Kemuni na Qase Vakavulica Eso Tale Mera Colaitavi

ENA veiyasa i vuravura, e gadrevi vakalevu kina na tagane mera veiliutaki ena nodra ivavakoso na iVakadinadina i Jiova. E tolu na vuna levu e gadrevi kina oqo edaidai.

Kena imatai, sa vakayacora tiko o Jiova na nona vosa ni yalayala ni na vakalougatataki ‘koya sa lailai me matanitu kaukaua.’ (Aisea 60:22) Ena loloma ni Kalou, sa ra papitaiso kina ena loma ni tolu ga na yabaki sa oti e rauta ni duanamilioni na tisaipeli vou. E gadrevi na tagane nuitaki mera vukei ira na papitaiso vou oqo mera toso mera lotu Vakarisito matua.​—Iperiu 6:1.

Kena ikarua, e so sa yabaki sagavulu na nodra veiqaravi voli vaqase era sa malumalumu mai ni sa tarabi vei ira na nodra yabaki ni bula, se ra tautauvimate. E gadrevi kina me vakamamadataki na nodra icolacola ena ivavakoso.

Kena ikatolu, dua na iwiliwili levu ni qase gugumatua era sa veiqaravi tiko ena Komiti Veitaratara kei na Valenibula, Komiti ni Taravale, se Komiti ni Assembly Hall. Ena vuku ni tikina oqo, e gadrevi kina ena so na gauna mera vagalalataki ira mai na so na nodra itavi ena ivavakoso.

Na cava gona me caka ni sa vinakati totolo vaka oqo e so tale na tagane matua mera colaitavi? Na kena dina ga na veivakavulici. E uqeti ira na ivakatawa vakarisito na iVolatabu mera vakavulici ira “na tamata yalodina, era na rawata me vakavulici ira na tani.” (2 Timoci 2:2) Ni dua e vakavulici, e kena ibalebale ni vakavulici me ganiti koya na ka e tuberi tiko kina, me rawata na kena ivakatagedegede, se me maqosa kina. Meda raica mada se ra dau veivakavulici vakacava na qase mera rawata kina na ivakatagedegede gadrevi e so tale na tagane.

Muria na iVakaraitaki i Jiova

A ganiti Jisu Karisito dina na cakacaka a lesi vua, a rawata na kena ivakatagedegede, qai maqosa kina. Sa rauta ga, baleta ni vakavulici koya na Kalou o Jiova! Na cava e laulau kina na ituvatuva ni veivakavulici oya? A cavuta o Jisu e tolu na yavu me vaka e volai ena Joni 5:​20: “Sa lomana [1] na Luvena ko Tamana, a sa [2] vakatakila vua na ka kecega sa kitaka ko koya; ia ena vakaraitaka vua [3] na cakacaka eso sa uasivi cake e na veika oqo.” Nida dikeva yadua na yavu e tolu oqo, ena matata cake kina na sala me ia kina na veivakavulici.

Nanuma tiko ni imatai ni ka a kaya o Jisu: “Sa lomana na Luvena ko Tamana.” Rau sa dau veivolekati tu mai na itekitekivu sara ni veibuli na Kalou o Jiova kei na Luvena. E vakavotuya na tikina oqori na Vosa Vakaibalebale 8:​30: “[O yau o Jisu] au a qai tiko kaya [kei na Kalou o Jiova] me matai daucakacaka: Ka’u a nona ka e daurekitaki e na veisiga, ka’u a marau tiko e matana.” Sega tale ni lomalomaruataka o Jisu ni “daurekitaki” koya dina o Jiova. Dua na ka nona marautaka na nodrau dau cakacaka vata kei Tamana. E ka vinaka kina mera dau veivolekati ra qai dau veilomani na ivakatawa vakarisito kei ira era vakavulici tiko!

Na ikarua ni tikina a cavuta o Jisu, oya ni o Tamana e “vakatakila vua na ka kecega sa kitaka.” Na vosa oqo e vakadinadinataka na veika e cavuti ena Vosa Vakaibalebale 8:​30, oya ni o Jisu a “tiko kaya” kei Jiova ni se qai buli tiko na lomalagi kei vuravura. (Vakatekivu 1:​26) Mera muria na ivakaraitaki totoka oya na qase ena nodra cakacaka vata vakaveivolekati kei ira na dauveiqaravi vakaitalatala, ra qai vakaraitaka vei ira na sala mera vakayacora kina vakavinaka na nodra itavi. Sega ni o ira wale ga na dauveiqaravi vakaitalatala era se qai lesi vou e gadrevi mera dau vakavulici. Vakacava o ira na mataveitacini tagane yalodina sa yabaki vica vata na nodra kakavaka tiko mera dua na ivakatawa, ia era se bera ga ni lesi kina? (1 Timoci 3:​1, VV) E dodonu vei ira na qase mera vakasalataki ira ena ka sara ga mera cakacaka kina.

Me kena ivakaraitaki, e dau nuitaki beka e dua na dauveiqaravi vakaitalatala, e dau cakacaka ena gauna, qai dau cakava vinaka na ka e soli vua. De dua, e qasenivuli vinaka tale ga. Sa rairai totoka sara na ivalavala ni nona veiqaravi tiko ena loma ni ivavakoso. Ia, ena lecava beka ni dau kaukaua na ivakarau ni nona vosa vei ira na nona itokani lotu Vakarisito. E bibi mera vakaraitaka na qase ni tiko vei ira “na yalo malua kei na vuku.” (Jemesa 3:​13, VV) Ena ka vakayalololoma kina vua na qase me vakamatatataka vei koya na dauveiqaravi vakaitalatala na leqa e tiko, me tukuna sara ga vua e so na kena ivakaraitaki, qai vakatura na veika me rawa ni cakacaka kina. Ke qarauna na qase me ‘vakatuituinataka na nona ivakasala ena masima,’ ena ciqomi rawarawa oqori. (Kolosa 4:6) Ia ena vakarawarawataki sara na itavi i koya na qase ke dau yalorawarawa qai tu vakarau o dauveiqaravi vakaitalatala me ciqoma na ivakasala cava ga e tau vua.​—Same 141:5.

Ena so na ivavakoso, e sega ni cegu na nodra veituberi kei na nodra veivakavulici yaga na qase vei ira na dauveiqaravi vakaitalatala. Me kena ivakaraitaki, era sa dau kau tale tiko ga na dauveiqaravi vakaitalatala matua ena cakacaka ni veisikovi vei ira na tauvimate kei ira na sa qase. Oqo na sala era vakamatautaki ira kina na dauveiqaravi vakaitalatala ena cakacaka ni veivakatawani. Ia, e levu tale tu na ka e rawa ni vakayacora vakataki koya na dauveiqaravi vakaitalatala me vakarabailevutaka kina na nona toso vakayalo.​—Raica na kato e ra e kena ulutaga “Veika Mera Vakayacora na Dauveiqaravi Vakaitalatala.”

Na ikatolu ni tikina a laulau kina na veivakavulici i Jiova, oya ni a vakavulici Jisu ena veika ena qai yaga vua emuri. A kaya o Jisu ni o Tamana ena vakaraitaka vei koya “na cakacaka eso sa uasivi cake.” Na yalomatua a rawata o Jisu mai na veika a sotava e vuravura e bucina rawa kina na itovo ena yaga vua ena ilesilesi ena qai colata mai muri. (Iperiu 4:​15, VV; 5:​8, 9) Me kena ivakaraitaki, e dua na ilesilesi levu dina sa na vakarau lesi oqo vei Jisu​—mera vakaturi ra qai lewai o ira na vica vata na bilioni era mate tu!​—Joni 5:​21, 22.

Nira vakavulici ira edaidai na dauveiqaravi vakaitalatala, e bibi mera nanuma tiko na qase na veika ena qai gadrevi mai muri. De dua e veirauti na levu ni qase kei na dauveiqaravi vakaitalatala me qaravi kina na ivavakoso, ia vakaevei ke sa mani tauyavu e dua tale, se vica tale? Ena loma ni tolu na yabaki sa sivi, e tautauyavu kina ena veiyasa i vuravura e sivia na 6,000 na ivavakoso vovou. Dua na iwiliwili levu dina ni qase kei na dauveiqaravi vakaitalatala e gadrevi mera qarava na ivavakoso vovou kece oya!

Kemuni na qase, oni saga beka mo ni dau kauaitaki ira vakayalololoma na tagane oni vakavulici ira tiko? Oni sa tuberi ira tiko mera kila na itavi e lesi vei ira? Oni sa rai sara tiko i liu kei na veika ena gadrevi beka kina? Nomuni muria na ivakaraitaki i Jiova ena nona vakavulici Jisu ena vu ni veivakalougatataki levu vei ira e vuqa.

Kua ni Tu Vakasuka ni Lesia na iTavi

So na qase matua sa matau vei ira na qarava e vica vata na itavi bibi, e dau dredre mera lesia na itavi vei ira tale e so. De ra sa vakayacora oti oya, ia a sega ni caka vinaka na ka e lesi. Sa qai dau nodra rai beka oqo, ‘Kevaka me caka vakavinaka e dua na ka, meu sa na cakava sara ga o yau.’ Ia e salavata beka na rai oqo kei na loma i Jiova me vaka e tukuni ena iVolatabu, oya ni vinakati vei ira na matua mera vakavulici ira e se lailai na ka era kila?​—2 Timoci 2:​2, VV.

Rarawataka dina na yapositolo o Paula ni a biuta na nona ilesilesi e Pamifilia o Joni Marika, e dua erau a veitomani voli e kea, qai suka ina nona itikotiko. (Cakacaka 15:​38, 39) Ia, a sega ni via yalolailai kina o Paula, me nanuma ni sa sega ni yaga me vakavulica e dua tale. Mani digitaka e dua tale na cauravou, o Timoci, qai vakavulici koya ena cakacaka ni kaulotu.a (Cakacaka 16:​1-3) Kaukaua sara na nodratou saqati mai Peria na daukaulotu, qai sega kina ni veiganiti me tiko voli ga e kea o Paula. Mani tataunaka tu na ivavakoso se qai tauyavu vou e kea vei Sailasa, e dua na tacina vakayalo matua, vaka kina vei Timoci. (Cakacaka 17:​13-​15) Sega ni vakatitiqataki ni levu sara na ka a vulica o Timoci vei Sailasa. E muri, ni sa rawa vei Timoci me colata e so tale na itavi bibi, sa qai lesi koya o Paula me gole i Cesalonaika me lai vakayaloqaqataka na ivavakoso e kea.​—1 Cesalonaika 3:​1-3.

Dua na ka na nodrau veivolekati kei na nodrau dau veilomani o Paula kei Timoci. Ni volavola tiko ina ivavakoso mai Korinica o Paula, e cavuti Timoci ena ivola, o koya e nanuma me tala e kea, me “luvequ lomani ka yalo dina e na ka ni Turaga.” A kaya tale: “Sa na tukuna tale ga vei kemuni ko koya na noqu i vakarau ni bula vou ni keirau sa tu vata kei Karisito.” (1 Korinica 4:​17, VV) Totolo ni ciqoma o Timoci na veivakavulici i Paula, mani rawata kina na ivakatagedegede gadrevi me vakayacora kina na itavi e lesi vua. Levu sara na tacida tagane gone era lai yaco mera dauveiqaravi vakaitalatala matua, qase, se ivakatawa dau veilakoyaki, baleta wale ga nira ciqoma na nodra veivakavulici na qase matua era kauaitaki ira dina, me vakataki Paula ga ni a kauaitaki Timoci.

Kemuni na Qase, Vakavulica e so Tale!

Sega tale ni vakatitiqataki ni sa vakayacori sara tiko ga edaidai na parofisai ena Aisea 60:22. O Jiova e sa vakalougatataki koya tiko ‘sa lailai me matanitu kaukaua.’ Me “kaukauwa” tiko ga na matanitu oya, ena vinakati me cicivaki vakavinaka. Kemuni gona na qase, vakaevei mo ni dikeva se veivakavulici cava tale e gadrevi mera vukei kina o ira na tagane era sa yalayala oti mera rawata kina na ivakatagedegede ni veiqaravi? Mo ni kila tiko nira sega ni lecava na dauveiqaravi vakaitalatala yadua na tikina ena gadrevi mera na dui vakavinakataka mera na toso kina vakayalo. Kemuni na mataveitacini tagane papitaiso, ni ciqoma qai vakayagataka vinaka sara na veika ena tuberi kemuni beka kina e dua na qase. Vakayagataka vinaka na gauna mo ni vulika kina, mo ni vakalevutaka kina na nomuni kilaka kei na yalomatua. Ena vakalougatataka dina o Jiova na porokaramu vaka oqori ni veituberi vakayalololoma.​—Aisea 61:5.

[iVakamacala e ra]

[Kato ena tabana e 30]

Veika Mera Vakayacora na Dauveiqaravi Vakaitalatala

E dina ni dodonu mera dau vakavulici ira na dauveiqaravi vakaitalatala na qase, ia e levu tale na ka e rawa nira cakava na dauveiqaravi vakaitalatala mera tosoi ira kina vakayalo.

​—Me laurai vei ira na dauveiqaravi vakaitalatala na yalomamakutu ni colaitavi, me vakilai tale ga nira tamata nuitaki. Me tiko e dua na nodra ituvatuva vinaka ni dau vuli vakataki ira. Vakalevu ga, ena vakatau na nona toso e dua ena vuli kei na vakaitovotaki ni veika e vulici.

​—Ni vakavakarau tiko e dua na dauveiqaravi vakaitalatala me vunau ena soqoni Vakarisito, me kua ni tu vakasuka ni torova e dua na qase matua me kere veivuke vua.

​—De vinaka me kerea tale ga na qase oya me vakarogoci koya ni sa vunau tiko qai veivakasalataki ena ka me vakavinakataki kina na nona vunau.

E vinaka vei ira na dauveiqaravi vakaitalatala mera dau kere ivakasala vei ira na qase, mera ciqoma ra qai muria sara na ivakasala e tau. Ke ra vakayacora oqori, ena qai raici votu na nodra toso vakayalo.​—1 Timoci 4:​15.