Galeleti na “Sanito” Nikua

“Sa seavu na noda dau taleitaki ira na tamata kilai. Ia, era sega ni vaka oya na le 4.2 na milioni na lewe i Mereke era a raica na veibulu vei Mother Teresa ena 13 Sepiteba. Me tekivu mai na gauna a takali kina ena 5 Sepiteba, era vakasosana na Vatikani e lewe vuqa ena nodra kerea me vakadonui o Mother Teresa me dua na sanita. Era vakabauta e vuqa ni na vakayacori vaka kina.”​—Sun-sentinel, Mereke, 3 Okotova, 1997.

E VUQA era okata na nona cakacaka vakayalololoma ni veivukei na daukaulotu ni lotu Katolika, o Mother Teresa, me itovo dina ni dua na sanita. Era tu tale ga e so na tamata kilai ena veimatalotu tale e so. Ia, rairai era sega ga ni kilai me vakataki ira e vakadonuya na lotu Katolika Vakaroma.

E sivia na 450 era sa vakadonui mera sanito ena gauna ni nona veiliutaki na tui tabu o Iowane Paulo II, oqo e sivia na kedra iwiliwili era a vakadonuya na tui tabu kece ena ika20 ni senitiuri.a Na cava era se sokaloutaki tiko ga kina na “sanito,” era sega mada ga ni kilai vei ira e vuqa na lotu Katolika?

E vakamacalataka o Lawrence Cunningham e dua na daunicioloji ena univesiti mai Notre Dame: “E vakamarautaka na yaloda na kena dau vakayacori na ivalavala vinaka e vuravura. Na bula gona era rokataka na sanito e dusia ni rawa ni caka na ivalavala oya ena gauna sara mada ga oqo.” Qai kuria, ni tukuni ni lavotaki na nodra dau veitaratara kei na Kalou, e kena ibalebale oya ni rawa mera veitaratara kei koya na Kalou ena vukudra na tamata era se bula tiko. E dau maroroi qai rokovi tale ga na nodra isulu, iyaya kei na veika vaka oya ni vakabauti ni tiko kina na mana.

A tabaki ena ika16 ni senitiuri na Catechism of the Council of Trent me vakadeitaka na ivakavuvuli ni lotu Katolika, a vakatura: “Sa dodonu vakaoti me tukuni, noda vakarokorokotaki ira na sanito ‘era sa moce tu ena Turaga,’ da kerea mera vakamasuta na Kalou ena vukuda, da doka na kedra ivakananumi kei na nodra dravusa, oqo e sega ni vakalailaina na nona lagiti na Kalou ia ena qai toroya cake ga na nona vakalagilagi. E vakabulabulataka, vakadeitaka tale ga na nona inuinui na lotu Vakarisito, qai uqeti me vakadamurimuria na nodra ivalavala vinaka.” (The Catechism of the Council of Trent, 1905) Ena vinakati vua na lotu Vakarisito dina me bulataka na ivalavala e vinaka, me torova na Kalou ena sala vakadonui, qai rawata na veivuke vakalou. (Jemesa 4:​7, 8) Me vaka e tukuni ena Vosa ni Kalou, o cei e vakadonui me sanito dina? Na cava e nodra itavi?

[iVakamacala e ra]