Me Rakorako Noda iSulusulu kei na Noda Sauni Keda

¹ E kaya e dua na itukutuku: “Era vaneketai kece na tagane, o ira sara mada ga na itabagone. O ira na marama kei na goneyalewa, qase kei na gone, era vakavinivo, ra vakaliku. Sega ni dua e vakadaqari se me sakuca na nona isulusulu. Ra qai matamamarau kece.” E tukuni cei tiko na ivakamacala oqo? E sega ni tukuni ira na tiko ena bose vakapolitiki, soqo ni qito, se soqo ni lagasere! E tukuni ira tiko na iwiliwili mataveitacini levu era a tiko ena dua na soqo ni tikina ena yabaki sa oti.

² E kaya tale vaka oqo e dua na dauvolaitukutuku ni vakamacalataki ira tiko na iVakadinadina ena dua tale na soqo ni tikina: “Era savasava na tagane kece, ra vakote ra qai vaneketai. Totoka nodra isulusulu na marama, qai rakorako.” E kaya e dua na yadra: “Oni sa itovo vinaka dina, oni rakorako, oni savasava, qai totoka na kemuni irairai. Sa totoka dina na saravi kemuni. Sa duatani na duka ni vuravura qo, ia o kemuni oni sa savasava dina!” Rogo vinaka dina na vosa ni veivakacaucautaki oqo! Sega li nida marau ni dua e vakacaucautaki keda? E macala ni tau ga na vosa ni veivakacaucautaki oqo ena vuku ni nodra rairai vinaka na iVakadinadina kece.

³ Sa da kilai e vuravura raraba ni dau duatani tu ga na keda irairai. (Mala. 3:18) Ena vuku ni cava? Ena vuku ni noda muria na ivakasala ni iVolatabu meda ‘vakaisulu vakavinaka ena isulu matau qai rakorako, me vaka e kilikili kei ira era kaya nira lotu.’​—1 Tim. 2:9, 10, VV.

⁴ Cava e Tukuna na Noda iSulusulu kei na Noda Sauni Keda? E tukuni keda sara tu ga na ka eda tokara kei na kena itokatokari​—e tukuna na noda vakabauta, e tukuna se da tamata vakacava, e tukuna tale ga na noda inaki. Na iculacula ni noda isulu e tukuni keda tale ga kei na ka eda dau vakabibitaka. Meda kua gona ni vakabekabea na ivakarau ni vakasama kei na itovo torosobu sa kilai tu kina o vuravura. Eda sega ni via vakawa na iculacula ni isulu sa tu nikua, eda via vakadeitaka ga ni isulu eda tokara e ganita e dua e italatala ni Kalou. (Roma 12:⁠2) Eda via vakaraitaka ni noda inaki meda “vakalagilagia na Kalou,” eda sega ni via vakaraitaka na yalo ni veisaqati, se na ivakarau ni bula torosobu ni vuravura oqo.​—1 Pita 2:12, VV.

⁵ E so beka na ka vou, o ira na sega ni matua, kei ira na malumalumu tu vakayalo, e rawa nira vakatotomuria na mataqali isulusulu sa tu nikua, ia era sega ni vakasamataka se na vakaleqa vakacava na yaca i Jiova kei na nona isoqosoqo. E vinaka kina meda dui dikevi keda de dua eda sa rawai tiko ena rai vakavuravura. Rawa nida kerea e dua e matua vakayalo me tukuna mai vakadodonu vei keda se vakacava tiko na noda isulusulu se noda dau sauni keda, da qai vakasamataka vakabibi na nona ivakasala.

⁶ Sa ra vakadinata e so ni dodonu mera qarauna nodra isulusulu nira lako ina soqo ni tikina. Ia, e dau veisau vakasauri na nodra isulusulu ni oti na porokaramu. Saga ena veigauna kece me kilai tiko ga ena nomu isulusulu ni o italatala lotu Vakarisito. (2 Kor. 6:3, 4) Se e vei ga era raici keda kina na lewenivanua, na noda badge card kei na noda isulusulu rakorako e dodonu me tukuni keda tiko nida iVakadinadina i Jiova. O koya gona, me kilikili qai rakorako tu ga ena veigauna na noda isulusulu, meda vakaraitaka kina nida “sega ni vakavuravura.”​—Joni 15:19.

⁷ Meda vakaraitaka mada ga ena noda soqo ni tikina oqo, e kena usutu na “Dauvunau Gugumatua ni Matanitu ni Kalou,” nida ‘tabu meda nei Jiova na noda Kalou.’ Noda kauai ena veika oqo ena kuria na ‘vakavinavinakataki i Jiova, nona rogo kei na nona vakarokorokotaki.’​—Vkru. 26:19.

[Kato ena tabana e 6]

Ka Meda Cakava Meda Vakalagilagi Jiova Kina:

■ Dara na isulu e ganita na italatala ni Kalou.

■ Qarauna na iculacula ni isulu e vakatakila na yalo ni vuravura.

■ Me rakorako nomu itovo, me kilai nomu yalomatua.