Vakaikuritaka ena Nomu Vosota na Dau Lotu

“Vakaikuritaka na nomudou vakabauta . . . e na vosota; kei na vosota e na daulotu.”​—2 PITA 1:​5, 6.

1, 2. (a) Nida raica e dua na gone, na cava eda namaka? (b) E bibi vakacava na nona tubu vakayalo e dua?

E SEGA wale ga ni bibi vua na gone me tubucake vakayago, e bibi tale ga me matua mai ena nona vakasama kei na nona rai. Ni toso na gauna, sa na oti yani na vagonegonea, sa na tubucake me dua na tamata uabula. A dusia na tikina oqo na yapositolo o Paula ni a vola: “Ni’u a gone, au a dauvosa me vaka na gone, au a kila ka me vaka na gone; au a dauvakanananu me vaka na gone; ia ni’u sa yaco me tamata bula, au sa biuta tani na ka vagonegonea.”​—1 Korinica 13:11.

² E vakabibitaka tiko e ke o Paula e dua na ka me baleta na nona bula vakayalo e dua na tamata. Me kua ni gonegone tu ga vakayalo na lotu Vakarisito, me tubucake ga me ‘tamata bula ena vuku.’ (1 Korinica 14:20) Me saga me tadolova “nai vakarau ni tamata dina, era sa sinai sara kei Karisito.” Ena qai sega kina ni “vagonegonea tiko, ka veitosoyaki ka veikauyaki e na cagi kecega ni vakavuvuli.”​—Efeso 4:​13, 14.

3, 4. (a) Na cava meda cakava meda tamata bula kina vakayalo? (b) Na itovo vakalou cava soti meda vakaitovotaka, ia e vakacava na kedra bibi?

³ E rawa vakacava meda tamata bula vakayalo? Na tubu vakayago e sega ni lewai, ena lako ga mai, ia na tubu vakayalo ena vinakati kina na sasaga. Ena tekivu ena kena vulici na ka dina mai na Vosa ni Kalou kei na kena bulataki na ka e vulici. (Iperiu 5:​14; 2 Pita 1:3) Nida vakayacora oqori, sa na qai rawa ni vakaitovotaki na itovo vakalou. Me vaka ga na noda tubucake vakayago, nira dau tubutubu vata ga na dui tikiniyagoda, e vaka tale ga oqori na noda tubucake ena noda dui itovo vakayalo. A vola na yapositolo o Pita: “Dou gumatua vakalevu sara kina, mo dou vakaikuritaka na nomudou vakabauta e nai valavala vinaka; kei nai valavala vinaka e na vuku; kei na vuku e nai valavala malua; kei nai valavala malua e na vosota; kei na vosota e na daulotu; kei na daulotu e na veilomani vakaveitacini; kei na veilomani vakaveitacini e na yalololoma.”​—2 Pita 1:​5-7.

⁴ Na itovo kece e vola o Pita era bibi, e sega ni dua me sega ni yaga. E kaya tale: “Kevaka sa tu ga e na lomamudou na veika oqo, ka sa tubu cake me levu, era sa uqeti kemudou mo dou kakua ni vucesa se tawa vua e na nomudou kila na noda Turaga ko Jisu Karisito.” (2 Pita 1:8) Meda raica mada oqo na kena bibi me vakaikuritaki ena noda dau vosota na dau lotu.

Gadrevi na Dau Vosota

5. Na cava e bibi kina meda dau vosota?

⁵ O rau ruarua o Pita kei Paula erau biuti rau vata na dau lotu kei na dau vosota. (1 Timoci 6:​11) Na nona vosota e dua e sega ni baleta wale ga na nona tudei tu ga ni sotava na veika dredre. E vauci kina na nona yalomalua, yaloqaqa, kei na nona vakanuinui dei, e dina ni sotava na veika dredre, veivakatovolei, veitemaki, se veivakacacani. Eda namaka meda vakacacani nida kila tiko ni o ira “era vinakata me ra bula e na bula va-Karisito era na vakacacani.” (2 Timoci 3:​12, VV) E yaga na vosota meda vakavotuya kina nida lomani Jiova dina, meda vakaitovotaka rawa tale ga na itovo era gadrevi meda vakabulai kina. (Roma 5:​3-5; 2 Timoci 4:​7, 8; Jemesa 1:​3, 4, 12) Ke da sega ni vosota, eda na sega ni rawata na bula tawamudu.​—Roma 2:​6, 7; Iperiu 10:36.

6. Na cava na ibalebale ni noda vosota me yacova na iotioti?

⁶ Se mani vinaka vakacava na itekitekivu ni noda muria na ka dina, na ka ga e bibi duadua meda vosota. A kaya o Jisu: “Ko koya ena vosota me yacova nai vakataotioti, ena vakabulai ko koya.” (Maciu 24:13) Io, meda vosota tiko ga me yacova na iotioti, se mani iotioti ni noda bula ena gauna oqo, se iotioti ni vuravura ca e tu nikua. Se mani iotioti cava vei rau oqori e yacovi keda, meda yalodina tiko ga vua na Kalou. Ia ke da sega ni vakaikuritaka ena noda dau vosota na dau lotu, ena sega ni rawa nida vakamarautaki Jiova, eda na sega tale ga ni rawata na bula tawamudu. Ia na cava sara mada na dau lotu?

iBalebale ni Dau Lotu

7. Na cava na dau lotu, ia e uqeti keda oqori meda cakava na cava?

⁷ Na ibalebale levu ga ni vosa dau lotu ena iVolatabu oya na nona doka na Kalou o Jiova e dua na tamata, na nona qaravi koya kei na nona sokaloutaki koya baleta ni via tutaka ena yalodina na veiliutaki cecere ni Kalou. Ke da via vakayacora oqo vei Jiova, e bibi meda kilai koya mada e liu kei na nona ivalavala. Me gu na yaloda meda veikilai voleka kei na Kalou. Ke vaka oqo na gu ni yaloda, eda na qai taleitaki koya mai vu ni lomada, qai vakavotui oqori ena noda ivalavala kei na ivakarau ni noda bula. Me noda gagadre meda ucui Jiova ena kena levu eda rawata​—meda vakatotomuria na nona ivalavala da qai bulataka na nona itovo. (Efeso 5:1) Io, na tamata e dau lotu ena vinakata sara ga me vakamarautaka na Kalou ena ka kece e cakava.​—1 Korinica 10:31.

8. Erau lakolako vata vakacava na dau lotu kei na sokalou vakatabakidua?

⁸ Ke da via dau lotu dina, e bibi meda sokaloutaki Jiova vakatabakidua, me vakaliuci duadua ga o koya ena lomada. Ni a buli keda, sa dodonu ga meda sokaloutaki koya vakatabakidua. (Vakarua 4:​24; Aisea 42:8) Ia e sega ni vakasaurarataki keda o Jiova meda sokaloutaki koya. E vinakata meda sokaloutaki koya mai vu ni lomada. E tosoi keda na noda loloma vua meda veisautaka na noda bula, ia na loloma oqori e vu mai na kilaka dina. Oti, eda yalataki keda vakatabakidua vua qai noda sasaga meda dina tiko ga ina noda yalayala.

Vaqaqacotaka Nomu Veiwekani kei na Kalou

9, 10. Eda na vaqaqacotaka tiko ga vakacava na noda veiwekani kei na Kalou?

⁹ Nida sa vakaraitaka oti ena papitaiso na noda yalayala vua na Kalou, e se vinakati tiko ga meda vaqaqacotaka na noda veiwekani kei koya. Na noda vinakata oqori kei na noda vinakata meda qaravi Jiova tiko ga ena yalodina ena tosoi keda meda vulica tiko ga, meda vakasamataka tale ga vakatitobu na nona Vosa. Ni cakacaka ena noda vakasama kei na lomada na yalo tabu i Jiova, sa na qai dei ga na noda lomani koya. Ena ka bibi duadua ena noda bula na noda veiwekani kei koya. Eda na okati Jiova me noda iTokani vinaka duadua, da qai via vakamarautaki koya e veigauna kece. (1 Joni 5:3) Eda na marautaka ga vakalevu na noda veiwekani kei na Kalou, da qai lomavakacegu ni tuberi keda tiko o koya qai dau vakadodonutaki keda vakayalololoma ke gadrevi oya.​—Vakarua 8:5.

¹⁰ Ena rawa ni luluqa na noda veiwekani talei kei Jiova ke da sega ni saga e veigauna meda vaqaqacotaka. Ke mani yaco vaka kina, e sega ni bale vua na Kalou oqori ni “sa sega ni yawa ko koya vei keda yadua.” (Cakacaka 17:27) E ka marautaki dina ni sega ni vakadredretaka o Jiova meda torovi koya! (1 Joni 5:​14, 15) Ia e tiko na ka meda cakava meda na vakavolekati keda tiko ga vei Jiova. E vukei keda o koya ena tikina oqo ena nona vakarautaka vei keda na isolisoli kece e gadrevi meda na qacoya da qai tomana tiko ga kina na noda dau lotu se veiqaravi vua. (Jemesa 4:8) Na cava meda cakava meda vakayagataka vinaka kina na isolisoli vakayalololoma kece oqo?

Mo Kaukaua Tiko ga Vakayalo

11. Na cava e so na sala eda vakaraitaka kina na noda dau lotu?

¹¹ Kevaka eda lomana na Kalou mai vu ni lomada, ena tosoi keda oqori meda vakavotuya na dei ni noda lotu se veiqaravi vua me salavata kei na ivakasala i Paula e kaya: “Gumatua sara mo vakaraitaki iko mo vinaka e na mata ni Kalou, a tamata daucakacaka sa sega e dua na ka me madua kina, mo wasea vakadodonu nai vakavuvuli dina.” (2 Timoci 2:​15) Eda na rawata ga oqori ke da dau vuli iVolatabu e veigauna, lakova wasoma na soqoni, vunau vakawasoma. Eda na volekati Jiova tale ga ke da dau “masu tikoga ka kua ni mudu.” (1 Cesalonaika 5:​17) Oqori era ivakadinadina totoka ni noda dau lotu. Ke da vakasavuliga kina, eda na tauvimate vakayalo, eda na rawai rawarawa tale ga ena ivadi ca i Setani.​—1 Pita 5:8.

12. Eda na vosota rawa vakacava na veika dredre?

¹² Ke da gu meda kaukaua tiko ga vakayalo, ena vukei keda oqori meda tudei ke sotavi na veika dredre. De dua eda na vakatovolei ena so na ka mosimosi sara. E sega ni rawarawa me vosoti na yalodredre, na veitusaqati, kei na veivakacacani ke vu tiko oqori mai vei ira ga na lewe ni noda vuvale, wekada, se o ira eda tiko veitikivi. De na votu mai vakamalua vaqaseqase ena noda vanua ni cakacaka se mai koronivuli e so na ituvaki e vakatovolei kina na noda yalodina vakarisito. E rawa ni vakamalumalumutaki keda vakayago na yalolailai, tauvimate, kei na lomabibi. Ena dredre kina meda tudei ni vakatovolei na noda vakabauta. Ia eda na rawa ni vosota na veika dredre cava ga eda sotava ke da gumatua e ‘na ivalavala sa kilikili, ena ivalavala savasava, kei na dau lotu, nida sa waraka ka dau gadreva sara na kena yaco mai na siga i Jiova.’ (2 Pita 3:​11, 12) Eda na reki tale ga nida sotava na ka dredre, nida nuitaka tu na veivakalougatataki ni Kalou.​—Vosa Vakaibalebale 10:22.

13. Na cava meda cakava meda dei tiko ga ena noda dau lotu?

¹³ E dina ni dau sagai ira na tamata era guta na sokalou dina o Setani, ia e sega ni ka meda rere kina oqori. Baleta? Ni o Jiova e kila “me vakabulai ira era sa daulotu mai na veivakatovolei.” (2 Pita 2:9) Eda na vosota rawa ga na veika dredre da qai vakabulai kevaka eda “biuta nai valavala sa sega ni vakalotu, kei na gagadre ca vakavuravura, me da ia nai valavala yalomatua, ka yalododonu, ka vakalotu, e vuravura oqo.” (Taito 2:​12) Nida lotu Vakarisito, meda qaqarauni de dua e so na noda malumalumu vakayago se ivalavala vakayago e rawa ni vakaluluqataka na noda veika vakayalo qai vakaleqa sara. Meda raica mada e so na ka e dau veivakaleqai.

Qarauna na Veika e Rawa ni Vakaleqa na Noda Dau Lotu

14. Na cava meda nanuma tiko ke da mani temaki ena domodomoiyau?

¹⁴ Levu era coriti ena domodomoiyau. De dua eda na vakaisini keda nida nanuma ni “sa ka ni yau na lotu.” O koya gona, eda na rawa ni douvaka meda vakayagataka vakatawadodonu na nodra dau lomasoli na tacida vakayalo. (1 Timoci 6:5) De da lai nanuma ni donu vinaka meda kere dinau vua e dua na lotu Vakarisito e rawati koya e dina ga nida sa kila tiko nida na sega ni rawa ni sauma lesu vua. (Same 37:21) Ia na dau lotu, sega ni kena kumuni na iyau vakayago e “yalataki kina na ka ni bula oqo, kei na ka ni bula talega ena muri mai.” (1 Timoci 4:8) Ni “sega na ka eda sa kauta mai ki vuravura, a sa dina sara ni sa sega na ka eda na kauta tani rawa,” oqori na vuna meda guta kina na “lotu kei na lomavinaka,” da qai dau lomavinaka ena vuku ni “kakana kei nai sulu.”​—1 Timoci 6:​6-​11.

15. Na cava meda cakava ke sa vaka me lai vakabibitaki na guti ni marau qai lailai kina na gauna ena lotu se na veika vakayalo?

¹⁵ Na guti ni marau e dau lailai kina na gauna me vakabibitaki na lotu se na veika vakayalo. De dua ena vinakati sara ga meda veisautaki keda totolo ena ka oqo? Sa macala ni yaga toka na vakaukaua yago kei na qarai ni marau. Ia e sega wale ni dua na ka oqori ni vakatauvatani kei na bula tawamudu. (1 Joni 2:​25) E levu nikua era “lomana vakalevu na marau a ra na lomani koya na Kalou vakalailai; sa nodra ga na lotu vakarairai, ka sega vei ira na kena dina,” ia e bibi meda goletani mai vei ira vaka oqo. (2 Timoci 3:​4, 5) O ira era vakabibitaka na lotu era sa “binia tu me nodra na yavu e na yaga e na gauna e muri mai, me ra taura kina na bula sai koya na bula dina.”​—1 Timoci 6:​19.

16. Na gagadre ca cava soti e rawa ni vakalatilati vei ira e so ena nodra muria na veika dodonu e vinakata vei ira na Kalou, ia ena vakamalumalumutaki vakacava na gagadre ca vaka oya?

¹⁶ Na yaqona ni valagi se yaqona ni viti, wainimate gaga, ivalavala tawakilikili, kei na gaganotaki ni ka tawakilikili e rawa ni vakaleqa na noda dau lotu se bula vakayalo. Ke da soli keda tu yani ina veika ca oqo, ena dredre meda muria dei na veika dodonu e vinakata vei keda na Kalou. (1 Korinica 6:​9, 10; 2 Korinica 7:1) O Paula mada ga a vinakati me valuta tiko ga na malumalumu vakayago. (Roma 7:​21-​25) E vinakati na igulevu me cavuraki laivi kina mai lomada na gaganotaki ni ka e tawakilikili. Kena imatai, me vu sara ga mai lomada na gagadre meda guta tiko ga na itovo e savasava. E kaya vei keda o Paula: “Mo dou qai vakamatea na veitikimudou vakavuravura, a dauyalewa, nai valavala tawa-savasava, na garogaro ca, na dodomo ca, kei na kocokoco, o koya na dauqarava na kalou lasu.” (Kolosa 3:5) E dodonu me vu dina mai yaloda na gagadre meda vakamatea na gagadre ca vaka oya, meda muduka se tinia vakadua mai na lomada. Ke da masu vagumatua meda kerea na veivuke ni Kalou, eda na vakaukauataki meda cata na gagano tawakilikili, ena qai guta na yaloda na ka e dodonu kei na dau lotu ena vuravura ca oqo.

17. Meda raica vakacava na veivakadodonutaki?

¹⁷ Ke da yalolailai, ena dredre meda vosota, ena tatavutuvutu tale ga na noda dau lotu se noda itosotoso vakayalo. Levu vei ira na tamata i Jiova era sa dau yalolailai. (Tiko Voli mai na Lekutu 11:​11-​15; Esera 4:4; Jona 4:3) Qai veivakaleqai sara vakalevu na yalolailai ke lako vata kei na yaloca, baleta beka nida levataka e dua na ka, se da vosataki vakaukaua se vakadodonutaki. Ia nida vunauci se vakadodonutaki, oqori e ivakadinadina ni nona kauai kei na nona veinanumi na Kalou. (Iperiu 12:​5-7, 10, 11) Nida vakadodonutaki, meda kua ni nanuma nida sa totogitaki wale tiko ga, ia meda raica oqori me ka eda vakavulici kina meda muria na ivalavala dodonu. Ke da yalomalumalumu, eda na marautaka da qai ciqoma na ivakasala e tau, nida kila ni “sa kena sala ni bula nai vakavuvuli ni vunau.” (Vosa Vakaibalebale 6:​23) Oqori ena vukei keda meda toso vinaka ena noda dau lotu se na noda bula vakayalo.

18. Na cava e noda itavi ke vakacudrui keda e dua na ka?

¹⁸ Rawa ni vakaleqa na noda dau lotu na noda nanuma nira raici keda vakatani e so se ra vakacudrui keda beka. Ena rawa ni vakavunuiqawaqawa oqori se vakavuna vei ira e so mera tawasei ira mai vei ira na tacidra vakayalo, na ka e sega ni vukutaki. (Vosa Vakaibalebale 18:1) Ia e vinaka me nanumi tiko ni noda lomacataka e so se sevaki ira lo voli e rawa ni vakaleqa na noda veiwekani kei Jiova. (Vunau ni Soro 19:18) Ni o koya ‘e sega ni lomana na wekana e raica tiko, ena lomana vakaevei na Kalou sa sega ni raica?’ (1 Joni 4:​20) Ena nona iVunau ena Ulunivanua, a kaya kina o Jisu ni bibi me wali totolo na veileqaleqati. A kaya vei ira na rogoci koya: “Kevaka ko sa kauta na nomui madrali ki nai cabocabo-ni-soro, a sa nanuma maikina sa dua na ka sa beitaki iko kina na wekamu; biuta tu na nomui madrali e na mata ni cabocabo-ni-soro, ka mo lako, mo drau veivinakati mada eliu kei na wekamu, mo qai lako mai ka vakacabora na nomui madrali.” (Maciu 5:​23, 24) Na kere veivosoti e dau ivakamalumu ni vosa kei na itovo mosimosi. Ni leqa noda veiwekani kei na dua tale, e rawa nida veivakameautaki ena noda kere veivosoti da qai vakadinata nida a cala ga o keda. So tale na ivakasala a tauca o Jisu ena ivalavala meda walia kina na leqa tale e so e basika. (Maciu 18:​15-​17) Eda na marautaka dina ke tini vinaka na noda sasaga meda walia na veileqaleqati!​—Roma 12:18; Efeso 4:​26, 27.

Muria na iVakaraitaki i Jisu

19. Na cava e rui bibi kina meda vakatotomuria na ivakaraitaki i Jisu?

¹⁹ Sa macala tu ga nida na sotava na veika dredre, ia e sega ni kena ibalebale me sa mai vakataotaka oqori na noda kakavaka yani na bula tawamudu. Meda kua ni guilecava ni o Jiova e dau veivueti ena gauna ni leqa. Nida sa “biuta laivi tu na ka bibi kece” da qai “ciciva tikoga na cere sa tu e matada,” meda “vakaraici Jisu, o koya sa vakatekivuna ena sauma talega na noda vakabauta.” (Iperiu 12:​1-3) Noda dikeva voleka na ivakaraitaki i Jisu kei na noda saga meda vakatotomuri koya ena noda vosa kei na ivalavala ena vukei keda meda qaravi koya na Kalou da qai vakarabailevutaka tiko ga na noda veiqaravi oqori.

20. Na cava na itinitini vinaka ni vosota kei na dau lotu?

²⁰ Erau lakolako vata na vosota kei na dau lotu me qai vakadeitaki kina na noda vakabulai. Nida vakaitovotaka na rua na ivalavala talei oqori, eda na vukei meda yalodina tiko ga ena noda veiqaravi tabu vua na Kalou. Ke da mani sotava sara na veika dredre, eda na marau ga nida vakila na yalololoma i Jiova kei na nona veivakalougatataki baleta ga nida a vosota tiko da qai dei tiko ga ena noda dau lotu se na noda veiqaravi vua. (Jemesa 5:​11) Kena ikuri, o Jisu sara ga e tukuna vei keda na vosa ni veivakauqeti oqo: “Dou na maroroya na yalomudou ni dou sa dauvosota.”​—Luke 21:19.

O na Sauma Vakacava?

• Na cava e bibi kina na vosota?

• Vakamacalataka na dau lotu kei na ivalavala e vakavotui kina.

• Na cava meda cakava meda vakavolekati keda kina vua na Kalou da qai vaqaqacotaka tiko ga na veiwekani oqori?

• Na cava e so na ka e rawa ni vakaleqa na noda veiqaravi vua na Kalou, ia eda na qarauni keda vakacava mai na veika oqori?

[iYaloyalo ena tabana e 12]

Levu na sala e rawa ni vakavotui kina na dau lotu

[iYaloyalo ena tabana e 14]

Qarauna na veika e rawa ni vakaleqa na nomu dau lotu se na nomu sokalou