Ciqomi Ira na Matanitu Kece na Kalou

ENA imatai ni nona butuki Mali o Joni, e tarai koya sara ga na nodratou veikauaitaki na matavuvale na Mamadou. Ni dabe toka e ra, qai sasaga kana mai na veleti eratou kana vata tiko kina, e veinanuyaka o Joni se me na wasea vakacava vei iratou na isolisoli vakamareqeti ni itukutuku vinaka ni Matanitu ni Kalou ena iVolatabu. E dina ni kila na vosa vakavaranise, e dua vei ira na vosa e vakayagataki e Mali, ia e veinanuyaka ga se rawa vakacava vua me kilai iratou vinaka ni duidui na nodratou lotu kei na nodratou ivakarau ni vakasama.

Sa rauta me lesu tale na vakasama i Joni ina ivakaraitaki ena iVolatabu ni koro o Pepeli. A vakasesea na Kalou na nodra vosa na tamata dau be. (Vakatekivu 11:​1-9) Oya na vuna e duidui kina na vosa e veiyasa i vuravura, duidui na lotu kei na ivakarau ni rai. Nikua, sa ivakarau tu ni bula na veilakoyaki kei na veitokiyaki mai na dua na vanua ina dua tale, era vakila e vuqa ena nodra itikotiko sara mada ga na ka vata e sotava o Joni: Mera wasea vakacava na nuinui mai na iVolatabu vei ira e duidui nodra isususu?

iVakaraitaki ena Gauna Makawa

Me vakataki ira ga na parofita e Isireli, o Jona ena vosa ga vei ira na Isireli. E parofisai tiko ena gauna era vakayacora kina e matanalevu na yavusa e tini kei Isireli na itovo dukadukali e beci kina na Kalou. (2 Tui 14:​23-​25) Vakasamataka mada se na vakacava na yalo i Jona ni sa soli vei koya na ilesilesi lavotaki me biuta na nona vanua me lako i Asiria, me lai vunau vei ira na kai Ninive, e duidui na nodra lotu kei na nodra itovo vakavanua. Ena rairai sega ni kila vinaka o Jona na nodra vosa na kai Ninive. Ke mani kila o Jona na nodra vosa se sega, e kila ni oqo e dua na ilesilesi dredre, mani dro kina.​—Jona 1:​1-3.

E gadrevi me kila o Jona ni Kalou o Jiova e sega ni raica wale ga na irairai e taudaku e raica tale ga na loma ni tamata. (1 Samuela 16:7) Ni oti nona vakabulai Jona vakacakamana o Jiova mai na kete ni ika, a qai vakaroti koya ena ikarua ni gauna me lai vunau vei ira na kai Ninive. A talairawarawa o Jona, ra mani veivutuni kina vakoro na kai Ninive. Ia, e se sega ga ni donu na rai nei Jona. Mani vakavulici koya o Jiova ena dua na ivakaraitaki me veisautaka na nona rai. A tarogi koya o Jiova: “Me’u kakua li ni lomani Ninive, na koro levu ko ya, era sa tiko kina e le dua na drau ka ruasagavulu na udolu na tamata era sega ni kila rawa na ligadra i matau mai na ligadra i mawi?” (Jona 4:​5-​11) Vakacava o keda nikua? E rawa vakacava meda vukei ira e duidui na nodra isususu?

Ciqomi Ira na Kai Samaria kei Ira na Sega ni Jiu

A vakaroti ira na nona imuri o Jisu mera veivakatisaipelitaki ena veivanua kece ga. (Maciu 28:19) Oqo e sega ni ka rawarawa vei ira. Me vakataki Jona ga, era Jiu na tisaipeli i Jisu, ra qai dau veivosaki ga vakaivata. Dua tale, ena gauna oya e dau nodra itovo ga na Jiu mera cati ira na matatamata tani. E dusimaki ira nona dauveiqaravi o Jiova mera kila na lomana ra qai vukei ira na tani.

Na imatai ni kalawa, oya me vakaoti mada nodra veivakaduiduitaki na Jiu kei ira na kai Samaria. Era sega ni veiriti na Jiu kei ira na kai Samaria. E vakavica nona vakaraitaka vei ira na kai Samaria o Jisu na sala ni bula. E sega ni veivakaduiduitaki ni a vosa vua na yalewa ni Samaria. (Joni 4:​7-​26) E vakayagataka tale ga o Jisu na ivakatautauvata ni kai Samaria dau loloma, e vakaraitaka vei ira na Jiu daulotu ni rawa vei ira na sega ni Jiu mera vakaraitaka na nodra lomani ira na tani. (Luke 10:​25-​37) Ni sa vakatara o Jiova mera lewe ni ivavakoso vakarisito o ira na kai Samaria, sa ratou qai talai o Filipi, Pita kei Joni, eratou Jiu, me ratou lai vunau vei ira. Na itukutuku eratou kauta e vakamarautaki ira na lewenikoro oya.​—Cakacaka 8:​4-8, 14-​17.

Ke dredre vei ira na Jiu lotu Vakarisito mera veilomani kei ira na kai Samaria era veiwekani ga, sa na qai dredre sara vei ira mera lomani ira na sega ni Jiu kei ira na kai Matanitu Tani era cati qai sevaki mai vei ira na Jiu. Ni sa mate oti o Jisu, sa qai rawa ni kau laivi na ilati e tiko maliwai ira na Jiu lotu Vakarisito kei ira na kai Matanitu Tani. (Efeso 2:​13, 14) Me vukei Pita me ciqoma na veisau oqo, e vakaraitaka vua o Jiova e dua na raivotu ni tukuna, “na ka sa vakasavasavataka na Kalou mo kakua ni okata me tawa savasava.” A qai kauti koya na yalo tabu i Jiova vei Konilio na kai Matanitu Tani. Ni sa siqema rawa o Pita na rai ni Kalou, oya me kua ni raici koya na kai Matanitu Tani oqo me dukadukali baleta ni sa vakasavasavataki koya na Kalou​—e uqeti koya me kaya: “Au sa qai kila dina sara oqo ni sega ni dau vakaduiduitaka na tamata na Kalou. Ia sa dau vinakati ira kece ga era dau vakarokorokotaki koya ka dau cakava na ka e dodonu, veitalia ga se mataqali kawa tamata cava era lewena.” (Cakacaka 10:​9-35, VV) E kurabuitaka o Pita ni sovaraka na Kalou na yalo tabu vei Konilio kei na nona matavuvale me vakaraitaka nona vakadonui iratou!

Paula​—Tamata Digitaki Vei Ira na Veimatanitu

Na cakacaka vakavunau i Paula e ivakaraitaki vinaka ni nona dau vakarautaki ira vakamalua na nona dauveiqaravi o Jiova mera lomani ira ra qai vukei ira na matatamata kece. Na gauna e mai veisau kina o Paula, e kaya o Jisu ni o Paula e digitaki me kauta na yacana ina veimatanitu. (Cakacaka 9:​15) A qai lako i Arapea o Paula, rairai me lai vakasamataka vakatitobu na inaki ni nona vakayagataki koya na Kalou, oya me kacivaka na itukutuku vinaka ina veimatanitu.​—Kalatia 1:​15-​17.

Na imatai ni nona ilakolako vakadaukaulotu o Paula, e lomakatakata ni vunau vei ira na sega ni Jiu. (Cakacaka 13:​46-​48) E vakalougatataka o Jiova na nona cakacaka o Paula, ni a cakava na ka e salasalavata kei na ituvatuva i Jiova. Nona doudou ni vakadodonutaki Pita o Paula e vakaraitaka ni kila vinaka o koya na rai i Jiova. E veivakaduiduitaki o Pita ni sega ni via vakailala kei ira na mataveitacini sega ni Jiu.​—Kalatia 2:​11-​14.

Na ikuri ni ivakadinadina ni tokona tiko na Kalou na sasaga i Paula e laurai ena ikarua ni nona ilakolako vakadaukaulotu, e tarovi koya kina na yalo tabu me kua ni lai vunau ena yasana vakaroma o Picinia. (Cakacaka 16:7) E kena irairai ni sega ni se kena gauna veiganiti oya. E muri e qai yaco e so na kai Picinia mera lotu Vakarisito. (1 Pita 1:1) Ena raivotu, a vakamasuti Paula e dua na kai Masitonia ni kaya: “Lako mai ki Masitonia, mo vukei keimami.” E kila sara ga e kea o Paula ni dodonu me veisautaka na nona ilakolako me lai vunautaka na itukutuku vinaka i Masitonia.​—Cakacaka 16:​9, 10.

E dau moici koya o Paula me salavata kei na ituvaki e sotava, a vakatovolei oqo ni vunau vei ira mai Aceni. E vakatabui na kalou tani kei na lotu vou ena lawa vakirisi vaka kina vakaroma. Nona lomani ira na tamata o Paula e uqeti koya me dikeva vakavinaka na nodra ivakarau ni sokalou. Mai Aceni e kunei ni volai ena dua na icabocabonisoro “VUA NA KALOU E TAWA KILAI.” Sa qai vakamacalataka na ka oqo ena nona cakacaka vakavunau. (Cakacaka 17:​22, 23) Sa dua dina na ivakaraitaki vinaka ni nona tukuna na itukutuku vinaka ena veikauaitaki kei na sala e veidokai!

Ena marau dina o Paula ni raica lesu na vua ni nona cakacaka vakayapositolo ina veimatanitu! E veivuke ena kena tauyavutaki na ivavakoso era lewena na lotu Vakarisito era sega ni Jiu mai Korinica, Filipai, Cesalonaika kei na veikoro e Kalatia. E vukei ira na turaga kei na marama vakabauta me vakataki Tamarisi, Taionisio, Serikiu Paula kei Taito. E dua na ka marautaki meda raici ira na sega ni vakabauti Jiova, kei ira tale ga na sega ni vakabauta na iVolatabu mera mai lotu Vakarisito! O Paula e vukei ira na sega ni Jiu mera mai kila na ka dina, e kaya gona kina: “Ia ka’u sa gumatua sara vakakina, me’u vunautaka nai tukutuku-vinaka, ia ka sega ga e na vanua sa tukuni oti kina na yaca i Karisito . . . ia me vaka ga sa volai, o ira sa sega ni tukuni mada vei ira ko koya, era na raica: ia ko ira era sa sega ni rogoca, era na kila.” (Roma 15:​20, 21) E rawa tale ga vei keda meda wasea yani na itukutuku vinaka vei ira e duatani na ivakarau ni nodra bula?

Vukei Ira na Tamata Kece

A masu vei Jiova o Solomoni mera mai sokalou ena valenisoro e Jerusalemi o ira na sega ni Isireli. A masuta: “Mo ni qai rogoca mai lomalagi, na yasana ko ni sa tiko kina, ka mo ni cakava me vaka na ka kecega sa masu kina vei kemuni ko ira na kai tani: me ra kila na yacamuni ko ira kecega na kai vuravura.” (1 Tui 8:​41-43) E vica vata na udolu na daukacivaka na Matanitu ni Kalou mai na veivanua era duavata kei na masu oya. Era sotavi ira era vakataki ira na kai Ninive, ena ka vakayalo era ‘sega ni kila rawa na ligadra imatau mai na ligadra imawi.’ O ira na daukacivaka na Matanitu ni Kalou era vinakata mera vakaitavi ena kena vakayacori na parofisai ni nodra vakasoqonivata mai na veivanua o ira na dausokalou dina.​—Aisea 2:​2, 3; Maika 4:​1-3.

Me vaka nira sa ciqoma e levu vei ira na lewenilotu ni Veivanua Vakarisito na itukutuku veivakacegui ena iVolatabu, era sa ciqoma tale tiko ga o ira era cavutu mai na lotu butobuto. Ena tarai iko vakacava oqo? Dikevi iko mada vakavinaka. Kevaka o kila ni o dauveivakaduiduitaki, bucina na loloma me cavuraki laivi kina.a Kua ni cati ira e vakadonui ira na Kalou.​—Joni 3:​16.

Vakarautaki iko ena nomu vulica e so na ivakarau ni nodra bula na matatamata o na lai vunau vei ira. Bau kila toka e so na ka era vakabauta, na ka era dau kauai kina, ivakarau ni nodra vakasama; qai vosa ena ulutaga drau duavata kina. Dau yaloyalovinaka, qai dau veinanumi tale ga. Kua ni veiba, mo moici rawarawa, dau veivakayaloqaqataki. (Luke 9:​52-​56) Ni o cakava oqo, o na vakamarautaki Jiova, “o koya sa vinakata me bula na tamata kecega, ka mai kila sara nai vakavuvuli dina.”​—1 Timoci 2:4.

E marautaki dina nira mai lewe ni ivavakoso o ira na duidui tamata era lako mai na veivanua! (Aisea 56:​6, 7) E veivakacegui nida sega wale ga ni rogoca na yaca i Meri, Joni, Sitiveni kei Tomasi ia na yaca tale ga me vaka na Mahendra, Makrava, Chang kei Rakesh! Io, ‘sa dola tu vei keda na katuba levu ni cakacaka yaga.’ (1 Korinica 16:​9, VV) Meda vakayagataka vinaka mada ga na gauna sa tu oqo e matada meda tomana tiko ga kina na veisureti ni Kalou sega ni dauveivakaduiduitaki o Jiova, ena nodra sureti na tamata mai na veivanua!

[iVakamacala e ra]

[iYaloyalo ena tabana e 23]

E moici koya o Paula me kacivaka rawa kina na itukutuku vinaka ena veivanua kece ga

. . . mai Aceni

. . . mai Filipai

. . . ni veilakoyaki voli