“Dou Lako Mai Vei Au, . . . Ka’u na Vakacegui Kemudou”

Vinakati me Vakatotolotaki na Tarataravaki ni Tubu Totolo na Keda iWiliwili

“DOU lako mai vei au, . . . ka’u na vakacegui kemudou,” e kaya o Jisu. (Maciu 11:28) Sa dua dina na veisureti totoka oqo mai vua na Ulu ni ivavakoso vakarisito! (Efeso 5:​23) Nida vakasamataka vakavinaka na vosa oqori, eda raica rawa kina nida na kune vakacegu ena noda vakasosoqoni vata kei ira na tacida vakayalo ena soqoni vakarisito. Eda duavata kei na daunisame ni lagata: “Na kena yaga kei na kena matavinaka, ni ra sa tiko vakayalovata na veiwekani!”​—Same 133:1.

E dina, noda veitokani kei ira na tiko ena vanua ni sokalou e uasivi, ni totoka qai vinaka na veimaliwai. Sa rauta me kaya kina e dua na itabagone: “Niu tiko e koronivuli ena loma ni dua taucoko na siga, au sa dau oca dina. Ia, na soqoni e vaka e dua na ivakavakacegu ena vanua dravuisiga, au vakabulabulataki kina meu tiko tale ena siga ni vuli e tarava.” E kaya e dua na goneyalewa ni Nigeria: “Au vakila niu voleka sara vei Jiova keu veimaliwai voleka kei ira era lomani koya.”

Na nodra Kingdom Hall na iVakadinadina i Jiova e veiganiti me vanua vinaka ni sokalou dina vei ira na tiko wavolita. Ena levu na vanua, e dau vakayacori vakarua na soqoni ena loma tiko ga ni dua na macawa, ra qai uqeti na vuli iVolatabu tiko kei ira na iVakadinadina mera tiko kina me rawa ni yaga vei ira na vakasosoqoni vata e veivakacegui.​—Iperiu 10:​24, 25.

Vinakati Vakatotolo

Me nanumi tale ga nira sega ni dau soqoni na iVakadinadina i Jiova kece ena Kingdom Hall e veiganiti. Na tubu totolo ni kedra iwiliwili era kacivaka tiko na Matanitu ni Kalou e vuravura e vakavuna me gadrevi kina na tarataravaki vakatotolo. E se vinakati tiko ga e vica vata na udolu na Kingdom Hall, vakauasivi na vanua e yaco tiko kina na veivakatorocaketaki.​—Aisea 54:2; 60:22.

Me kena ivakaraitaki: E 290 na ivavakoso mai na koroturaga ena Democratic Republic of Congo, ia e tini ga na Kingdom Hall. E vinakati vakatotolo ena vanua oqo e levu tale na Kingdom Hall. E levu na ivavakoso mai Angola era dau soqoni ga e tautuba ni vica ga na Kingdom Hall. Na tarataravaki vaka oqori e vinakati tale tu ga ena levu na vanua.

Me tekivu mai na 1999, sa vakayacori tiko na sasaga ena lomavata me vukea na taravaki ni Kingdom Hall ena veivanua era sega ni tu vinaka vakailavo. Era bolecakacaka o ira na tacida vakayalo era matai mera vukea na tarataravaki ena veivanua oqori. E veiuqeti dina ni umani vata na sasaga oqori kei na nodra tu vakarau o ira mai na vanua oya mera soli ira vakarawarawa. Sa bau yaga tale ga vei ira na iVakadinadina mai kea na veika e mai vakavulici vei ira. Na veika kece oqori e vukea sara ga na taravaki ni Kingdom Hall ena nodra dui vanua.

E yaga sara na nodra veivuke ni taravaki Kingdom Hall na vulagi ni vakayagataki vata kei na nodra iwalewale ni cakacaka kei na iyaya sa tu rawa vei ira na itaukei. E sega ni kena inaki oqo me rawati ga kina na levu ni Kingdom Hall eda vinakata tiko ia me buli e dua na porokaramu yaga me na vakavinakataki tiko kina na Kingdom Hall, me ganiti ira na tacida era vakayagataka tiko.​—2 Korinica 8:​14, 15.

Veiuqeti na Toso ni Cakacaka

E yaga vakacava na sasaga ni taravaki valenisokalou oqo? E kaya e dua na ripote mai Malawi ena itekivu ni 2001: “E sa bau vakatubuqoroqoro dina na veika e sa rawati ena vanua oqo. Ena rua tale na vula mai oqo, sa na tara oti kina e so tale na Kingdom Hall.” (iTaba 1 kei na 2) Ena vica na vula se qai oti ga oqo, era tara rawa kina e so na Kingdom Hall rawarawa ga na bolecakacaka mai Togo. (iTaba 3) Nodra cakacaka vakasakiti na bolecakacaka oqo e vukea na tara ni Kingdom Hall veiganiti mai Mexico, Brazil, kei na so tani tale na vanua.

Era dikeva rawa na ivavakoso ni gauna e tara kina e dua na Kingdom Hall, o ira na vakaitikotiko e kea era kila sara ga nira sa na mai tiko dei na iVakadinadina i Jiova. E levu era dau qai vakasoqoni ga kei ira na iVakadinadina ni sa dua sara na nodra vale ni sokalou vinaka. E volaitukutukutaka e dua na ivavakoso o Nafisi mai Malawi: “E solia sara ga e dua na ivakadinadina na kena sa mai dua na neimami Kingdom Hall vinaka ena gauna oqo. E tekivutaki rawarawa kina na vuli iVolatabu.”

Era dau vosota vakalevu na veivakalialiai e liu na ivavakoso o Krake mai Benin baleta ni rairai makawa tu na nodra Kingdom Hall ni vakatauvatani kei na so tani tale na lotu? (iTaba 4) Sa mai dua sara tu oqo na nodra Kingdom Hall vou qai vakatakarakarataka na sokalou dina ena sala rawarawa, ia e duatani duadua. (iTaba 5) E 34 taucoko na levu ni dautukutuku ni Matanitu ni Kalou ena ivavakoso oqo qai rauta ni 73 era dau vakasosoqonivata ena Sigatabu, ia e 651 era tiko ena soqo ni kena vakatatabutaki. E levu vei ira oqo era tamata ga ni tauni oya ra qai qoroqoro nira raica na nodra tara rawa na iVakadinadina na Kingdom Hall ena dua ga na gauna lekaleka. E vola na valenivolavola mai Zimbabwe ni railesuva na veika sa caka oti oqori: “Ni oti ga e dua na vula na tara ni Kingdom Hall dau vakaruataki na kedra iwiliwili na lako mai.”​—iTaba 6 kei na 7.

E sega ni vakabekataki ni o ira na Kingdom Hall vou oqo e vanua ni vakacegu vakayalo vei ira na lotu Vakarisito yalayala kei ira na tataleitaki. E kaya e dua na iVakadinadina mai Ukraine ni oti ga na nodra tekivu vakayagataka na Kingdom Hall vou: “Keimami marau vakalevu. Keimami raica votu sara ga e mata i keimami ni o Jiova e vukei ira tiko nona tamata.”

[Kato/iYaloyalo ena tabana e 10, 11]

Marautaki na Lomasoli

Era marautaka na iVakadinadina i Jiova nira raica ni levu sara na ka sa caka tiko me taravaki rawa kina e vuravura raraba na Kingdom Hall era gadrevi vakatotolo. Na kena sa toso cake tiko ga na kedra iwiliwili na sokaloutaki Jiova ena vica na vanua e vinakati me tara tale kina e levu na Kingdom Hall vovou. Ena yabaki vakacakacaka mada ga ni 2001, e laurai nira tautauyavu e veimacawa e rauta ni 32 na ivavakoso! Era gadreva na ivavakoso kece oqori na vanua mera sota kina ra qai sokalou.

Na taro sa qai vure oqo, ‘Ena saumi vakacava na tara ni Kingdom Hall vou oqori, vakabibi ena veivanua era sega so ni rawaka tu vakailavo?’ Na kena isau e dusia ni veitokoni kina na Kalou, lako vata na nodra lomasoli na tacida.

Ni dina ina nona vosa ni yalayala, e sovaraka o Jiova na yalona tabu vei ira nona tamata me rawa kina nira “caka vinaka, me ra vutu ni cakacaka e yaga, me ra lomasoli, me ra via veivuke.” (1 Timoci 6:​18) Na yalo tabu ni Kalou e uqeti ira na iVakadinadina i Jiova mera cuqena na vunautaki ni Matanitu ni Kalou ena veibasogana kece ga​​—ra solia nodra gauna, kaukaua, taledi, kei na so tale na ka e tu vei ira ina cakacaka vakarisito.

Na yalo ni lomasoli e tu vei ira na iVakadinadina e uqeti ira kei ira na so tale mera veivuke vakailavo ena kena vakalevutaki na tarataravaki. Me ikuri ni nodra vukea tiko na veika vakailavo ena nodra ivavakoso, era veivuke tale ga ena cau ina tarataravaki e caka tiko ena veiyasa i vuravura.

Ena ivavakoso kece era tiko kina na kato e volai tu kina vakamatata “iSolisoli me Baleta na Cakacaka e Vuravura Raraba​​—Maciu 24:14.” Era na biuta e kea na nodra cau ke ra vinakata. (2 Tui 12:9) Na cau kece, e lailai se levu, ena taleitaki ga. (Marika 12:​42-​44) E vakayagataki ena levu na sala qai vakatau mai na kena gadrevi, wili kina na tara ni Kingdom Hall. E sega ni vakayagataki mera saumi kina na vakailesilesi nira sega na vakailesilesi ni iVakadinadina i Jiova.

Sa vakayagataki tiko beka na cau ena cakacaka raraba oqo me vaka na kena inaki? Io, e vaka kina. E volatukutukutaka na valenivolavola mai Liberia​—na vanua e vakacacani tu ena veivaluvaluti​​— ni levu na iVakadinadina era sa sega tu ni cakacaka ra qai sotava na leqa vakailavo. Ena rawa vakacava ni dua nodra vanua vinaka ni sokalou na tamata i Jiova mai kea? E kaya mai na valenivolavola: “Nodra lomasoli ena cau na tacida mai na veivanua tani e saumi kina na tarataravaki. Sa bau dua dina na ituvatuva vukutaki kei na ituvatuva vakayalololoma oqori!”

Era dodoliga tale ga o ira na tacida era tu e kea, dina ga nira sega ni rawati ira. E volatukutukutaka na vanua o Sierra Leone mai Africa: “Era veitokoni na tacida e ke ra qai marautaka nodra cakacaka kei na cau cava ga era solia rawa me vukea na tara ni Kingdom Hall.”

Kena ilutua, e vakalagilagi na yaca i Jiova ena sasaga ni tarataravaki oqo. Era kaya ena marau na tacida mai Liberia: “Na tara ni vale vinaka me caka kina na sokalou ena loma ni vanua oqo e vakaraitaka vei ira na tamata ni sa na dei na sokalou dina e ke qai dokai, vaka kina na kena kilai na yaca cecere ni noda Kalou.”