Meda Raica Vakacava na Veivakatovolei?

VEIVAKATOVOLEI! Eda na dau sotava kece. Ena rairai vu mai na duidui ni ka eda taleitaka, tadre ni bula vakailavo, tauvimate, veitemaki, na idre ni veimurimuri ena veika e cala, veivakacacani, bolei na noda lewa meda tawaveitovaki se kua ni qaravi matakau, kei na vuqa tale. Se mani veivakatovolei cava ga eda sotava, vuqa na gauna e dau vakavuna na lomaocaoca. Eda na walia beka vakacava? Ena rawa nida vulica beka kina e so na ka?

Veitokoni Uasivi Duadua

A sotava o Tui Tevita e levu sara na veivakatovolei ena nona gauna, ia a yalodina tu ga me yacova nona mate. A vosota rawa vakacava? A vakatakila na ivurevure ni nona kaukaua ena nona kaya: “A noqui vakatawa ko Jiova; ena sega na ka me yali vei au.” A tomana: “Kevaka ka’u sa lako e loma ni buca ni yaloyalo ni mate, ka’u na sega ni rerevaka na ca: ni kemuni sa tiko vata kei au; ena vakacegui au na nomuni titoko kei na nomuni matanakilagi.” (Same 23:​1, 4) Io, e sega ni vakacauoca o Jiova na tokoni keda. A vukei Tevita ena so na gauna dredre sara ni nona bula, sa macala gona ni na tu vakarau me vakayacora vaka kina vei keda ke veiganiti.

Eda na rawata vakacava na nona veitokoni o Jiova? Na iVolatabu e vakaraitaka na sala e rawati kina ni kaya: “Dou tovolea mada ka raica ni sa yalovinaka ko Jiova.” (Same 34:8) Oqori e dua na veisureti vakayalololoma, ia na cava e kena ibalebale? E vakayaloqaqataki keda meda qaravi Jiova da qai veisautaka na noda bula me lako vata kei na nona inaki. Ia na ivakarau ni bula oqori ena yalana na noda galala, ni na vinakati meda na vakuai keda mai na so na ka. Ena so na gauna, ena rawa ni sotavi kina na veivakatovolei​—veivakacacani kei na rarawa. Ia, mera kua vakadua ni yalolailai o ira na ciqoma na veisureti i Jiova. Ena lomani ira vinaka o Jiova. Ni na dusimaki ira qai karoni ira vakayalo. Nira vakatovolei ena vakacegui ira ena nona vakayagataka na nona Vosa, na yalona tabu, kei na ivavakoso lotu Vakarisito. Yaco na gauna ena qai solia vei ira na bula tawamudu.​—Same 23:6; 25:9; Aisea 30:21; Roma 15:5.

Vei ira na vakatulewataka mera qaravi Jiova, era na veisautaka na nodra bula, ia ke ra dina kina era na vakadinata ni o Jiova e dau vakayacora na ka kece e yalataka. Era a vakadinadinataka oqori o ira na Isireli era a muri Josua ina Vanua Yalataki. Nira sa kosova na Joritani, ena vinakati mera vosota na veivakatovolei era na sotava, era na vala, qai levu tale na ka era na vulica ena sala kaukaua. Ia era a yalodina cake sara na itaba oya mai vei ira na tubudra, o ira a sereki mai Ijipita ra qai lai mate ena vanualiwa. O koya gona, o Jiova e tokoni ira na yalodina ena kedra maliwa, me baleta na nodra ituvaki ni bula ena icavacava ni bula i Josua, e kaya kina na iVolatabu: “A sa vakacegui ira ko Jiova, e na yasana kecega, me vaka na ka kecega ka bubului kina vei ira na nodra qase . . . Sa sega ni lutu e dua na ka e na ka vinaka kecega ka vosa kina ko Jiova kivei ira na Isireli; sa yaco kece sara ga.” (Josua 21:​44, 45) Ena vaka tale ga oya na ka eda na sotava ke da vakararavi vakatabakidua vei Jiova nida vakatovolei kei na veigauna kece tale e so.

Na cava ena vakaluluqataka na noda nuitaki Jiova? E dua na ka a vakaraitaka tiko o Jisu ena nona kaya: “Sa sega e dua na tamata sa qarava rawa e le rua na turaga . . . Dou sa sega ni qarava rawa na Kalou kei nai yau.” (Maciu 6:​24) Ke da nuitaki Jiova, eda na sega ni vaqara na tikovinaka ena kena ivurevure era qara kina e vuqa e vuravura, ena veika vakayago. A vakasalataki iratou kina na nona imuri o Jisu: “Ia dou vakasaqara taumada na matanitu ni Kalou, kei na nona yalododonu: ia ena soli me kenai kuri vei kemudou na ka kecega oqo [veika gadrevi vakayago].” (Maciu 6:​33) E digidigi donu na lotu Vakarisito e dau veiraurau na nona raica na veika vakayago qai vakaliuca ena nona bula na Matanitu ni Kalou. (Dauvunau 7:​12) Io, ena vakayalia beka kina e so na ka. Ena rairai vakuai koya mai na taukeni ni veika vakayago. Ia ena qai tauca ga na kena veivakalougatataki. Ena tokoni koya o Jiova.​—Aisea 48:​17, 18.

Eda Vuli Mai na Veivakatovolei

Nida digia meda “tovolea mada ka raica ni sa yalovinaka ko Jiova,” e sega ni kena ibalebale kina nida na taqomaki mai na veika tawanamaki e dau sotavi ena noda bula; se me sa na sega ni bololaki keda kina o Setani kei ira na nona tamata. (Dauvunau 9:​11) O koya gona, ena vakatovolei na nona yalodina kei na dei ni lomana e dua na lotu Vakarisito. Ia na cava e vakalaiva kina o Jiova mera vakatovolei vaka oqo na nona tamata? A cavuta e dua na vuna na yapositolo o Pita ena nona kaya: “E na gauna lekaleka oqo, ke sa yaga, dou sa vakararawataki e na dauvere e vuqa: me sa kune kina na nomudou vakabauta ni sa vakatovolei, me talei vakalevu sara ka talei vakalailai na koula sa caca rawa ni sa vakatovolei e na bukawaqa, me ka ni vakavinavinaka, ka me dokai ka me vakacaucautaki, ni na rairai mai ko Jisu Karisito.” (1 Pita 1:​6, 7) Io, nida sotava na veivakatovolei eda na rawa ni vakaraitaka na noda vakabauta kei na noda lomani Jiova. Ena veivuke tale ga ena kena saumi na nona vosa ni veibeitaki kei na nona dauveivakalialiai o Setani na Tevoro.​—Vosa Vakaibalebale 27:11; Vakatakila 12:10.

Na veivakatovolei e vukei keda tale ga meda bucina e so tale na itovo vakarisito. Me kena ivakaraitaki, dikeva mada na nona vosa na daunisame: “Sa vakaraici ira era sa yalomalumalumu [o Jiova]; ia sa kilai ira vakayawa na viavialevu.” (Same 138:6) E levu vei keda e sega ni noda itovo na yalomalumalumu, ia na veivakatovolei e rawa ni vukei keda meda bucina na itovo vinaka oqo. Nanuma lesu mada na gauna i Mosese na nodra vakacauocataka e so na Isireli na kana mana ena veimacawa, veivula. E ka ni veivakatovolei sara ga vei ira oqori, dina ga ni a soli mai vakacakamana. Na cava na inaki ni veivakatovolei oya? A kaya vei ira o Mosese: “O koya [o Jiova] ka vakani iko e na mana e na vanua liwa . . . me vakamalumalumutaki kemuni kina, ka vakatovolei kemuni.”​—Vakarua 8:​16.

Ena vakatovolei tale ga na noda yalomalumalumu. Ena sala cava? Eda dau raica vakacava na veiveisau e yaco ena isoqosoqo? (Aisea 60:17) Eda dau tokona beka mai vu ni lomada na cakacaka vakavunau kei na veivakatavulici? (Maciu 24:14; 28:​19, 20) Eda dau ciqoma beka ena marau na ivakamacala ni ka dina mai na iVolatabu e vakarautaka “na dauveiqaravi yalo dina ka vuku”? (Maciu 24:​45-​47, VV; Vosa Vakaibalebale 4:​18) Eda vorata beka na kena dau sagai me taukeni na iyaya vakalivaliva vovou kece, na isulu vovou e dau taka mai, se na motoka vou duadua? Na tamata yalomalumalumu ena vakaiotaka na veitaro oqori.​—1 Pita 1:​14-​16; 2 Pita 3:​11.

Na veivakatovolei e vukei keda me da bucina e dua tale na itovo bibi​—na vosota. E kaya na tisaipeli o Jemesa: “O i kemuni na wekaqu, ni okata ga me ka ni reki na nomuni sota kaya na veimataqali veivakatovolei e vuqa; ni ko ni kila sa dau vakatubura na yalo vosota na vakatovolei ni nomuni vakabauta.” (Jemesa 1:​2, 3, VV) Nida vorata rawa na veivakatovolei eda sotava nida vakararavi vei Jiova, eda na rawa ni tudei kina, sega ni soro koso, qai yalodina. Ena vakayaloqaqataki keda meda vorata tiko ga na nona veitemaki o Setani, na kalou cudrucudru ni vuravura oqo.​—1 Pita 5:​8-​10; 1 Joni 5:​19; Vakatakila 12:12.

Na Rai Donu me Baleta na Veivakatovolei

A sotava o Jisu Karisito, na Luve uasivi ni Kalou, e vuqa sara na veivakatovolei ena nona bula voli e vuravura ia ni a vosota a tauca kina e levu sara na kena yaga. O Paula a vola ni o Jisu “a vulica na talairawarawa mai na veika rarawa e sota kaya.” (Iperiu 5:​8, VV) Nona yalodina tiko ga me yacova na nona mate, e vakacaucautaki kina na yaca i Jiova qai rawa tale ga kina vei Jisu me cabora na nona bula uasivi me keda ivoli na kawatamata. Oqo e dolava na sala vei ira na vakabauti Jisu mera nuitaka na bula tawamudu. (Joni 3:​16) Baleta ni a sotava ena yalodina na veivakatovolei o Jisu, a yaco kina me noda Bete Levu kei na noda Tui sa veiliutaki tiko.​—Iperiu 7:​26-​28; 12:2.

Ena yaga tale beka ga vei keda? Na noda yalodina nida sotava na veivakatovolei ena kauta mai e levu na veivakalougatataki. Vei ira era vakanuinui ina bula i lomalagi, na iVolatabu e kaya: “Sa kalougata na tamata sa vosota ni sa vakatovolei; io, ni sa vakatovolei oti, ena rawata nai sala ni bula o koya sa yalataka na Turaga ki vei ira sa lomani koya.” (Jemesa 1:​12) Ia vei ira na vakanuinui ina bula e vuravura, e vakadeitaki vei ira ni kevaka era vosota tiko ena yalodina, era na bula tawamudu ena parataisi e vuravura. (Vakatakila 21:​3-6) O koya e bibi sara, na nodra vosota ena yalodina ena vakacaucautaki kina na yaca i Jiova.

Nida muria na weniyava i Jisu, eda nuidei nida na vorata rawa na veivakatovolei kece ga eda sotava ena ituvaki ni bula ena gauna oqo. (1 Korinica 10:13; 1 Pita 2:​21) Ena rawa vakacava? Ena noda vakararavi vei Jiova, ni na solia “na kaukauwa mana levu” vei ira era nuitaki koya. (2 Korinica 4:7) Me vakataki Jope mada ga na noda nuidei, dina ga ni a vosota na veivakatovolei mosimosi sara, e se rawa ga ni kaya ena yalo doudou: “Ni sa vakatovolei au oti ko koya, ka’u na qai lako mai me vaka na koula.”​—Jope 23:10.

[iYaloyalo ena tabana e 31]

Nona yalodina o Jisu ni vakatovolei e vakacaucautaki kina na yaca i Jiova. Ena rawa nida muria tale ga oya