Toso ni Tarataravaki me Baleta na Kingdom Hall
1 Ena soqo ni tikina a caka mai Mereke ena 1983, na kena usutu, “Duavata o Ira na Lewe ni Matanitu ni Kalou,” a vakarogoi kina ni na dua na ituvatuva vou ni cau ena vagolei vakatabakidua na ilavo e rawati kina ena taravaki kei na vakavoutaki ni Kingdom Hall e loma i Mereke kei Kenada. Sega sara ga ni tadrai na levu ni veivakalougatataki ena votu mai na itekitekivu lailai oya me yacova nikua. Eda sa mai vakila vakalevu na dina ni ka e cavuti ena Same 92:4: “Ni kemuni sa vakamarautaki au, Jiova, e na nomuni cakacaka: au na rekitaka na cakacaka ni ligamuni.”
2 Ka rekitaki dina ena gauna oqo na ka e sa rawati tiko. Sa toso totolo sara e vuravura taucoko na taravaki ni Kingdom Hall. Sega ni vakatitiqataki ni tu na sala eda vakaivotavota kina o keda kece ena itavi dokai oqo. Eda vakayacora oqori ena ilavo levu se lailai eda cautaka me vakailavotaki kina na tara ni levu tale na vale ni sokalou e veiyasa i vuravura. Era lomasoli tale ga e levu na tacida me vakayagataki ena tarataravaki oqo na nodra iyaya ni cakacaka, ra qai solia kina nodra gauna, igu, kei na kila e tu vei ira. Sa rauta me toso vinaka na noda tarataravaki ni dusimaka, tokona, qai vakalougatataka tiko o Jiova na noda sasaga ena yalovata.—Same 127:1.
3 Levu na tacida ena so tale na yasa i vuravura era muria na ituvatuva vata ga a tekivutaki taumada me baleti ira na ivavakoso e Mereke. Dau biu tu ena nodra Kingdom Hall na kato ni cau mera biuta kina na dautukutuku na nodra cau me baleta na taravaki ni Kingdom Hall. A vakarogoi mai Mereke ena Noda Cakacaka Vakaitalatala ni Matanitu ni vula o Maji, 1997 e dua na veisau ena ituvatuva oqori. E kaya: “Era sa bau tokona vinaka dina na mataveitacini na cau me baleta na taravaki ni Kingdom Hall me tekivu sara mai na gauna e tekivutaki kina na ituvatuva oqo ena 1983. Mai vakarawarawataka oqo na soli ni dinau (loan) me tara kina na Kingdom Hall. Rauta ni 2,700 na ivavakoso era sa vakadinadinataka na yaga ni ituvatuva oqo. Ke a sega oqo, ke ra sega ni rawata e levu na ivavakoso mera tara vou na nodra Kingdom Hall se vakavinakataka na kena era sa duri rawa tu. Ia sa gadrevi vakalevu ena gauna oqo me vakayagataki na ilavo e cautaki me soli vakadinau vei ira na ivavakoso era tu ena matanitu era sega ni rawati ira soti. E gadreva na iSoqosoqo me vakavinavinakataka na nomuni veitokoni tiko ga ena sasaga oqo, era vakavinavinaka tale ga na ivavakoso era sa vakila tiko na yaga ni nomuni cau.”
4 Na ka e vakarogoi oya era sureti raraba kina na mataveitacini mera vakaitavi ena kena cuqeni na cakacaka vakatotolotaki ni tara Kingdom Hall. Sa na vakarabailevutaki na inaki ni nodra cau me lai yaga tale ga vei ira na tacidra ena veivanua tale e so ena kena taravaki nodra Kingdom Hall, ia ena se rawa tiko ga vei ira na mataveitacini e Mereke mera kerekere ina tobu ni cau oya me baleta na taravaki ni nodra Kingdom Hall. Mani volai oqo ena dua na ulutaga ena Noda Cakacaka Vakaitalatala ni Matanitu ni Okosita, 1997: “E se gadrevi tiko ga mera taravaki na Kingdom Hall e veiyasa i vuravura. Era tauyavu ena yabaki vakacakacaka sa sivi e 3,288 na ivavakoso vou. Levu vei ira na ivavakoso oqori era tiko mai Aferika, Esia, Sauca Amerika kei Amerika e Loma, vaka kina na Tokalau kei Urope.”
5 Na cava e sa vakadinadinataki? E kaya na 2001 Yearbook: “Sa taravaki rawa ena ituvatuva oqo e 453 na Kingdom Hall ena 30 na vanua, e 727 era se tara tiko. E vakabibitaki me dua ga na iwalewale ni tarataravaki ena dua vanua, me vakayagataki tale ga na iyaya ni vale kei na kila ni taravale e sa matau ena vanua oya. Mai Kenya, e vakayagataki na vatu e siviraki vinaka; mai Togo, na biriki; o Cameroon e taurivaki kina na buloko, oti sa qai palasitataki. Era vuli totolo ena iwalewale ni taravale oqo na mataveitacini, sega ni dede sa rawa nira liutaka ga vakataki ira na tarataravaki ena nodra vanua.”
6 E kune ena vanua levu o Aferika na ivakadinadina matata ni o Jiova e vakalougatataka tiko na sasaga ni tarataravaki oqo. Ni o sarava na iyaloyalo oqori ni so na Kingdom Hall sa tara oti, vakasamataka mada na yaga ni tarataravaki vaka oya ena noda cakacaka na iVakadinadina i Jiova. Tolu na ka e laurai vinaka kina na kena yaga—ena noda duavata vakamataveitacini e vuravura raraba, e tarai ira na lewenivanua, e tubu na kedra iwiliwili na dau mai tiko ena soqoni ni ivavakoso. Na itoma oqo e kauta cake mai na tara Kingdom Hall mai Aferika, ia ena itabataba ni Noda Cakacaka Vakaitalatala ni Matanitu mai muri, ena qai kau cake mai kina na toso ni tarataravaki ena so tale na yasa i vuravura.
[iYaloyalo ena tabana e 3]
CENTRAL AFRICAN REPUBLIC
Bimbo, Bangui
Begoua, Bangui
[iYaloyalo ena tabana e 4]
Ukonga, Tanzania
[iYaloyalo ena tabana e 4]
Accra, Ghana
[iYaloyalo ena tabana e 4]
Salala, Liberia
[iYaloyalo ena tabana e 4]
Karoi, Zimbabwe
[iYaloyalo ena tabana e 4, 5]
Allada, Benin—Kingdom Hall makawa
Allada, Benin—Kingdom Hall vou
[iYaloyalo ena tabana e 5]
Kpeme, Togo
[iYaloyalo ena tabana e 5]
Sokodé, Togo
[iYaloyalo ena tabana e 4, 5]
Fidjrosse, Benin
[iYaloyalo ena tabana e 6]
Lyenga, Zambia—Kingdom Hall makawa
[iYaloyalo ena tabana e 6]
Lyenga, Zambia—Kingdom Hall vou
[iYaloyalo ena tabana e 6]
Kinshasa, Congo
[iYaloyalo ena tabana e 6]
Musambira, Rwanda