Kato ni Taro

◼ Na cava meda qarauna nida vunau vei ir na kaivesu?

Rauta nira lewe walunamilioni na kaivesu ena vuravura raraba, ia e so vei ira era taleitaka na itukutuku vinaka. (1 Tim. 2:4) E dua na valenivolavola ni tabana e taura ena veivula e rauta ni 1,400 na ivola mai vei ira na kaivesu kei na nodra lewe ni vuvale, era dau kerea na ivola vakaivolatabu, se me dua e sikovi ira. Ia na cava meda qarauna nida vunau vei ira na kaivesu? Dina ga ni vuqa vei ira era tataleitaki, ia e laurai ena so na ituvaki ni so era dau lawaki, era vakayagataki ira ga na tamata ni Kalou me yaco kina na lomadra. Ena ituvaki vaka oqo, eda na dikeva kina e so na ka meda qarauna kece nida vunau vei ira na kaivesu.

E vuqa era dau vunau vei ira na kaivesu nira volavola. Era vakaroti sara ga na tacida yalewa mera kua ni volavola vei ira na kaivesu tagane, dina ga ke nodra inaki mera vukei ira vakayalo. Oqo me nodra itavi ga na tacida tagane matua. E rawa nira lesi na tacida yalewa matua mera volavola vei ira na kaivesu yalewa era taleitaka na ka dina mai na iVolatabu. Me kua ni vakau vei ira na kaivesu na ilavo se na iloloma kevaka era kerea mai.

Kevaka e tataleitaki e dua na kaivesu, me soli na yacana ena ivavakoso e qarava na yalava e tiko kina na valeniveivesu. Era na kila na tacida tagane matua ena ivavakoso oya na ka mera cakava. Ke sega ni kilai na ivavakoso e qarava na vanua e tiko kina na valeniveivesu oya, me qai vakau na kena itukutuku ina valenivolavola ni tabana.

E sega ni cala ke ra veivosaki vata na tacida era lesi kei ira na kaivesu me rawa nira vuli e levu na kaivesu ena duavata ga na gauna. Me kua ni dua tale na soqo e caka e valeniveivesu mera veimaliwai kina vakalevu na dautukutuku kei ira na kaivesu. Kuria oya, e sega ni ka vakavuku vei ira na dautukutuku mera veisiko tu vakaveitalia i valeniveivesu, mera lai veimaliwai vakavoleka kei ira na kaivesu.

Meda “vuku [gona] me vaka na gata, ka yalovinaka me vaka na ruve” nida wasea na itukutuku vinaka vei ira na kaivesu.—Maciu 10:16.