Taro na Dauwiliwili

Na idusidusi cava e vakarautaka na iVolatabu me baleta nodra vakavulici na gone ena vuvale e iVakadinadina i Jiova e dua vei rau na itubutubu?

E rua na ivakavuvuli vakaivolatabu ni nodra vakavulici na gone e rawa ni veituberi kina na itubutubu e tawavakabauta o kena isa. E dua oya: ‘Sa kilikili meda talairawarawa vua na Kalou, me kakua ga vei ira na tamata.’ (Cakacaka 5:​29) Kena ikarua: “Ni sa ulu ni watina na tagane, me vaka sa ulu ni soqosoqo lewe ni lotu na Karisito.” (Efeso 5:​23) E sega wale ga ni vauci ira na veiwatini era iVakadinadina na ikarua ni ivakavuvuli, era okati tale ga kina o ira e tawavakabauta na kedra isa. (1 Pita 3:1) E rawa vakacava vua na itubutubu iVakadinadina me veiraurautaka na ivakavuvuli oqo ni vakavulica na luvena?

Kevaka e iVakadinadina i Jiova o itubutubu tagane, e nona itavi me vakarautaka na veika vakayalo kei na veika vakayago ni nona vuvale. (1 Timoci 5:8) Dina ga ni na levu na gauna ena tiko vata kina kei iratou na gone o tina, ia e dodonu vua na tama iVakadinadina me vakavulici iratou na gone ena veika vakayalo, qai kauti iratou ina soqoni vakarisito, na vanua eratou na vulica kina na itovo kei na veimaliwai vinaka.

Ia, vakacava kevaka e vinakata o tina tawavakabauta me kauti iratou na gone ina nona lotu se vakavulici iratou ena nona vakabauta? E tu beka vua na dodonu vakalawa me cakava vaka kina. Ke ratou mani bacani na gone ena vanua ni sokalou vaka oya, ena vakatau vakalevu oqori ena veivakavulici vakayalo i tama. Ni ratou sa qase cake na gone, na nona veivakavulici vakaivolatabu o tama ena vukei iratou me ratou muria na dina ni Vosa ni Kalou. Ena marau o tama ke ratou tutaka na gone na ka dina oya!

Kevaka e iVakadinadina i Jiova o tina, e dodonu me rokova na itutu ni veiliutaki i tama dina ga ni na kauaitaka na nodratou bula tawamudu na luvena. (1 Korinica 11:3) Levu na gauna ena sega ni cata o tama ke vakavulici iratou na gone ena ka vakayago kei na veika vakayalo o tina, e kunei na veivukei vaka oya ena vanua era dau soqoni kina na tamata i Jiova. E rawa vua me vukei watina tagane me raica na yaga ni nodratou vakavulici na gone ena isoqosoqo i Jiova. E rawa ni maqosataka nona vakavulici iratou na luvena ena itovo e vauca na veika vakayago, vakabibi nida sa bula tu oqo ena gauna sa torosobu tu kina na ivakarau ni bula.

Ke tawavakabauta o tama, ena vinakata me vakavulici iratou na luvena ena nona lotu, kauti iratou ina vanua ni nona sokalou qai vakavulici iratou ena veika e vakabauta. De dua ena sega beka ni vinakata o tama e dua na lotu qai sega tale ga ni vinakata me ratou vakavulici na luvena ena ivakavuvuli ni lotu. Ni ulunivuvale, e nona sara ga na vakatulewa.a

Nona doka na itutu i watina, ena vakasamataka o yalewa lotu Vakarisito na nodrau rai na yapositolo o Pita kei Joni ni rau kaya: “Sa dredre vei keirau me keirau kua ni tukuna na veika keirau a raica ka rogoca.” (Cakacaka 4:​19, 20) Nona kauaitaka na tina iVakadinadina na nodratou veika vakayalo na luvena, ena qara e so na sala me ratou vakavulici kina. E nona itavi ena matai i Jiova me vakavulici ira na tani wili tale ga kina o iratou na luvena ena veika dina e sa vulica. (Vosa Vakaibalebale 1:8; Maciu 28:​19, 20) Ena rawa vakacava ni walia na leqa oya na tina iVakadinadina?

Me kena ivakaraitaki mada na nona vakabauti na Kalou. Ena sega beka ni rawa vua na yalewa iVakadinadina me vuli iVolatabu kei iratou na gone baleta na vakatatabu i watina. Me sa kua beka ni wasea vei iratou na gone na veika baleti Jiova? Sega. Nona vosa kei na nona ivakarau ena vakaraitaka na nona vakabauti koya na Dauveibuli. Sega ni vakabekataki ni tu na nodratou vakatataro na gone me baleta na ulutaga oya. Na nona galala ni vakatulewa o tina, e dodonu kina vua me tukuna yani na veika e vakabauta me baleti koya na Dauveibuli, okati sara ga kina vei iratou na luvena. Kevaka mada ga e sega ni rawa ni vuli iVolatabu kei iratou na luvena se kauti iratou wasoma ina soqoni, e rawa ga ni tuberi iratou me ratou kila na Kalou o Jiova.​—Dauvunau 6:7.

Me baleta na nodrau veimaliwai o koya e iVakadinadina kei na kena isa e tawavakabauta, a vola kina na yapositolo o Paula: “Ni sa vakasavasavataka na tagane tawa lotu na watina, a sa vakasavasavataka talega na yalewa sa sega ni vakabauta ko koya na watina; ia kevaka sa sega ni vakaoqo, era sa tawasavasava na nomudou gone; ia oqo, era sa savasava.” (1 Korinica 7:​14) E savasava ena mata i Jiova na bula vakawati ni dua vei rau e vakabauta, era na savasava tale ga e mata i Jiova na gone. Me qai tuberi iratou na gone ena kena vinaka duadua o tina me ratou kila na ka dina, me qai vakararavitaka vei Jiova na kena itinitini.

Ni ratou sa qase cake na gone, eratou na qai vakatulewataka na vanua eratou na mua kina ena yavu ni nodrau ivakasala na itubutubu. Eratou na digitaka beka me ratou muria na ka e salasalavata kei na vosa i Jisu: “O koya sa loloma vakalevu vei tamana se tinana ka vakalailai vei au, sa sega ni yaga vei au.” (Maciu 10:37) Eratou vakaroti tale ga: “Oi kemudou na gone, dou talairawarawa vei ira na nomudou qase e na ka sa vinaka vua na Turaga.” (Efeso 6:1) E vuqa na itabagone era digia mera ‘talairawarawa vua na Kalou,’ sega vua na itubutubu e tawavakabauta, dina ga ni na vakararawataki ira na itubutubu oya. E veivakalougatataki vua na itubutubu iVakadinadina me raica na nodratou digia me ratou qaravi Jiova na luvena dina ga ni ratou vakacacani kina!

[iVakamacala e ra]