Muri ni Sala i Jiova ena Tauci Kina na Ka Vinaka

O SA bau taubale ena veiulunivanua? Ke vaka kina, o na rairai vakila ni vaka o tu sara ga e dela ni vuravura. E rekitaki na ceguvi ni cagi bulabula, na laurai ni vanua yawa, kei na totoka ni vanua! Sa na rairai guilecavi na leqa mai vale.

Vei ira e levu, na mataqali taubale vaka oqo e dau vakavica ga se vakavudua, ia ke o lotu Vakarisito yalayala, sa na via dede toka nomu muria na ivakarau ni bula e rawa ni vakatauvatani kei na taubaletaki ni vanua cecere. Me vaka na daunisame ni gauna makawa, o sa na rairai masuta: “Kemuni Jiova, mo ni vakatakila mai vei au na nomuni sala; ni vakavulici au e na nomuni lakolako.” (Same 25:4) O se nanuma tiko na ka o vakila ena imatai ni gauna o cabeta kina na ulunivanua ni vale i Jiova, o qai lako tiko ga ena vanua cecere? (Maika 4:2; Apakuki 3:​19) E sega ni vakabekataki ni oti ga e dua na gauna lekaleka o raica rawa ni taubaletaki ni vanua cecere ni sokalou savasava e taqomaki qai vakamarautaki iko. Sa tautauvata kei na daunisame nomu rai: “Sa kalougata na tamata era kila na rorogo vinaka: era na lako voli, Jiova, e na rarama ni matamuni.”​—Same 89:15.

So na gauna, mera na vosota na dautaubale ena ulunivanua na baba balavu e cabe se siro. Tekivu mosi na yavadra, ra qai malumalumu. O keda tale ga e rawa nida sotava na leqa nida qarava tiko na Kalou. Wale tiko ga oqo, eda na rairai oca qai tatao na noda ilakolako. Ena lesu mai vakacava vei keda na kaukaua kei na reki? Na imatai ni kalawa meda kila na cecere ni sala i Jiova.

Lawa Cecere i Jiova

Na sala i Jiova e ‘cecere cake mai na sala ni tamata,’ nona sokaloutaki e ‘vakataudeitaki me sivia na veiulunivanua qai cecere me lolovira na veiulunikoro’. (Aisea 55:9; Maika 4:1) Na vuku i Jiova e “vuku maicake.” (Jemesa 3:​17) E cecere duadua nona lawa. Kena ivakaraitaki, ena gauna a dau nodra ivalavala kina na kai Kenani mera cabora na luvedra me isoro, a solia vei ira na Isireli o Jiova e so na lawa e savasava e kilai kina na loloma. A kaya vei ira: “Ni dou sa ia na veilewai: mo kakua ni golevi koya sa dravudravua, se dokai koya na turaga levu. . . . Na kai tani . . . ena tautauvata vei kemudou kei na dua na kai nomudou, ia mo lomani koya me vaka ko sa lomani iko.”​—Vunau ni Soro 19:​15, 34.

Sivi e tinikalima na senitiuri, a solia tale o Jisu e vica na ivakaraitaki ni ‘lawa vakalevulevui’ i Jiova. (Aisea 42:21) Ena iVunau ena Ulunivanua, a kaya vei iratou nona tisaipeli: “Lomani ira na nomudou meca ka masulaki ira era vakacacani kemudou, mo dou luvena kina na Tamamudou mai lomalagi.” (Maciu 5:​44, 45, VV) E kuria: “Na ka ga dou vinakata me ra cakava vei kemudou na tamata, dou cakava tale ga vei ira, ni sa i koya oqo na Lawa kei ira na parofita.”​—Maciu 7:​12, VV.

E tara na lomadra na tamata lomavinaka na lawa cecere vaka oqo, qai uqeti ira mera vakatotomuria na Kalou era qarava. (Efeso 5:1; 1 Cesalonaika 2:13) Vakasamataka nona veisau o Paula. A ‘vakadonuya nona vakamatei’ o Sitiveni qai ‘vakacacani ira vakalevu na isoqosoqo lewenilotu.’ Ni oti ga e vica na yabaki, e karoni ira vakayalololoma na lotu Vakarisito mai Cesalonaika me vaka “na dau meimei ni sa susugi ira na luvena.” Na veivakavulici ni Kalou e veisautaki Paula mai na dau veitusaqati me dua na lotu Vakarisito dau veikauaitaki. (Cakacaka 8:1, 3, VV; 1 Cesalonaika 2:7) A vakavinavinaka ni veisautaka nona itovo na ivakavuvuli i Karisito. (1 Timoci 1:​12, 13) Ena vukei keda vakacava na vakavinavinaka vata vaka oya meda muri tiko ga kina na sala cecere ni Kalou?

Dau Vakavinavinaka, Dau Kauai

O ira na dautaubale era dau marautaka na veika era raica ena veiulunivanua. Era vulica tale ga mera kauaitaka na veika lalai e yasa ni gaunisala, vaka beka na vatu e dua tani na kena ibulibuli, senikau rairai totoka, se manumanu kila. Vakayalo, meda kauaitaka na veika vinaka​—lelevu se lalai​—eda rawata nida lako kei na Kalou. Na kauai oqo ena vakabulabulataki keda, ena kauta laivi na wawale. Eda na duavata kei na vosa i Tevita: “Mo ni vakarogoya mai kivei au na nomuni loloma e na mataka; ni’u sa vakararavi vei kemuni; mo ni vakatakila vei au na sala me’u lako kina.”​—Same 143:8.

O Mary, sa vica vata na yabaki nona muria tiko na sala i Jiova, e kaya: “Niu raica na ibulibuli i Jiova, au sega wale ga ni raica na kena vereverea se na kena totoka ia na levu tale ga ni nona loloma na Kalou. Se mani manumanu lelevu, manumanu vuka, se manumanu lalai, era ibulibuli vakatubuqoroqoro kece. E vakatale ga oqo na matata ni ka dina ni toso na veiyabaki.”

Eda na vakatitobutaka vakacava noda vakavinavinaka? Dua, noda kua ni taura vakamamada na ka e cakava vei keda o Jiova. A vola o Paula: “Masu tikoga ka [me] kua ni mudu. Dou ia na vakavinavinaka e na vuku ni ka kecega.”​—1 Cesalonaika 5:​17, 18; Same 119:62.

Na vuli vakataki keda ena vukea meda dau vakavinavinaka. O Paula e uqeti ira na lotu Vakarisito mai Kolosa: “Dou ia tiko nai valavala sa vinaka vua [Karisito Jisu], . . . mo dou uasivi cake kina ka vakavinavinaka.” (Kolosa 2:​6, 7) Na wiliki ni iVolatabu, oti me qai nanumi lesu ena vaqaqacotaka na noda vakabauta qai vakavolekataki keda vua e vakavuna na iVolatabu. Ena taqa ni veva kece e tiko kina na iyau talei ena uqeti keda meda ‘uasivi cake kina ena vakavinavinaka.’

Nida qaravi Jiova vata kei ira na tacida, ena vakarawarawataka noda ilakolako. E kaya na daunisame: “Au sa nodrai tokani ko ira kecega era sa rerevaki kemuni.” (Same 119:63) E dau gauna marautaki na soqo lelevu vakarisito se noda veimaliwai kei ira na tacida. Eda kila ni rawati ga na mataveitacini vakarisito e vuravura raraba ena vuku i Jiova kei na nona sala cecere.​—Same 144:15b.

Me ikuri ni vakavinavinaka, noda raica vakabibi na noda itavi ena vakaukauataki keda meda muria tiko ga na sala cecere i Jiova.

Raica Vakabibi Noda iTavi

Era raica vakabibi na dautaubale ena veiulunivanua na nodra itavi mera qarauna nodra ilakolako mera kua kina ni sese se ra volekata na barinivatu vakarerevaki. Nida dui lewai keda ga, e solia kina vei keda o Jiova na galala kei na lewa e veiganiti. Ia na galala vaka oqo e dodonu me salavata kei na noda raica vakabibi na noda itavi vakarisito.

Kena ivakaraitaki, e nuitaki ira nona dauveiqaravi o Jiova nira na yalomatuataka nodra itavi. E sega ni vakatura na levu ni igu kei na gauna meda vakayagataka ena cakacaka vakarisito se levu ni ka meda cautaka vakailavo se so tale na ka. Eda muria ga na vosa i Paula vei ira mai Korinica ni kaya: “Na tamata yadua me dui solia sara ga na ka e vinakata na lomana.”​—2 Korinica 9:​7, VV; Iperiu 13:​15, 16.

Na soli ka vakarisito e okati kina na kacivaki ni itukutuku vinaka vei ira tale na so. Eda vakaraitaka tale ga nida raica vakabibi na noda itavi nida cau ina cakacaka ni Matanitu ni Kalou sa vakayacori tiko e vuravura raraba. O Gerhardt, e qase ni ivavakoso, e vakamacalataka ni rau vakalevutaka vakaveiwatini nodrau cau ni oti nodrau lako ena soqo ni tikina ena Tokalau kei Urope. E kaya: “Keirau raica ni lailai na ka vakayago era taukena na tacida e kea; ia era marautaka vakalevu noda ivola vakaivolatabu, keirau nanuma kina me keirau tokoni ira vakalevu na tacida era gadreva tu na veivuke ena so tale na vanua.”

Dau Vosota

E gadrevi na kaukaua ni taubaletaki na veiulunivanua. O ira na taubale kina era dau vakaukaua yago ena gauna cava ga e rawa, levu era taubale vakaleleka vakavica mera vakarau kina ena lako balavu. E vakatura vaka kina o Paula meda ogaoga tiko ga ena cakacaka vakalou meda kaukaua tiko kina vakayalo. Ira era diva mera ‘cakava na ivalavala e kilikili kei Jiova’ ra qai ‘kaukaua,’ e kaya o Paula, mera “vakavuana tiko e na cakacaka vinaka kecega.”​—Kolosa 1:​10, 11.

E dau vakarawarawataka nona vosota tiko ga na dautaubale ena veiulunivanua ke tiko e so na nona isausau. E yaga vakacava? Ena uqeti koya me toso tiko ga ke dei na nona vakasama ena dua na ka, me vaka beka e dua na ulunivanua yawa. Ni yaco tale ga ena so na vanua sa vakatakilakilataka tu ena nona mape, sa rawa ni kila na yawa ni vanua e lakova me yacova nona isausau. Ni rai lesu ena vanua sa sivia, e tuburi koya na marau.

E vakatale ga oya na inuinui ni bula tawamudu, ena taqomaki qai tosoi keda. (Roma 12:12) Ena gauna oqo, nida lako ena sala i Jiova, eda marau nida tekia da qai sauva na isausau vakarisito. Sa qai wacava noda marau nida rai lesu ena vica vata na yabaki ni veiqaravi ena yalodina se dikeva na veisau ni noda itovo!​—Same 16:11.

Me balavu na vanua e taubaletaki qai levu na icegu e vo, e vinakati vei koya na dautaubale me dua tu ga na ivakarau ni lako. Ena tosoi keda tale tiko ga meda sauva noda isausau ke sa noda ivakarau meda dau tiko ena soqoni kece da qai vakaitavi vakalevu ena cakacaka vakavunau. E vakauqeti ira kina nona itokani vakarisito o Paula: “Me da muria tiko nai vakarau ko ya.”​—Filipai 3:​16.

Io, sega ni o keda ga eda lako ena sala i Jiova. A vola o Paula: “Me da sa vakasamataka tale ga na sala me da dui veivakauqeti kina e na loloma kei na cakacaka vinaka.” (Iperiu 10:​24, VV) Na veimaliwai vinaka vakayalo ena vakarawarawataka noda salavata tiko ga kei ira na tacida vakayalo.​—Vosa Vakaibalebale 13:20.

Kena ilutua, qai bibi duadua, meda kua ni guilecava na kaukaua e solia o Jiova. O ira era vakararavi ena kaukaua i Jiova era na “vakaikuritaki tikoga na nodra kaukauwa.” (Same 84:​5, 7) So na gauna eda na sotava na ituvaki dredre, ia ena veivuke i Jiova eda na vorata rawa kina.