“Dou Lako Mai Vei Au, . . . Ka’u na Vakacegui Kemudou”

“Me Da Caka Vinaka Vei Ira na Tamata Kecega”

NA VUNAUTAKI kei na vakavulici ni itukutuku vinaka me baleta na Matanitu ni Kalou e liu duadua ena cakacaka i Jisu. (Marika 1:14; Luke 8:1) Nira vakatotomuria na ivakaraitaki i Karisito na nona imuri, era raica me ka e liu duadua ena nodra bula na kena vakavulici na itukutuku mai na iVolatabu me baleta na Matanitu ni Kalou. (Luke 6:40) E dua na ka marautaki vei ira na iVakadinadina i Jiova nira raica na lomavakacegu vei ira na ciqoma na itukutuku ni Matanitu ni Kalou​—me vaka ga vei ira ena gauna a tiko kina e vuravura o Jisu.​—Maciu 11:​28-30.

Me ikuri ni nona vakavulica na Vosa ni Kalou, a cakava tale o Jisu e so na cakacaka vinaka, me vaka nodra vakabulai na tauvimate kei na nodra vakani na viakana. (Maciu 14:​14-21) Era vaka tale ga oqori na iVakadinadina i Jiova ena nodra vukei ira na gadreva dina na veivuke me ikuri ni nodra veivakavulici ena iVolatabu. Ni iVolatabu e vakarautaki ira na lotu Vakarisito e “nai valavala vinaka kecega” qai uqeti ira “mera caka vinaka vei ira na tamata kecega.”​—2 Timoci 3:​16, 17; Kalatia 6:10.

“Era Basika Mai na Tacida”

A yavalati Taiwan e dua na uneune levu ena Sepiteba 1999. Ni oti e vica na vula, a yaco tale ga mai Venezuela e dua na leqa tubukoso, e vakacaca vakalevu na bi ni uca kei na sisi ni qele. Oqo e bau dua na vakacaca levu ena itukutuku kei Venezuela. Wale tiko ga oqo, a vakacaca vakalevu na waluvu ena vanua o Mozambique. Ena tolu na vanua oqori, era vuki totolo na iVakadinadina i Jiova nira kauta yani vei ira na vakaleqai e levu na kakana, wainigunu, wainimate, isulu, valelaca kei na iyaya ni vakasaqa. E so era mai veivuke ra qai kenadau ena veika vakavuniwai, era tara e dua na valeniwai mera qaravi kina na mavoa. Era bole mera tara tale ga e so na vale vovou me nodra na vakacacani nodra itikotiko.

E tarai ira na vakaleqai na nodra a vukei ena gauna sara ga oya. E kaya o Malyori e dua a vakacacana na nona vale na sisi ni qele mai Venezuela: “Na gauna keimami a sotava kina na leqa, era basika mai na mataveitacini.” Nira tara oti na bolecakacaka e dua na nodratou vale vou na matavuvale i Malyori, a tomana: “Keimami sega ni vakamacalataka rawa na neimami vakavinavinakataki Jiova!” Na gauna era sa taura kina na ki ni nodra vale vovou mai Mozambique, era lagata vakadomoilevu kece e dua na sere, “Jiova na Noda i Drodro.”a

Nodra vukei na vakaleqai tu e vakacegui ira tale ga na bolecakacaka. E kaya o Marcelo, e nasi, a veiqaravi tiko ena nodra keba na isenivalu e Mozambique: “Au vakila na marau niu vakayagataki meu qaravi ira na mataveitacini era sotava vakalevu na rarawa.” E kaya o Huang, e dua na bolecakacaka mai Taiwan: “E ka marautaki dina na vakaitavi ena veisoliyaki ni kakana kei na valelaca vei ira na tacida era leqa tu. E vaqaqacotaka na noda vakabauta.”

Yaga na Porokaramu ni Cakacaka ni Veivukei

Na cakacaka ni veivukei e vakacegui ira tale ga vakayalo na tini vakacaca na udolu na kaivesu e vuravura taucoko. E rawa vakacava oqo? Ena vica na yabaki wale tiko ga oqo, era vakarautaka na iVakadinadina i Jiova na ivola vakaivolatabu vei ira e sivia na 30,000 na kaivesu ena rauta na 4,000 na valeniveivesu e Mereke wale ga. Me kena ikuri, ke vakatarai era na sikovi ira na kaivesu na iVakadinadina mera vakayaco vuli iVolatabu kei na soqoni vakarisito. E yaga beka oqo vei ira na kaivesu?

E so na kaivesu era vuli iVolatabu tiko, era sa wasea yani na ivakavuvuli totoka ena Vosa ni Kalou vei ira tale na vo ni kaivesu. Kena itinitini, era sa tiko na ilawalawa era sokaloutaki Jiova ena so na valeniveivesu e vuravura. E kaya e dua na kaivesu mai Oregon, e Mereke ena yabaki 2001: “E bulabula na neitou ilawalawa. Era le 7 na dautukutuku ra qai vakayaco vuli iVolatabu vei ira e 38 tale. E sivia na 25 era tiko ena vunau soqovi levu kei na vulici ni Vale ni Vakatawa, qai 39 era tiko ena iVakananumi [ni mate i Jisu]. E le 3 tale eratou sa vakarau papitaiso!”

Marautaki Qai Yaga Tale Ga

Era raica rawa na ovisa ni valeniveivesu na yaga ni porokaramu ni veivukei oqo. Na ka era kurabuitaka vakalevu, oya na dede ni kena yaga na porokaramu ni veivakavulici oqo. E kaya e dua na itukutuku: “Ena loma ni tini na yabaki na kena cici tiko na porokaramu oqo, e sega ni dua na kaivesu e papitaiso ena valeniveivesu me iVakadinadina i Jiova e bau lesu tale mai ni sa suka​—me kena veibasai ga vei ira na le 50 ina 60 na pasede era lesu tale mai era lewe ni ilawalawa tale e so.” Na kena tarai koya na nodra dau veivukei na iVakadinadina i Jiova, a tukuna ena nona ivola ina itikotiko liu ni iVakadinadina i Jiova e dua na italatala ni valeniveivesu mai Idaho: “Dina niu sega ni duavata kei na nomuni ivakavuvuli, ia e vakatubuqoroqoro vei au na nomuni isoqosoqo.”

E yaga tale ga vei ira na dau veivukei na nodra vakavulici na kaivesu. E kaya e dua ni oti na nodra soqoni e so na ilala kaivesu, qai imatai tale ga ni gauna mera lagasere kina: “E veivakayaloqaqataki nira lagata e lewe 28 na tagane na sere ni vakavinavinaka vei Jiova. Era lagasere tale ga vakadomoilevu! E dua na ka lavotaki nida tiko ena gauna oya! “ E kaya e dua a sikova na valeniveivesu mai Arizona: “E sa ka ni veivakalougatataki dina na vakaitavi ena cakacaka bibi oqo!”

O ira na iVakadinadina era bolecakacaka oqo mai na veiyasa i vuravura era duavata kei Jisu ni a kaya: “A ka ni veivakalougatataki vakalevu me soli ka, ka vakalailai ga me taura na ka.” (Cakacaka 20:35) Era vakadinadinataka tale ga ni vakacegui ira dina na nodra muria na ivakasala vakaivolatabu mera caka vinaka vei ira na tamata kece ga.​—Vosa Vakaibalebale 11:25.

[iVakamacala e ra]

[iYaloyalo ena tabana e 8]

Venezuela

[iYaloyalo ena tabana e 8]

Taiwan

[iYaloyalo ena tabana e 8]

Mozambique