Na iTovo Meda Saga Meda Vakasaqara

“Mo vakasaqara na yalododonu, na lotu, na vakabauta, na loloma, na vosota, kei na yalomalua.”​—1 TIM. 6:​11, NW.

1. Vakamacalataka mada na ibalebale ni vosa “vakasaqara” kei na so tale na vosa veiwekani.

NA CAVA o dau vakasamataka ni o rogoca na vosa “vakasaqara,” kei na so tale na vosa veiwekani me vaka na “muria,” “ciciva,” kei na “cicimuria”? De dua o na rairai vakasamataka na gauna i Mosese, oya na nodra ‘cicimuri’ ira na Isireli na mataivalu ni Ijipita, ra qai tini leqa koso ga ena Wasa Damudamu. (Lako 14:23) Se o na rairai nanuma na ituvaki rerevaki ena yaco vua e dua e Isireli makawa ke vakacalaka nona vakamatea e dua tale. Ena vinakati me dro totolo sara ina dua vei ira na ono na koro ni drodro. Ke sega, ena “vakasaqarai koya sa ia na veivakamatei o koya e nona itavi me taroga nona dra, ena cudru katakata, ena vauci koya, qai mokuta mate.”​—Vkru. 19:​6, Tanakh.

2. (a) Na icovi cava e sureti ira tu kina na lotu vaKarisito lumuti na Kalou mera sasagataka? (b) Na inuinui cava e solia tu o Jiova vei keda na lotu vaKarisito nikua?

² Ena yasana adua, vakasamataka mada na ivakaraitaki vakaivolatabu qori kei na rai ni yapositolo o Paula: “Ka’u sa ciciva na cere [se “icovi,” NW], me’u tauca na cere [se “icovi,” NW] sa kacivi au kina maicake na Kalou e na vuku i Karisito Jisu.” (Fpai. 3:​14) E vakaraitaka na iVolatabu nira na vakaicocovitaki ena bula i lomalagi o ira na 144,000 na lotu vaKarisito lumuti, okati tale ga ena iwiliwili qori o Paula. Era na tomani Jisu ena nona liutaka na vuravura me 1,000 na yabaki. Talei dina na icovi era sureti kina mera ciciva! Ia eda sureti e levu na lotu vaKarisito nikua meda sasagataka e duatani na isausau. E yalololoma o Jiova me solia vei keda na inuinui ni bula tawamudu ena parataisi e vuravura, da qai sega tale ni tauvimate nida sa uasivi. Qori sara ga na ka talei rau a vakayalia o Atama kei Ivi.​—Vkta. 7:​4, 9; 21:​1-4.

3. Na cava eda na cakava meda vakaraitaka noda vakavinavinakataka na iloloma soli wale ni Kalou?

³ Na nona vakadonui me bula tawamudu e dua e kawa ivalavala ca ena sega ni vakatau ena nona sasaga me caka dodonu. (Aisea 64:6) Ena qai rawa ga ni bula tawamudu ke vakabauta na isolisoli yalololoma ni bula e vakarautaka o Jiova, ena nona vakayagataki Jisu Karisito. Na cava eda na cakava meda vakaraitaka noda vakavinavinakataka na iloloma soli wale ni Kalou? Dua oya meda talairawarawa ina ivakaro qo: “Mo vakasaqara na yalododonu, na lotu, na vakabauta, na loloma, na vosota, kei na yalomalua.” (1 Tim. 6:​11, NW) De dua, noda vulica na veika me baleta na itovo ra vakamacalataki tiko qori ena uqeti keda meda bulataka “vakavinaka cake sara.”​—1 Ces. 4:​1, VV.

“Vakasaqara na Yalododonu”

4. Eda kila vakacava ni bibi na vakasaqarai ni “yalododonu”? Cava meda cakava taumada?

⁴ A vola na yapositolo o Paula ena rua nona ivola vei Timoci e vica na itovo e bibi mera vakasaqarai, ia e dau vakamacalataka ga e liu na “yalododonu.” (1 Tim. 6:​11; 2 Tim. 2:​22) Eda uqeti ena levu tale na tikinivolatabu meda vakasaqara na ivalavala dodonu. (Vkai. 15:9; 21:21; Aisea 51:1) Ke da via vakasaqara qori ena bibi meda cakava taumada e dua na ka, oya meda ‘kila na Kalou dina duadua ga, kei Jisu Karisito o koya a talai mai.’ (Joni 17:3) Na vakasaqarai ni yalododonu ena uqeta e dua me veivutunitaka nona ivalavala ca, qai “saumaki mai” me cakava na loma ni Kalou.​—Caka. 3:​19.

5. Na cava meda cakava me vakadonui keda kina na Kalou, meda qai donu tiko ga noda ivalavala vua?

⁵ E vica vata na milioni era vakasaqara dina tiko na yalododonu, ra qai yalataka nodra bula vei Jiova, ra papitaiso tale ga. Ke o dua na lotu vaKarisito papitaiso, o kila beka ni na laurai sara ga ena nomu bula ni o vakasaqara tiko na yalododonu, qai dodonu ga mo vakaraitaka? Dua na ka e okati ena nomu vakasaqara tiko na yalododonu oya na nomu kila ‘na vinaka kei na ca’ mai na iVolatabu, ni o vakatulewataka e so na ka bibi e vauca nomu bula. (Wilika Iperiu 5:​14.) Kena ivakaraitaki, ke o dua na lotu vaKarisito dawai, o sa yacova tale ga na yabaki ni bula e veiganiti kina mo vakawati, o sa vakadeitaka beka e lomamu mo kua ni veivinakati kei na dua e sega ni lotu vaKarisito papitaiso? O na vakadeitaka ga mo cakava qori ke o dau vakasaqara na yalododonu.​—1 Kor. 7:​39.

6. Na cava e okati ena noda vakasaqara na yalododonu?

⁶ Ke dua e yalododonu, ena sega ni vakadonui koya ga. Ena sega tale ga ni “yalododonu vakalevu” se vakasivia. (Dauv. 7:​16) E veivakaroti o Jisu me kua ni vakarairai wale ga noda yalododonu. (Maciu 6:1) Noda vakasaqara na yalododonu e okati sara ga kina na lomada ni gadrevi me vakadodonutaki se cavuraka laivi na vakanananu ca, rai cala, inaki ca, kei na gagadre ca. Ke da cakava tiko ga qori, ena dredre sara meda vakayacora na ivalavala ca bibi. (Wilika Vosa Vakaibalebale 4:​23; vakatauvatana Jemesa 1:​14, 15.) Kena ilutua, ena vakadonui keda o Jiova, qai tuberi keda ena noda vakasaqara e so tale na itovo vaKarisito.

“Vakasaqara . . . na Lotu”

7. Na cava e kilai kina o koya e “lotu”?

⁷ Ke dua e lotutaka se qarava e dua na ka, ena solibula qai yalodina kina. E kaya e dua na ivolavosa ni iVolatabu ni vosa vaKirisi e vakadewataki me “lotu,” e vakaibalebaletaki vei ira “na rerevaka dina na Kalou, era qai raica qori me ka vinaka, ka bibi, mareqeti tale ga.” Era sega ni vakaraitaka vakalevu na Isireli nira tamata lotu va qori, qai laurai qo ena nodra talaidredre ena gauna sa vakabulai ira oti kina mai Ijipita na Kalou.

8. (a) Na taro cava a vinakati me saumi ena gauna a valavala ca kina o Atama? (b) A qai vakatakilai vakacava na ibalebale ni “ka vuni” qori?

⁸ Ni oti e vica na udolu na yabaki na nona valavala ca o Atama, a se sega ga ni saumi na taro qo: “E rawa beka vua e dua na tamata me uasivi se taucoko ena lotu?” Ena gauna kece ya, a sega ni rawa vua e dua me uasivi se taucoko ena lotu. Ia ena nona gauna lokuci, a qai vakatakila o Jiova na ibalebale ni “ka vuni.” E tokitaka na bula i luvena duabau ga mai lomalagi ina katonigone i Meri, mani sucu kina e dua na tamata uasivi. Ena gauna a bula kina e vuravura, kei na nona mate vakaloloma, a vakaraitaka sara ga o Jisu na ka e gadrevi ena noda solibula kei na noda yalodina vua na Kalou. Laurai ena nona qaqanimasu na nona qaravi Tamana vakalomalagi dauloloma mai vu ni lomana. (Maciu 11:25; Joni 12:​27, 28) O koya gona, a uqeti Paula o Jiova me cavuta na “ka ni Kalou” ena nona vakamacalataka tiko na ivakaraitaki uasivi i Jisu.​—Wilika 1 Timoci 3:​16.

9. Eda na vakasaqara vakacava na lotu?

⁹ Eda sega ni rawa ni uasivi se taucoko ena lotu, nida tamata ivalavala ca. Ia eda rawa ni vakasaqara se saga meda bulataka na itovo qori. Ena gadrevi kina meda saga ena noda vinaka kece meda muria na ivakaraitaki i Karisito. (1 Pita 2:​21) Eda na sega kina ni vakataki ira na dauveivakaisini e “nodra ga na lotu vakarairai, ka sega vei ira na kena dina.” (2 Tim. 3:5) Sega ni kena ibalebale qo meda kua ni kauaitaka na keda irairai e taudaku. Dodonu ga meda kauaitaka. Kena ivakaraitaki, nida digia noda isulu ni vakamau se nida lai volivoli, e bibi me salavata kei na noda dau tukuna tiko ni da “sa lotu.” (1 Tim. 2:​9, 10) Noda dau kauaitaka na ivakatagedegede dodonu ni Kalou ena noda bula ena veisiga, ena yaga ina noda vakasaqara na lotu.

“Vakasaqara . . . na Vakabauta”

10. Ena qaqaco tiko ga vakacava noda vakabauta?

¹⁰ Wilika Roma 10:17. Ke da vinakata meda vakabauta, oti me qai qaqaco tiko ga e bibi meda dau vakasamataka vakatitobu na ka dina ena Vosa ni Kalou. E vakarautaka gona na “dauveiqaravi yalodina ka vuku” e levu sara na ivola vinaka. Tolu na ivola vakasakiti na Vuli Vua na Qasenivuli Levu kei Na Tamata Rogo Duadua a Bau Bula kei na “Come Be My Follower.” E kedratou inaki meda kilai Karisito vakavinaka, meda rawa ni vakatotomuria nona ivakaraitaki. (Maciu 24:​45-​47, VV) Na ilawalawa qo e vakarautaka tale ga na soqoni, siga ni soqo lavotaki, soqo ni tabacakacaka, kei na soqo ni tikina. Levu ga na soqo qori e vakabibitaki kina na ‘vosa me baleti Karisito.’ Vakacava, mo vakasamataka e so na ka o rawa ni cakava me yaga kina vakalevu vei iko na veika e vakarautaki qori, ena nomu “vakasamataka sara vakabibi” na isolisoli ni Kalou?​—Iper. 2:​1, VV.

11. E bibi vakacava na masu kei na talairawarawa ena noda vakasaqara na vakabauta?

¹¹ E yaga tale ga na masu ina noda sasaga me qaqaco tiko ga noda vakabauta. Ratou a kerei Jisu na nona imuri ena dua na gauna: “Ni vakalevutaka na neitou vakabauta.” Meda masuta na Kalou ena yalomalumalumu me cakava tale ga qori ina noda vakabauta. (Luke 17:5) Ke da vinakata me levu noda vakabauta, e dodonu meda masuta na yalo tabu ni Kalou baleta ni okati ena “vua ni Yalo Tabu” na itovo qo na vakabauta. (Kala. 5:​22) Ena qaqaco tale ga na noda vakabauta ke da dau talairawarawa ina ivakaro ni Kalou. Kena ivakaraitaki, de dua eda na saga meda vakalevutaka noda vakaitavi ena cakacaka vakavunau. Ena vakamarautaki keda sara ga vakalevu qori. Nida vakasamataka na yaga ni noda “vakasaqara taumada na matanitu ni Kalou, kei na nona yalododonu,” ena qai levu ga noda vakabauta.​—Maciu 6:​33.

“Vakasaqara . . . na Loloma”

12, 13. (a) Na cava na ivakaro vou i Jisu? (b) Cava e rua na sala bibi eda na vakasaqara kina na loloma vaKarisito?

¹² Wilika 1 Timoci 5:​1, 2. A vakasalataki ira na lotu vaKarisito o Paula me baleta na nodra veilomani. E okati ena noda qaravi Kalou na noda talairawarawa ina ivakaro vou i Jisu meda “veilomani” me vaka ga nona lomani keda. (Joni 13:34) A vakamatatataka na yapositolo o Joni: “Ko koya sa tu vua nai yau ni vuravura oqo, a sa raica na wekana ni sa dravudravua, a sa sogota na lomana vua, sa tiko vakacava e na lomana na loloma vua na Kalou?” (1 Joni 3:​17) O rawa beka ni vakasamataka e so na ituvaki o a vakaraitaka kina na loloma?

¹³ Eda na vakasaqara tale ga na loloma ke da dau veivosoti, da sega ni lomacataki ira na tacida, se da sevaki ira lo voli nira vakacudrui keda. (Wilika 1 Joni 4:​20.) Ia eda na via muria ga na ivakasala vakalou qo: “Dou veivosoti vakai kemudou, ka kakua ni veicudruvi, kevaka sa dua na ka sa rarawa kina e dua; me vaka sa sega ni cudruvi kemudou . . . [“o Jiova” NW], mo dou vaka talega kina.” (Kolo. 3:​13) E tiko beka e dua ena ivavakoso e dodonu mo vosoti koya, me vaka eda dusimaki tiko kina qori? O na vosoti koya beka?

“Vakasaqara . . . na Vosota”

14. Na cava eda vulica vei ira na tacida ena ivavakoso e Filatelifia?

¹⁴ E ka ni sasaga dina meda rawata e dua na isausau ena dua na gauna lekaleka, ia ena sasaga levu sara ke dredre noda rawata, se gadrevi kina e so tale na gauna. E macala ga ni na gadrevi na vosota, ke da via bula tawamudu. “Ni ko sa vakabauta na noqu vosa mo vosota ga, ka’u na maroroi iko talega e na gauna ni dauveivakatovolei,” a kaya o Jisu vei ira na tacida ena ivavakoso e Filatelifia. (Vkta. 3:​10.) A vakavulica dina o Jisu na bibi ni vosota, ni yaga dina na itovo qori ena noda dei tiko ga ni yaco e so na ituvaki dredre, se nida vakatovolei. Ena imatai ni senitiuri, a vakasakiti dina na nodra vosota na tacida ena ivavakoso e Filatelifia ni vakatovolei vakavica na nodra vakabauta. O koya gona, a yalataka o Jisu e dua na ivukevuke ena gauna ena yaco kina na veivakatovolei e levu cake.​—Luke 16:10.

15. Na cava a vakatavulica o Jisu me baleta na vosota?

¹⁵ Kila vinaka tu o Jisu nira na cati na nona imuri. Ena cati ira qori na wekadra vakayago kei na lewe i vuravura. Oya na vuna e uqeti ira kina ena rua na gauna: “Ko koya ena vosota me yacova nai vakataotioti, ena vakabulai.” (Maciu 10:22; 24:13) Vakaraitaka tale ga o Jisu na sala mera vakaukauataki kina me rawa nira vosota tiko ga. Ena dua nona vosa vakatautauvata, a kaya nira vaka na qele vatuvatu o ira na “rogoca ka vakabauta na vosa [ni Kalou] e na reki,” ra qai bale tale ni vakatovolei nodra vakabauta. Ia, a vakatauvatani ira nona imuri yalodina ina qele vinaka baleta nira “taura matua sara” na Vosa ni Kalou, ra qai “vuataka mai na vuadra e na nodra dau vosota.”​—Luke 8:​13, 15, VV.

16. Na isolisoli vakayalololoma cava e uqeta e vica vata na milioni mera vosota?

¹⁶ Oni kila beka mai na vosa ya na ka ena vakavuna meda vosota tiko ga? E dodonu meda “taura matua sara” na Vosa ni Kalou, me tu ga ena lomada kei na noda vakasama. E vakarawarawataka na noda cakava qori na New World Translation of the Holy Scriptures, baleta ni ivakadewa donu, e vakayagataki kina na vosa e kilai rawarawa, e vakadewataki tale ga ena levu na vosa. Ke da dau vakasamataka vakatitobu ena veisiga na Vosa ni Kalou, ena vakaukauataki keda meda vuavuaivinaka tiko ga ‘ena noda dau vosota.’​—Same 1:​1, 2.

“Vakasaqara . . . na Yalomalua” Kei na Veiyaloni

17. (a) Na cava e bibi kina na “yalomalua”? (b) E vakaraitaka vakacava o Jisu ni yalomalua?

¹⁷ Eda sega ni dau taleitaka meda beitaki ena dua na ka eda sega ni tukuna se cakava. E dau vakalevu ga mera cudru e levu ra qai cakitaka na veibeitaki va qori. Ia ena vinaka cake meda dau “yalomalua” ga! (Wilika Vosa Vakaibalebale 15:1.) Sa bau ka ni sasaga toka noda saga meda yalomalua tiko ga nida beitaki vakailasu. E ivakaraitaki vinaka ena tikina qo o Jisu Karisito. “Ni sa vakasewasewani ko koya, sa sega tale ni ia na veivakasewasewani; ni sa vakararawataki tiko, sa sega ni vosavakacudrucudru; sa laivi koya ga vua sa lewa vakadodonu.” (1 Pita 2:​23) Sega ni kena ibalebale ya ni na vinaka vakaoti me vakataki Jisu na ka eda cakava ena tikina qo. Ia vakacava, eda se rawa ni vakavinakataka tiko ga noda vakaraitaka na yalomalua?

18. (a) E dau yaga vakacava na yalomalua? (b) Na itovo cava tale eda uqeti meda vakasaqara?

¹⁸ Me vakataki Jisu ga, meda dau ‘tu vakarau meda tukuna’ na veika baleta noda vakabauta, da qai cakava qori “ena yalomalumalumu [“yalomalua,” NW] kei na rere.” (1 Pita 3:​15) Ke da dau yalomalua, ena sega ni tini ena veiba se veileti ni duidui na noda rai se vakasama kei ira na tacida vakayalo, se o ira eda vunau kina ena cakacaka vakaitalatala. (2 Tim. 2:​24, 25) E bibi na yalomalua meda veiyaloni kina. Kena irairai ni qori na vuna e vola kina o Paula ena nona ikarua ni ivola vei Timoci, ni dua vei ira na itovo e bibi meda vakasaqara na “veiyaloni.” (2 Tim. 2:​22, NW; vakatauvatana 1 Timoci 6:​11, NW.) O koya gona, e uqeti keda tale ga na iVolatabu meda vakasaqara na “veivinakati” se veiyaloni.​—Same 34:​14, Iper. 12:14.

19. Ni o vulica oti na veika me baleta na vitu na itovo vaKarisito, cava e nomu inakinaki mo vakasaqara? Na vuna?

¹⁹ Eda sa vulica mai qo e vitu na itovo e bibi meda vakasaqara: na yalododonu, na lotu, vakabauta, loloma, vosota, yalomalua, kei na veiyaloni. E dau vakilai sara ga ena ivavakoso yadua na kalougata ena gauna era saga kina na lewena mera bulataka vakalevu na itovo talei qori! Ena dokai kina o Jiova, ena rawa tale ga vua me moici keda me vakalagilagi kina o koya.

Tikina Me Nanumi

• Na cava e okati ena vakasaqarai ni yalododonu kei na lotu?

• Na cava ena uqeti keda meda vakasaqara na vakabautakei na vosota?

• Me laurai vakacava na loloma ena noda ivalavala vei ira e so tale?

• Na cava e bibi kina meda vakasaqara na yalomalua kei na veiyaloni?

[iYaloyalo ena tabana e 12]

A vakarota o Jisu me kua ni vakarairai tu ga noda yalododonu

[iYaloyalo ena tabana e 13]

Eda na vakasaqara na vakabauta ke da vakasamataka vakatitobu na ka dina ena Vosa ni Kalou

[iYaloyalo ena tabana e 15]

Meda vakasaqara na loloma kei na yalomalua