E Dolava na Katuba Levu ni Cakacaka na Koronivuli ni Vuli Veiqaravi Vakaitalatala
1 Ena gusu i Jeremaia na parofita, a parofisaitaka o Jiova: “Ka’u na lesia eso me nodrai vakatawa era na vakani ira: ka ra na sega ni rere tale, se taqaya, se yali.” (Jere. 23:4) Sa caka tiko nikua vei ira na lewe ni veivanua kece ga na cakacaka ni veivakatawani oqo. Era cakava tiko na cakacaka oqo e tini vakacaca na udolu na qase ni ivavakoso. Vaka kina o ira na cauravou era via cabori ira mera qaravi Jiova e vaka na matanitegu na kedra levu. (Same 110:3) Era vu ni veivakalougatataki ena nodra ivavakoso na tamata ni Kalou na tacida oqo! Ni se tomani tiko ga na cakacaka ni kumukumuni, e sa qai gadrevi ga kina vakalevu o ira na tacida tagane era rawata na kena ivakatagedegede mera veiqaravi.
2 E vakarautaki na Koronivuli ni Vuli Veiqaravi Vakaitalatala mera vuli kina na dauveiqaravi vakaitalatala, kei ira na qase ni ivavakoso era cauravou se dawai. Era sa vuli oti e sivia na 22,000 na gonevuli mai na rauta na 140 na vanua, ena 999 na kalasi sa vakayacori oti mai na gauna a tekivu kina na koronivuli oqo ena 1987. Vei ira na tacida, na koronivuli oqo e vaka e dolava vei ira e dua na “katuba levu” ni cakacaka.—1 Kor. 16:9.
3 iNaki ni Koronivuli: Na inaki na koronivuli oqo mera vakavulici ra qai vakarautaki kina na tacida tagane mera vakaitavi ena isoqosoqo. E vukei ira na koronivuli oqo mera cakava vinaka nodra itavi ena liutaki ni cakacaka vakavunau, cakacaka ni veivakatawani, kei na veivakavulici ena ivavakoso. Ni oti na tuvaitutu, e so vei ira era veiqaravi ga ena nodra vanua, se ra lesi i vanuatani. Era lesi mera painia lavotaki se ivakatawa dauveilakoyaki. E so tale era lai veiqaravi ga ena nodra ivavakoso, se ena vanua e gadrevi kina vakalevu na cakacaka ena yalava ga ni tabana era tiko kina.
4 Ena walu na macawa ni nodra vuli, era vulica vinaka sara ga kina na iVolatabu. Era vulica e levu na ivakavuvuli vakaivolatabu, vaka kina na itavi ni veivakatawani, kei na veidusidusi me wali kina e so na leqa e dau basika ena bula vakarisito. Era vulica na veika e kaya na iVolatabu me baleta na cicivaki ni isoqosoqo, ka ni veilewai, kei na veiliutaki. Era vulica mera kenadau ena vunau ena matanalevu, era vukei tale ga mera tubu totolo vakayalo.
5 Veika e Gadrevi: E gadrevi vei ira na via vuli na ivakatagedegede vinaka. Me kua ni cavuka nodra qase ni ivavakoso se dauveiqaravi vakaitalatala me rua na yabaki. Mera gonetagane se dawai, me tiko tale ga nodra yabaki mai na 23 ina 50. Mera wilika, vola, qai vosataka na vosa ena vakayagataki ena gauna ni vuli, mera kua ni tautauvimate, me kua ni duatani na veiqaravi e dau soli vei ira, se duatani na kakana era dau kania. Era na digitaki vakailiu na painia tudei.
6 O ira na bole, e dodonu mera tu vakarau mera veiqaravi ena vanua ga e gadrevi kina na cakacaka. Oqo e gadrevi kina na yalo vata ga e tiko vua na parofita o Aisea, a soli koya vakarawarawa me cakava na cakacaka lavotaki, ni kaya: “Koi au oqo; mo ni talai au.” (Aisea 6:8) E vakaitovotaka tale ga na yalomalumalumu ena nona bula kece. O ira gona na via vuli ena Koronivuli ni Vuli Veiqaravi Vakaitalatala, me uqeti ira na nodra lomani ira na tacidra, kei na nodra via qaravi ira, me kua ga ni tiko vei ira na yalo ni via rogo se vakaitutu. Ni sa oti na vuli, ena gadrevi mera vakayagataka na ka era vulica me yaga vei ira tale e so.—Luke 12:48.
7 Na Kena Yaga: Ena walu na macawa ni nodra vuli tiko na gonevuli oqo, era na ‘tubu cake ena vosa ni vakabauta kei na ivakavuvuli vinaka.’ (1 Tim. 4:6, VV) Ena vakarautaki ira oqo mera veivuke ra qai veivakayaloqaqataki ena ivavakoso, se na tabacakacaka era lesi kina. Ena levu na vanua era lesi kina o ira na vuli oti ena Koronivuli ni Vuli Veiqaravi Vakaitalatala, e laurai ni tubu na cakacaka vakavunau; era veiuqeti ena cakacaka vakapainia vakabibi vei ira na itabagone; era kauaitaki vakalevu tale ga na ka vou era sa mai sosoqoni tiko kei ira na tamata ni Kalou.
8 O dua beka na dauveiqaravi vakaitalatala se qase ni ivavakoso cauravou se dawai e tiko nomu yabaki ena maliwa ni 23 ina 50? Vakacava mo kerea mo lai vuli ena Koronivuli ni Vuli Veiqaravi Vakaitalatala? O dua beka na cauravou o vakasamataka tiko me nomu isausau mo veiqaravi vei Jiova ena dua na gauna balavu? Vakacava o bula rawarawa ga me kua ni dua na ka e vakataotaki iko mo rawa kina ni curu ena ‘katuba levu ni cakacaka’? O na rawa ni kunea kina na marau dina kei na lomavakacegu. Io, era sega wale ga ni vakalougatataki o ira na vuli oti ena Koronivuli ni Vuli Veiqaravi Vakaitalatala, era vakalougatataki tale ga na ivavakoso ni Kalou e vuravura raraba.
[Kato ena tabana e 3]
E Yaga Vei Ira na Vuli
“E vukei au na vuli oqo meu vakavinakataka noqu cakacaka vakavunau, kei na noqu vakatawani ira vakayalomatua na sipi ena kena vakayagataki na iVolatabu.”
“E vukei au na vuli oqo meu doudou kina ni vakayacora na itavi vakaivavakoso e dau soli vei au.”
“E veisautaka sara ga na noqu bula, okati kina na noqu rai me baleta na veiliutaki ni Kalou kei na nona isoqosoqo.”
“E vukei au na vuli oqo meu soli au vakarawarawa meu lai veiqaravi ena vanua e gadrevi kina vakalevu na cakacaka.”