Mo Raica Vakacava na Veivakaisini?

ENA were o Kecisemani, a lako yani o Jutasa Isikarioti vei Jisu, “ka reguca sara.” Oqori na ivakarau ni veikidavaki vakayalololoma. Ia, e vakarairai ga na ka e cakava oqo o Jutasa me vakatakilai Jisu kina vei ira na mai veivesu ena bogi. (Maciu 26:48, 49, VV) O Jutasa e dauveivakaisini​—e dua e boroya na iyaloyalo lasu me baleti koya, e ubia na nona inaki ca ena kena irairai rakorako. Na vosa vakirisi e vu mai kina na “veivakaisini” e vakaibalebaletaka “e dua e dau saumitaro” qai dusia tale ga e dua e dau vakaitavi ena drama ena buturara. Toso na gauna, sa qai vakaibalebaletaka e dua e boroya na iyaloyalo lasu me baleti koya me vakacalai ira kina na tani.

E tarai iko vakacava na veivakaisini? Me kena ivakaraitaki, o na cudruvi ira beka na kabani dau buli tavako nira uqeta na vakatavako dina ga ni vakadinadinataki vakavuniwai na veivakaleqai ni nodra ivoli? O na cudruvi ira beka na dau veimaroroi era veivakaisini nira vakacacani ira e dodonu mera taqomaka? O na rarawataka beka na nona sega ni dina vei iko e dua o nanuma ni a nomu itokani vinaka? E vakayacoka vakacava vei iko na nodra veivakaisini na lotu?

“Dou sa Kalouca . . . na Dauveivakaisini!”

Vakasamataka mada na draki ni bula vakalotu e kune ena gauna a bula voli kina o Jisu e vuravura. O ira na daunilawa kei na Farisi era viavia ivakavuvuli yalodina ena lawa ni Kalou, ia na kena dina nira vakatawana ina nodra vakasama na tamata na ivakavuvuli vakatamata e vagolei ira tani mai vua na Kalou. Era vinakata na daunilawa kei na Farisi me muri sara ga na ka e tukuni ena lawa, ia era lecava na ivakavuvuli bibi ni loloma kei na veinanumi. Era vakaraitaka e matanalevu na nodra viavia yalododonu vua na Kalou, ia era cakava lo e levu na ka ca. E sega ni lakolako vata sara ga na ka era cakava kei na ka era tukuna. Era cakava na ka “me ra raici ira kina ko ira na tamata.” Era vaka na “i bulubulu boro vulavula, sa rairai vinaka tu ga e taudaku, ia sa sinai tu e loma na sui ni mate kei na ka dukadukali kece ga.” Nona vakavotui ira ena yalodoudou na dauveivakaisini, a tukuna kina vakavica vata o Jisu vei ira: “Dou sa kalouca dina na daunilawa kei na Farisi, na dauveivakaisini!”​—Maciu 23:5, 13-31, VV.

Ke o bula ena gauna oya, o na vakataki ira na tamata lomadina ena nomu vakasisilataka dina na nodra veivakaisini na lotu. (Roma 2:21-24; 2 Pita 2:1-3) Ia, ena rawai iko beka na nodra veivakaisini na daunilawa kei ira na Farisi mo cudru kina ka cata na lotu kece, wili kina na kena a vakavulica qai bulataka sara ga o Jisu Karisito kei iratou na nona tisaipeli? Sega beka ni o na sotava kina na ca?

Nodra itovo veivakaisini na tamata lotu ena vakavuna meda kua ni goleva na lotu nida sevaka. Ia, ke da cakava oya ena rawa ni vakamatabokotaki keda meda kua ni raica na nodra yalodina na dausokalou dina. Nida viria na itataqomaki meda sabaya kina na veivakaisini ena rawa tale ga nida calata kina na itokani dina. Me donu na noda rai me baleta na veivakaisini da qai yalomatua tale ga.

“Dou Raica”

iMatai, ena gadrevi mo kilai ira na dauveivakaisini. Oqo e sega ni dau ka rawarawa. Eratou a vulica oqo ena sala mosimosi dina e dua na vuvale. Sa sega ni vakilai koya o tinadratou. Eratou a sauma na matavuvale oqo e dua na loya, e dauvunau tale ga ni lotu ena vanua oya me veilewaitaka na nodratou cakacaka ca na valenibula e a yaco kina na leqa oqo. Dina ga ni a sauma na valenibula e US$3.4 na milioni, sa qai vakadredretaka ga na nodratou leqa na vuvale. A mate vaka na dravudravua o tinadratou, ni a sega na ilavo ni veibulu. Na cava na vuna? Ni a qoqota kece o loya na ilavo. Ena vuku ni loya oqo, a kaya e dua na ivoladraudrau ni lawa: “Ke dau vunautaka o koya na ivalavala e dau cakava . . . , ena vaka oqo na nona itukutuku: meda daukocokoco.” Eda na taqomaki keda vakacava mai vei ira na tamata vaka oya?

“Dou raica,” e nona ivakasala o Jisu vei ira era sotava ena gauna oya na nodra veivakaisini na lotu. (Maciu 16:6; Luke 12:1) Io, mo qaqarauni matua. Era na vakacavutaka na tamata e vuqa na inakinaki totoka ra qai vakaraitaka e matanalevu nira tamata rakorako, ia meda qaqarauni matua qai kua ni vakariri ni vakadonui ira kece na tamata ena kedra irairai e taudaku. Eda na sega beka ni vakadigova vakavinaka na noda ilavo qaqa ke da kila ni sa vakayagataki tale tiko ga na ilavo lasulasu?

Era basika sara mada ga na dauveivakaisini ena loma ni ivavakoso ni lotu Vakarisito dina. A veivakaroti kina na tisaipeli o Juta, ena nona kaya: “O ira oqo na duka e na nomudou kana veilomani, ni ra sa kana vata kei kemudou, a ra sa vakani ira ka sega ni rere; o ira oqo na o sa sega kina na wai, sa veikauyaki e na cagi; a kau sa malai na vuana.”​—Juta 12.

‘Meda raica’ e kena ibalebale meda levea na nona veivakacalai e dua e dau loloma na kena irairai, ia e dau nanumi koya ga qai dau vakauqeta na rai e sega ni yavutaki ena Vosa ni Kalou. E vaka na vatu gagata e lomaniwai maravu, o ira na tamata vaka oya e rawa nira vakavuna na nona kasa vakayalo e dua ke sega ni qaqarauni. (1 Timoci 1:19) Ena yalataka beka o koya na dauveivakaisini e levu na ka me na veivakacegui kina vakayalo ia ena vaka ga na ‘o loaloa e sega na kena uca.’ Me vaka ga na kau e sega ni vakavuana, e sega ni vuataka na vua ni lotu Vakarisito dina o koya na dauveivakacalai. (Maciu 7:15-20; Kalatia 5:19-21) Io, meda qarauni keda matua mai vei ira na dauveivakacalai vaka oya. Ia, nida qaqarauni meda kua ni kasamitaki ira kece vakaca na tamata.

“Dou Kakua ni Dauveivakalewai”

E dau ka rawarawa sara vua na tamata ivalavala ca me dusia na nodra malumalumu na tani qai lecava na nona malumalumu! Oqori e dau vakarawarawataka kina meda veivakaisini. “O iko na dauveivakaisini,” e kaya o Jisu. “Mo cavuta tani mada na tolo ni kau mai na matamu, ko na qai rai vinaka mo leuta na malamala mai na mata ni wekamu.” Eda na sotava na vinaka ke da muria na nona ivakasala: “Dou kakua ni dauveivakalewai, de dou lewai. Ni dou na lewai ga e na lewa dou sa cakava . . . A cava ko raica ga kina na malamala e na mata ni wekamu, ka sega ni raica na tiki ni kau e matamu?”​—Maciu 7:1-5, VV.

Na gauna era cakava kina na tani e so na ka e vaka me veivakaisini, eda na qarauna meda kua ni totolo ni vakacavutaki ira mera veivakaisini. Na yapositolo o Pita, me kena ivakaraitaki, a “vakatikitiki ka tawasei koya tani mai” vei ira na kai Matanitu Tani era itokani vakabauta e Anitioki, me vakalomavinakataki ira kina na vulagi era tikitiki Jiu mai Jerusalemi. ‘A rawai tale ga o Panapasa, vata kei Pita kei na so tale ena nodra ivalavala veivakaisini.’ A cakava oqo o Pita dina ga ni a soli vua na itavi dokai me dolava na sala vei ira na kai Matanitu Tani mera mai lewe ni ivavakoso lotu Vakarisito. (Kalatia 2:11-14, VV; Cakacaka 10:24-28, 34, 35) Ia, na nodrau cala oqo o Panapasa kei Pita e sega ni rau lai wili vata kina kei ira na daunilawa kei na Farisi se o Jutasa Isikarioti.

“Me Dina ka Maucokona Vinaka na Nomuni Loloma”

“Ni o caka vinaka vei ira na tani,” e vakarota o Jisu, “kua ni o sauma e dua me uvu davui e matamu​—me vakataki ira na dau drama ena buturara ni veivalenilotu kei na veisalatu me qoroi ira kina na tamata.” (Maciu 6:2, ivakadewa na Phillips) “Me dina ka maucokona vinaka na nomuni loloma,” a vola na yapositolo o Paula. (Roma 12:9, VV) A uqeta na itabagone o Timoci me tiko vua na “loloma mai na yalo savasava . . . kei na vakabauta tawa vakailasu [se, “tawaveivakaisini,” NW].” (1 Timoci 1:5) Ke dina na noda loloma kei na noda vakabauta—⁠sega ni veilaroi tu ena tawaveinanumi kei na veivakacalai—⁠era na nuitaki keda o ira na tani. Eda na vu ni kaukaua dina qai veivakayaloqaqataki tale ga vei ira era bula yavoliti keda. (Filipai 2:4; 1 Joni 3:17, 18; 4:20, 21) Kena ilutua, ni na vakadonui keda o Jiova.

Na veivakaisini, ena dua na yasana, ena vakavumate dina vei ira era cakava tiko. Kena itinitini, ena vakavotui e matanalevu na dauveivakaisini. E kaya o Jisu: “Sa sega na ka vuni me na sega ni vakarairaitaki; se tabogo me na sega ni kilai.” (Maciu 10:26; Luke 12:2) E tukuna na tui vuku o Solomoni: “Ni na lewa na cakacaka kecega na Kalou, kei na ka vuni kecega, se vinaka, se ca.”​—Dauvunau 12:14.

Ena gauna oqo, cava na vuna meda vakalaiva kina na nodra veivakaisini na tani me vakuai keda mai na nodra loloma dina na itokani vinaka? Meda qaqarauni matua ia kua ga ni kasami vakasivia. O koya gona, me kua mada ga ni veivakaisini na noda loloma kei na vakabauta.—Jemesa 3:17; 1 Pita 1:22.

[iYaloyalo ena tabana e 22, 23]

Ena rawai iko beka na nodra veivakaisini na daunilawa kei ira na Farisi mo goletani kina vei Jisu Karisito kei ira na nona tisaipeli?