“Sa Kalougata na Tamata sa Vosota ni sa Vakatovolei”
1 Eda na vakatovolei kece na lotu Vakarisito. (2 Tim. 3:12) Oqo na veivakatovolei me vaka na tauvimate, leqa vakailavo, na veitemaki, veivakacacani, kei na so tale. E dau vakatovolei keda o Setani me vakamalumalumutaki keda vakayalo, me vaka beka na noda sega ni galeleta na cakacaka vakavunau, se da sega ni via qaravi Jiova. (Jope 1:9-11) Eda na marau vakacava nida vosota na veivakatovolei?—2 Pita 2:9.
2 Vakarautaki Keda: E sa vakarautaka mai vei keda o Jiova nona Vosa, qai volatukutukutaki tu kina na nona bula o Jisu kei na nona ivakavuvuli. Na noda rogoca gona na veika a vakavulica o Jisu da qai bulataka sara, eda na vakarautaki keda kina ena veivakatovolei eda na sotava. (Luke 6:47-49) Ena vakaukauataki keda tale ga o ira na tacida vakayalo, na soqoni, kei na ivola e vakarautaka mai na dauveiqaravi yalodina ka vuku. Meda vakayagataka vinaka tale ga na isolisoli uasivi ni Kalou na masu.—Maciu 6:13.
3 E vakarautaka tale ga vei keda o Jiova na inuinui. Ke da vakabauta dei na inuinui oqo ena vaka kina na ‘ikelekele ni lomada, ni dina qai kaukaua.’ (Iper. 6:19) Ena gauna vakaivolatabu e sega vakadua ni dau vakatarai na waqa me soko ke sega na kena ikelekele, kevaka mada ga e draki vinaka. Ke yaco vakasauri na draki ca, ena vakalutuki sobu e wai na ikelekele me kua kina ni voca na waqa ena vanua veivatu. E vaka tale ga kina noda vakabauta dei na inuinui e yalataka tu na Kalou, ena vaka na ikelekele ni lomada ni na vakataudeitaki keda nida vakatovolei. Rawa tale ga ni yaco vakasauri na veivakatovolei. Me vakataki Paula kei Panapasa, dina ga ni ciqomi e Lisitira na nodrau cakacaka vakavunau, a mani veisau vakasauri nira sa yaco yani na Jiu dauveitusaqati.—Caka. 14:8-19.
4 Eda Marau Nida Vosota: Eda na lomavakacegu ke da yalodina tiko ena cakacaka vakavunau dina ga nida tusaqati. Eda marau nida vakacacani ena vuku i Karisito. (Caka. 5:40, 41) Noda vosota na veivakatovolei eda na bucina kina na itovo me vaka na yalomalumalumu, talairawarawa, kei na vosota. (Vkru. 8:16; Iper. 5:8; Jeme. 1:2, 3) Eda vulica tale ga kina meda nuitaki Jiova, nuitaka nona vosa ni yalayala, qai noda idrodro.—Vkai. 18:10.
5 Eda kila ni veivakatovolei eda sotava ena lekaleka wale. (2 Kor. 4:17, 18) Ia ena laurai sara ga kina na titobu ni noda lomani Jiova. Nida tudei kina, eda sa na vakalasuya tiko kina na veibeitaki i Setani. Meda kua mada ga ni soro! “Sa kalougata na tamata sa vosota ni sa vakatovolei; io, ni sa vakatovolei oti, ena rawata nai sala ni bula.”—Jeme. 1:12.