E Rawa Nida Vakabulai?
Na ika20 ni senitiuri e vakatokai me dua vei ira na senitiuri e levu duadua kina na vakadavedra. E takalevu ena vicasagavulu na yabaki sa oti na basulawa, ivalu, veicati vakamatatamata, vakayagataki ni wainimate gaga, lasu, kei na itovo kaukaua. Kuria oqo na rarawa kei na momosi e vu mai na tauvimate, qase, kei na mate. O cei e sega ni via galala mai na levu ni leqa sa bika tu na vuravura nikua? Nida vakanamata ena gauna sa tu oqo e liu, e rawa nida vakabulai?
DIKEVA mada na raivotu a soli vua na yapositolo o Joni rauta na 2,000 na yabaki sa oti. E vola: “Raica, a vale ni Kalou sa tu vei ira na tamata, ia ena tiko vata kei ira ko koya, ia era na nona tamata, ia ko koya na Kalou ena tiko vata kei ira, me nodra Kalou. Ia na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa.” (Vakatakila 21:3, 4) E vaka tale ga oqo na ka e kaya na parofita o Aisea: “Ena vakaotia sara na mate ko koya; ia na Turaga ko Jiova ena tavoya na wai ni mata mai na matadra na tamata kecega; kei na nodra vakalialiai na nona tamata ena kauta tani ko koya mai na dela i vuravura taucoko: ni sa tukuna ko Jiova.”—Aisea 25:8.
Raivakatayaloyalotaka mada na ka ena yaco ni sa vakayacori na vosa ni yalayala ni Kalou! Ena vueti qai galala na kawatamata mai na veivakasaurarataki kei na itovo kaukaua, mai na rarawa kei na leqa. Me cava tale, sa na sega ni vakaleqai keda na tauvimate, qase, kei na mate! Na Vosa ni Kalou na iVolatabu e yalataka na bula tawamudu ena vuravura. (Luke 23:43; Joni 17:3) E dulaki tu vei ira kece era gadreva. “[Na Kalou e] vinakata me bula na tamata kecega, ka mai kila sara nai vakavuvuli dina.”—1 Timoci 2:3, 4.
Me yaga vei keda na vosa ni yalayala ni Kalou, meda vakabauti Jisu Karisito da qai kila nona itavi meda vakabulai kina. E kaya o Jisu: “Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawa mudu.” (Joni 3:16) Ni dusia na yapositolo o Pita na itavi bibi i Jisu Karisito ena tikina oqo, e kaya kina: “Sa sega na bula e na vukuna e dua tani: ni sa sega sara e dua tale na yaca e ruku i lomalagi sa soli kivei ira na tamata, me da bula rawa kina.” (Cakacaka 4:12) Erau vakauqeta e dua e tarogi rau ena yalodina na yapositolo o Paula kei na nona itokani o Sailasa: “Vakabauta na Turaga ko Jisu Karisito, ko na bula kina, kei ira talega na nomu lewe-ni-vale.”—Cakacaka 16:30, 31.
Io, e rawa duadua ga na bula ena vuku i Jisu Karisito na “Vu-ni-bula.” (Cakacaka 3:15) Ia e rawa vakacava me mai vu ni noda bula e le dua ga? Nida kila nona itavi ena tikina oqo ena qaqaco kina noda nuitaka na bula.
[iTaba ni Credit Line ena tabana e 2]
Tabana e 3: Vakalutu gasaukuro: USAF photo; gone waloloi: UNITED NATIONS/J. FRAND; kama na waqanivalu: U.S. Navy photo