona, e vakatokai kina me itokani ni Kalou.

Eratou tomani Eparama ena nona ilakolako e so na lewe ni nona vuvale. Oqori na watina o Sera, na tamana o Tira, kei na vugona o Loti. Ni toso na nodratou ilakolako balavu, ratou yaco yani i Karana, a mate e kea o Tira. Eratou sa yawa sara mai Uri.

Vakalailai ga ratou sa biuti Karana, ratou lako sara i Kenani. E tukuna e kea vei Eparama o Jiova: ‘Oqo na vanua mera na taukena na nomu kawa.’ A tiko kina o Eparama ena vica vata na yabaki qai vakavale ena vale laca.

A vukei Eparama na Kalou ni vakalevutaka na nona qelenisipi kei na manumanu tale e so qai drau vakadrau na nona dauveiqaravi. Ia erau se sega ga ni vakaluveni kei na watina o Sera.

Ni sa yabaki 99 o Eparama a kaya vua o Jiova: ‘Au sa yalataka ni o na tamadra na matanitu e vuqa.’ Ia me tamadra vakacava na veimatanitu ni sega tu ni rau vakaluveni kei Sera? Rau sa rui qase tale ga me rau vakaluveni.