Uqeti ena “Cakacaka Veivakurabuitaki ni Kalou”

“Eda sa rogoca kece ni ra vosataka e na noda dui vosa na cakacaka veivakurabuitaki ni Kalou.”​—CAKACAKA 2:​11, VV.

1, 2. Na ka veivakurabuitaki cava e yaco e Jerusalemi ena Penitiko 33 S.K.?

ENA dua na mataka ni vulaitubutubu ena yabaki 33 S.K., a yaco e dua na ka veivakurabuitaki vei ira na ilawalawa tagane kei na yalewa tisaipeli i Jisu Karisito era tiko ena dua na vale vakaitaukei e Jerusalemi. “Sa qai lako vakasauri mai lomalagi e dua na rorogo, e vaka na cagi vakacevaruru kaukauwa, ka vakasinaita na vale taucoko era tiko kina. Sa qai rairai vei ira na ka e vaka na yameyame ni buka waqa. . . .  A ra sa vakasinaiti kece ga e na Yalo Tabu, ka sa vakatekivu me ra vosataka na veivosa tani e so.”​—Cakacaka 2:​2-4, 15, VV.

² Era tabili yani i vale oya e dua na ilawalawa levu, okati kina o ira na Jiu era sucu mai vanuatani, “era tamata lotu” era mai marautaka e Jerusalemi na soqo ni Penitiko. Era kurabui nira rogoci ira na tisaipeli nira vakamacalataka “na cakacaka veivakurabuitaki ni Kalou” ena nodra vosa. E rawa vakacava oya nira kai Kalili?​—Cakacaka 2:​5-8, 11, VV.

3. Na itukutuku cava e vakaraitaka na yapositolo o Pita vei ira e dua na ilawalawa ena soqo ni Penitiko?

³ Na yapositolo o Pita e dua vei ira na kai Kalili oya. E vakaraitaka o koya nira labati Jisu Karisito e so na tamata tawayalododonu ena vica na macawa sa oti. Ia, sa vakaturi Luvena mai na mate na Kalou. Sa rairai tale ga o Jisu vei ira e levu na tisaipeli, okati kina o Pita kei ira na tiko vata kaya. E se qai oti ga e tini na siga na nona cabe i lomalagi o Jisu. O koya sara ga e sovaraka mai na yalo tabu vei ira na nona tisaipeli. E bau yaga beka oqo vei ira na mai marautaka na soqo ni Penitiko? Io, e vaka kina. Na mate nei Jisu e vakarawarawataka na vosoti ni nodra ivalavala ca, era na “rawata na yalo tabu mei solisoli” kevaka era cakacakataka na nodra vakabauti koya. (Cakacaka 2:​22-​24, 32, 33, 38) Na cava era cakava na vakarorogo tu mai oya nira sa rogoca “na cakacaka veivakurabuitaki ni Kalou”? E vukei keda vakacava na veika e yaco oya meda vakasamataka na noda cakacaka vei Jiova?

Uqeti Mera Cakacaka!

4. Na parofisai cava i Joeli e vakayacori ena siga ni Penitiko 33 S.K.?

⁴ Ni sobuti ira oti ga na yalo tabu era sega tale ni wawa na tisaipeli nira sa lai kacivaka na itukutuku ni veivakabulai, era tekivu sara ga vei ira na ilawalawa era tabili yani ena mataka oya. Nodra vunau oya e vakayacori kina e dua na parofisai veivakurabuitaki a vola ena walu na senitiuri sa oti o Joeli, na luve i Pecueli: “Ka’u na sovaraka na Yaloqu kivei ira na tamata kecega, ka ra na parofisai kina ko ira na nomudou gonetagane kei ira na nomudou goneyalewa, ko ira na nomudou qase era na tadrataka eso na tadra, ko ira na nomudou cauravou era na raica eso na raivotu: vei ira talega na tamata kei na vada ka’u na sovaraka na Yaloqu . . . ena qai yaco mai emuri na siga i Jiova, e levu ka rerevaki.”​—Joeli 1:1; 2:​28, 29, 31; Cakacaka 2:​17, 18, 20.

5. Era parofisai vakacava na lotu Vakarisito ena imatai ni senitiuri? (Raica na ivakamacala e ra.)

⁵ E kena ibalebale beka oqo ni na vakayagataki ira e vica vata na parofita tagane kei na yalewa me vakataki Tevita, Joeli, kei Tepora, mera parofisaitaka na veika e se bera ni yaco? Sega. Era na parofisai ga na ‘gonetagane kei na goneyalewa, tamata kei na vada’ lotu Vakarisito ni uqeti ira na yalo i Jiova mera kacivaka na “cakacaka veivakurabuitaki ni Kalou” sa cakava oti kei na kena e se bera ni cakava. Era na vosa ena vuku i koya sa Cecere Sara.a E tarai ira vakacava na vakarorogo tiko na ka era rogoca?​—Iperiu 1:​1, 2.

6. Na cava era cakava e levu vei ira na rogoca na ivakamacala i Pita?

⁶ E uqeti ira na vakarorogo tiko na veika e vakamacalataka o Pita. Era “vakabauta na nona vosa” ra qai “papitaisotaki: ka sa kenai kuri vei ira sa lotu e na siga ko ya e lewe tolu beka na udolu na tamata.” (Cakacaka 2:​41) Era sa bau kila toka na iVolatabu baleta nira Jiu se era tavuki mera lotu Vakajiu. Ni qai kuria oqori na veika era rogoca vei Pita, sa rawa sara ga mera papitaisotaki ‘ena yaca i Tamada, kei na Luvena, kei na Yalo Tabu.’ (Maciu 28:19) Nira papitaiso oti era “soli ira vakatabakidua ki na nodratou veivakatavulici na i apositolo.” Era tekivu wasea tale ga na nodra vakabauta vou vei ira tale e so. Io, “era dau tiko e na lomavata e na Valenisoro e na veisiga. . . . A ra sa vakavinavinaka tiko vua na Kalou, ka ra sa taleitaki mai vei ira na tamata kece ga.” E “vakuria tiko ga na Turaga [o Jiova] ki na nodra i soqosoqo na tamata era sa vakabulai tiko mai.” (Cakacaka 2:​42, 46, 47, VV) E tauyavu na ivavakoso vovou ena veivanua era vakaitikotiko kina o ira na vakabauta vou oqo. E sega ni vakabekataki ni dua na vu ni nodra tubu nira gumatuataka na vunautaki ni ‘itukutuku vinaka’ nira suka ina nodra vanua.​—Kolosa 1:​23.

Kaukaua na Vosa ni Kalou

7. (a) Na cava e dreti ira na veimataqali tamata ina isoqosoqo i Jiova ena gauna oqo? (b) Na cava o raica me baleta na kena tubu na cakacaka e veiyasa i vuravura kei na vanua o tiko kina? (Raica na ivakamacala e ra.)

⁷ Vakacava o ira na vinakata mera qarava na Kalou ena gauna oqo? E vinakati tale ga mera vulica vinaka na Vosa ni Kalou. Era na kila kina ni o Jiova e Kalou “yalololoma ka daulomasoli, sa vosovoso vakadede, ka levu na nona yalovinaka kei na dina.” (Lako Yani 34:6; Cakacaka 13:48) Era na kila tale ga ni a vakarautaka o Jiova na kedra ivoli ni vakayagataki Jisu Karisito, ni nona dra e savata na nodra ivalavala ca kece ga. (1 Joni 1:7) Era na kila tale ga ni nakita na Kalou mera “tu cake tale mai na mate ko ira na yalododonu kei ira na sega ni yalododonu.” (Cakacaka 24:​15, VV) Nira lomani koya dina na ivurevure ni “cakacaka veivakurabuitaki,” era na gumatua ni vunautaka na veika dina era vulica. Era na qai yalataki ira vua na Kalou, ra papitaiso mera nona dauveiqaravi nira ‘tubu cake tiko ga ena nodra kila na Kalou.’b​—Kolosa 1:​10b; 2 Korinica 5:​14.

8-10. (a) E vakaraitaka vakacava na “kaukauwa” ni Vosa ni Kalou na ka e sotava e dua na marama lotu Vakarisito? (b) Na cava o vulica kina me baleta nona veitaratara o Jiova kei ira nona dauveiqaravi? (Lako Yani 4:​12)

⁸ E sega ni vovodea na kila era rawata mai na iVolatabu na dauveiqaravi ni Kalou, baleta ni veika era vulica oya e uqeta na lomadra, e veisautaka na itovo ni nodra rai, ra qai bulataka tale ga. (Iperiu 4:​12) Me kena ivakaraitaki, a dauveiqaravi tiko ena vale ni malumalumu o Camille. E dau qaravi Martha tale ga, e dua na iVakadinadina i Jiova. Ni tauvi Martha tiko na mate ni mona, a vinakati me dau yadravi tiko ga. E vinakati me tukuni vua me kana, se me tiloma mada ga na kena. Ia, eda na raica oqo e dua na ka e sega ni taqusi rawa ena vakasama i Martha.

⁹ Dua na siga e raica o Martha ni tagi toka o Camille baleta ni sotava tiko e dua na leqa. E mokoti Camille o Martha qai sureti koya me rau vulica na iVolatabu. Ia ena rawa beka me veivakavulici ena iVolatabu o Martha? Io, e rawa! Dina ga ni tauvi koya tiko na mate ni guiguileca, ia e se sega ni guilecava o Martha na Kalou e dauveivakurabuitaki, se me sa guilecava na veika dina e vulica ena iVolatabu. Ni rau dau vuli, e kerei Camille o Martha me wilika na parakaravu, wilika na tikinivolatabu e sega ni lavetaki, wilika na taro, me qai sauma na taro. Dina ni tauvimate tiko o Martha, ia e toso tiko na nodrau vuli me yacova ni sa levu na ka e kila mai na iVolatabu o Camille. E kila o Martha ni gadrevi me veimaliwai o Camille kei ira era gadreva mera qarava na Kalou. E mani solia o Martha e dua na nona vinivo kei na ivava vei Camille me rawa kina ni rakorako na nona isulusulu ena imatai ni gauna e lako kina ina soqoni ena Kingdom Hall.

¹⁰ E lauti Camille na nona veikauaitaki, na ivakaraitaki, kei na vakabauta nei Martha. E kila o Camille ni bibi dina na veika e vakavulici koya tiko kina o Martha mai na iVolatabu, baleta ni dau guilecava na veika e so o koya, ia e sega ni guilecava na veika a vulica mai na iVolatabu. Ni sa lesi ina dua tale na vale ni malumalumu o Camille, e vakila ni sa dodonu me toso vakayalo. E sega ni bera na nona sa basika ina Kingdom Hall ni daramaka na vinivo kei na ivava e solia o Martha, e qai kerea me dua e vakavulici koya ena iVolatabu. E toso vinaka vakayalo o Camille me yacova ni sa papitaiso.

Muria na iVakatagedegede i Jiova

11. Me ikuri ni noda gugumatua ena cakacaka vakavunau, eda vakaraitaka vakacava ni uqeti keda na itukutuku ni Matanitu ni Kalou?

¹¹ Ena gauna oqo sa sivia na ononamilioni na iVakadinadina i Jiova era vakataki Martha kei Camille, era vunautaka tiko “na i Tukutuku Vinaka ni matanitu” ena veiyasa i vuravura. (Maciu 24:​14, VV; 28:​19, 20) Me vakataki ira na lotu Vakarisito ena imatai ni senitiuri, e uqeti ira tale ga na “cakacaka veivakurabuitaki ni Kalou.” Era kalougata nira bau vakayacani ena yaca i Jiova, e solia tale ga na yalona tabu vei ira. Oya na vuna era saga kina mera vakaitovotaki ira ena ‘ivalavala e kilikili kei na Turaga,’ o Jiova nira bulataka na nona ivalavala. Oqo e okati kina na nodra doka na ivakatagedegede ni Kalou me baleta na isulusulu kei na sasauni.​—Kolosa 1:​10a; Taito 2:​10.

12. Na ivakasala cava me baleta na isulusulu kei na sasauni e volai ena 1 Timoci 2:​9, 10?

¹² Io, e tiko na ivakatagedegede i Jiova me baleta na keda irairai. A vola na yapositolo o Paula e so na ivakatagedegede oqo. “Me ra vakaisulutaki ira vakavinaka e na i sulu matau ka rakorako na yalewa. Me kakua ni tali na drau ni uludra se tokara na i ukuuku koula, mataniciva se i sulu i sau dredre. Me ra vakaitovotaki ira e na vei i tovo vinaka kece ga me vaka sa kilikili kei ira na yalewa era kaya ni ra sa lotu.”c Na cava eda vulica ena vosa oya?​—1 Timoci 2:​9, 10, VV.

13. (a) Na cava na ibalebale ni ‘vakaisulu vakavinaka’? (b) Na cava e sega ni dredre kina na ivakatagedegede i Jiova?

¹³ E tukuna o Paula ni dodonu mera “vakaisulutaki ira vakavinaka” na lotu Vakarisito. Me kua ni yakusurasura se sakuca na kedra irairai. E rawa kece vei keda, kevaka mada ga eda dravudravua, meda rawata na ivakatagedegede oya kevaka ga e maqosa qai savasava na noda isulu. Me kena ivakaraitaki, ena dua na vanua mai Sauca Amerika era dau taubaletaka e vica vata na kilomita na veikauloa ra qai vodo bavelo ena vica vata na aua na iVakadinadina i Jiova nira lai tiko ena soqo ni tikina e veiyabaki. So era lutu i wai, se tacori qai kadresu na nodra isulu e veikau. Nira qai dau yaco yani ina vanua e caka kina na soqo sa dravuseka na kedra irairai. Era qai dau lai cula ibulukau, botana, savata, qai yayanitaka tale na nodra isulu era daramaka ena gauna ni soqo. Era vinakata me maqosa na nodra isulusulu baleta nira doka na veisureti i Jiova nira lai kana ena nona teveli.

14. (a) Na cava na ibalebale ni ‘vakaisulu matau qai rakorako’? (b) Na cava na ibalebale ni sulumaka na isulu e ‘kilikili kei ira sa lotu’?

¹⁴ E tukuna tale ga o Paula meda sulumaka “na i sulu matau ka rakorako.” E kena ibalebale oqo me kua ni rairai vakatani, rairai duatani, veivakatagarogaroi, se vakaraitaka na tikiniyagoda eda dau ubia na isulu eda sulumaka. E dodonu tale ga me ‘kilikili kei ira sa lotu’ na noda isulusulu. E sega li ni vakavure vakasama oqo? Io, e sega ni dodonu me kilikili ga na noda isulusulu ena gauna ni soqoni da qai sega ni kauaitaka na ka eda sulumaka ena veigauna tale e so. E dodonu me rakorako tu ga na keda irairai, baleta nida lotu Vakarisito da qai italatala tiko ena loma ni 24 na aua e veisiga. E macala nida na rairai vakaisuai nida cakava e so na cakacaka se veisau noda isulusulu nida lai vuli e koronivuli. Ia me veiganiti qai rakorako tu ga na noda isulu. Kevaka eda vakaisulu me vaka nida tamata ni Kalou, ena rawa meda vunau ena veigauna kece ga baleta nida na sega ni maduataka na keda irairai.​—1 Pita 3:​15.

“Kakua ni Lomani Vuravura”

15, 16. (a) Na cava e bibi kina meda kua ni muria na ivakatagedegede ni vuravura me baleta na isulusulu kei na sasauni? (1 Joni 5:​19) (b) Na cava meda kua ni muria kina na ivukivuki vovou ni isulusulu kei na sasauni?

¹⁵ E idusidusi tale ga ina noda isulusulu kei na noda sasauni na ivakasala ena 1 Joni 2:​15, 16. Eda wilika kina: “Dou kakua ni lomani vuravura, se na veika sa vakavuravura. Kevaka sa lomani vuravura e dua, sa sega e na lomana na loloma vua na Tamada. Na ka kecega sa tu e vuravura, na gagadre ca ni yago, na gagadre ca ni mata, kei na dokadokai keda e na ka ni bula oqo, sa sega ni tubu maivei Tamada, mai vuravura ga.”

¹⁶ E veiganiti dina na ivakasala oya! Ena gauna ni veimurimuri oqo, meda kua ni laivi vuravura me lewa na noda isulusulu. Sa torosobu tiko ga na ivakatagedegede ni isulusulu kei na sasauni ena loma ni vica na yabaki sa oti. Na nodra isulusulu mada ga na daunibisinisi kei ira na vakailesilesi e sega ni dau ivakatagedegede ni nodra isulusulu na lotu Vakarisito. Oqo e dua tale na vuna meda ‘kua ni vakatauvatani keda kina kei ira era sa vakavuravura’ kevaka eda muria na ivakatagedegede ni Kalou meda qai rawa kina ni muria “nai vakavuvuli ni Kalou na nodai vakabula e na ka kecega.”​—Roma 12:2; Taito 2:​10.

17. (a) Na cava meda vakasamataka nida digitaka na iculacula kei na isulu eda via volia? (b) Na cava me kauaitaka kina na ulunivuvale na kedra irairai na lewenivuvale?

¹⁷ Ni bera nida volia e dua na isulu, e vinaka meda tarogi keda mada: ‘Na cava au taleitaka kina na iculacula ni isulu oqo? E baleta beka ni vaka na iculacula ni nona isulu na dauveivakamarautaki au taleitaka? E nodra isulusulu beka na lewe ni ilala era dauveivorati?’ Meda raica vinaka tale ga na isulu. Ke vinivo se liku, e vakacava na kena balavu, kei na kena iculacula? E veiganiti beka qai rakorako, se e kabita na yago, veivakatagarogaroi, se sakubeta? Tarogi iko, ‘Ena veivakatarabetaki beka niu sulumaka na isulu oqo?’ (2 Korinica 6:​3, 4) Na cava meda kauaitaka kina oya? Ni kaya na iVolatabu: “Ni ko Karisito sara tale mada ga e a sega ni cakava na ka ga e vinaka vua.” (Roma 15:​3, VV) Mera kauaitaka na ulunivuvale na kedra irairai na lewenivuvale. Nira doka na Kalou lagilagi era qarava tiko, mera kua ni tuvakasuka na ulunivuvale mera vakadodonutaki ira vakayalololoma na lewenivuvale ena gauna e vinakati kina.​—Jemesa 3:​13.

18. Na cava ena uqeti keda meda qarauna sara kina vakavinaka na noda isulusulu kei na sasauni?

¹⁸ Na itukutuku eda kauta voli e vu mai vei Jiova, o koya e vatuka ni dodonu kei na veika e rakorako. (Aisea 6:3) E uqeti keda na iVolatabu meda vakadamurimuri koya ‘me vaka na gone ni toko.’ (Efeso 5:1) O koya gona na noda isulusulu kei na keda irairai ena rogo vinaka kina se rogo ca kina na Tamada vakalomalagi. Ia eda na vinakata ga meda vakamarautaka na lomana!​—Vosa Vakaibalebale 27:11.

19. Na cava na yaga ni noda tukuna vei ira tale e so na “cakacaka veivakurabuitaki ni Kalou”?

¹⁹ Eda raica vakacava “na cakacaka veivakurabuitaki ni Kalou” eda sa vulica? Eda kalougata nida sa mai kila na ka dina! Ena bokoci na noda ivalavala ca nida cakacakataka na noda vakabauta na dra nei Jisu a vakadavea. (Cakacaka 2:​38) Eda doudou tale ga ni vosa vua na Kalou. Eda sega ni rerevaka na mate me vakataki ira e sega na nodra inuinui. Eda nuitaka ga nona yalataka o Jisu ni dua na siga “era na rogoca kina na domona ko ira kece ka ra tu e na i bulubulu, ka ra na lako cake mai kina.” (Joni 5:​28, 29,VV) E lomasoli o Jiova ena nona vakaraitaka vei keda na veika kece oqo. E sovaraka tale ga vei keda na yalona tabu. Me ivakamalua ni veisolisoli vinaka e solia vei keda, meda doka tiko mada ga na nona ivakatagedegede uasivi da qai vakacaucautaki koya tiko ga ena noda gumatua ni kacivaka vei ira tale e so na nona “cakacaka veivakurabuitaki.”

[iVakamacala e ra]

O Sauma Vakacava?

• Na “cakacaka veivakurabuitaki” cava e rogoci ena Penitiko 33 S.K.? Na cava era cakava na vakarorogo?

• E yaco vakacava e dua me tisaipeli i Jisu Karisito, na cava e okati kina?

• Na cava meda kauaitaka kina na noda isulusulu kei na noda sauni keda?

• Na cava soti me vakasamataki ke via kilai ni veiganiti e dua na isulu se na kena iculacula?

[iYaloyalo ena tabana e 15]

E kacivaka o Pita ni sa tucake mai na mate o Jisu

[iYaloyalo ena tabana e 17]

E rogo vinaka beka na Kalou o qarava ena vuku ni kemu irairai?

[iYaloyalo ena tabana e 18]

Mera kauaitaka na itubutubu lotu Vakarisito na kedra irairai na nodra lewenivuvale