Taro na Dauwiliwili

Ni goneyalewa ivalavala ca o Meri, e vakaleqa beka oya na kunekunetaki i Jisu?

E vakamacalataka vaka oqo na “sucu i Jisu” na Vosa ni Kalou: “Sa musu eliu ko Meri na tinana vei Josefa, ia ni rau sa sega mada ni veiyacovi, sa votu na nona bukete mai vua na Yalo Tabu.” (Maciu 1:18) Eda raica e ke ni yalo tabu ni Kalou a vakavuna na kunekune i Meri.

Ia, vakacava o Meri, e tiki tale ga ni yagona na gone a kunekunetaki e ketena? A bibi me rau dra vata me rawa ni wiliki kina na gone me nodra kawa dina na tuka i Meri, o Eparama, Aisake, Jekope, Juta, kei Tui Tevita. (Vakatekivu 22:18; 26:24; 28:​10-14; 49:10; 2 Samuela 7:16) Ke sega, ena sega ni rawa me nona na gone na veika a yalataka na Kalou vei ira na tuka i Meri. Ena vakayacori ga vua na vosa ni yalayala ni Kalou ke luve i Meri dina.​—Luke 3:​23-34.

Ni a talai na agilosi i Jiova vua na goneyalewa o Meri e kaya: “Kakua ni rere, Meri: ni ko sa kune loloma vua na Kalou: ka raica, ko na kunekune, ko na vakasucuma talega e dua na gonetagane; ia mo vakayacani koya ko Jisu.” (Luke 1:​30, 31) E dau kena ivalavala me rau tikovata e dua na tagane kei na dua na yalewa me rawa ni kunekune kina o yalewa. Ia vei Meri, na Kalou o Jiova a vakavuna nona kunekune ena nona tokia na bula i Luvena duabau e vakatubura, mai lomalagi ina katonigone i Meri.​—Kalatia 4:4.

Ena takavi koya beka na gone e kunekunetaki vaka oqo na ivalavala ca i tinana? Eda sega ni vulagi ena ka e dau yaco ni rau vakaluveni na itubutubu erau tamata ivalavala ca ruarua. E dau dewavi ira kece na luvedrau na ivalavala ca. Ia vakacava ke dua vei rau na itubutubu, kaya mada o tama, e sega ni tamata ivalavala ca, e uasivi sara. Ena vaka beka i vei na luvedrau? Meda nanuma tiko ni yalo tabu a vakayagataki me tokitaka na igunibula uasivi ni Luve ni Kalou ina katonigone i Meri. E bokoci laivi kina na mawe ni ivalavala ca e rawa ni dewa vei gone ena kete i tinana. Sa na rawa ni uasivi gona o gone, tekivu sara ga mai na nona kunekunetaki.

E dina ni sega ni kilai e so na ka me baleta na kunekune i Meri ia eda kila deivaki ni tiko vua na yalo tabu me rawa ni yaco dina kina na inaki ni Kalou. A sa tukuna oti vei Meri na agilosi o Keperieli: “Ena lako sobu mai vei iko na Yalo Tabu, ena vakarurugi iko talega na kaukauwa i Koya sa cecere sara: ia ko koya ena sucu mai vei iko ena vakatokai kina me ka tabu na Luve ni Kalou.” (Luke 1:35) Io, ena vula kece ni nona tiko bibi o Meri e vaka ni viria na yalo tabu ni Kalou e dua na bai me taqomaka na gone e tubu tiko e ketena, me kua ni tarai koya e dua na ka e rawa ni vakaleqa na nona bula.

E macala ni bula uasivi i Jisu e sega ni vu mai vua e dua na tagane e vuravura, na Tamana ga vakalomalagi. Ni ‘vakarautaka vei koya na yago’ o Jiova, “sa sega na nona duka” o Jisu, “sa tawasei mai vei ra na i valavala ca” mai na gauna sara ga a kunekunetaki kina.​—Iperiu 7:26; 10:​5, VV.

[iYaloyalo ena tabana e 19]

“Ko na kunekune, ko na vakasucuma talega e dua na gonetagane”