Rawa na Vakacegu ena Gauna ni Leqa
SA SEGA ni veivakacegui na itukutuku eda rogoca nikua. A vola e dua na turaga: “Ena torosobu ni leqa nikua, keitou sega sara ga ni kila me keitou sarava se sega na nius ena ono na kaloko.” E sa roboti vuravura tu ena gauna oqo na ivalu, ivalavala kaukaua, rarawa, basulawa, kei na mate ca— kevaka eda se bera ni vakila na veika ca oya, dua ga na siga oqo sa rawa nida sotava.
Na veileqa oqo sa tukuna vakamatata tu mai na iVolatabu. Nona vakamacalataka na noda gauna o Jisu, a kaya ni na levu na ivalu, mate ca, dausiga kei na uneune. (Luke 21:10, 11) A vola tale ga na yapositolo o Paula ni ‘gauna ni rarawa na veisiga mai muri,’ era na dau cudrucudru, lomana na ilavo, ra qai cata na ka vinaka. E vakatoka gona na noda gauna me “veisiga maimuri.”—2 Timoci 3:1-5.
Na veika e yaco tu ena gauna oqo, e via tautauvata sara ga kei na ka e sa tukuna oti tu na iVolatabu. Ia, e rabailevu cake na itukutuku e vakarautaka na iVolatabu. Eda kila mai na Vosa uqeti ni Kalou na vuna e sa rui levu kina na ca kei na veika ena yaco ena gauna se bera mai.
Rai ni Kalou me Baleta na iVakarau Ca
E vakamacalataka na iVolatabu na rai ni Kalou me baleta na ivakarau ca ni gauna oqo. Dina ga ni raica tu mai liu na Kalou na leqa eda sotava tu ena gauna oqo, ia ena sega ni vakadonuya se me vakalaiva me yaco tiko ga. A vola na yapositolo o Joni ni “sa loloma na Kalou.” (1 Joni 4:8) O Jiova e kauaitaki ira dina na tamata qai cata na ka ca kece ga. E sega ni cala meda torova na Kalou me vakacegui keda, ni yalololoma qai vinaka, e tu tale ga vua na kaukaua me kauta laivi na ivakarau ca kei vuravura. E vola kina na daunisame: “[Na Tui mai lomalagi e digitaki vakalou ena] vakabula ko koya na dravudravua ni sa tagi; kei koya sa vakararawataki ka sa sega e dua me vukei koya. Ena lomana ko koya na tamata malumalumu ka dravudravua, ka vakabula na yalodra na dravudravua. Ena vakabula na yalodra mai na lawaki kei nai valavala kaukauwa: ena ka talei talega e matana na kedra dra.”—Same 72:12-14.
O lomani ira beka na sotava tu na rarawa? Ena rairai vaka kina. O Jiova e buli keda meda ucui koya, oya na vuna eda na veikauaitaki kina. (Vakatekivu 1:26, 27) Eda nuidei ni o Jiova e kauaitaka dina na rarawa eda sotava tu na kawatamata. O Jisu duadua ga e kilai Jiova vinaka, e vakavulica gona vei keda ni kauaitaki keda dina o Jiova.—Maciu 10:29, 31.
Na veika e bulia na Kalou e vakadinadinataka nona kauaitaki keda. E kaya kina o Jisu ni Kalou “sa vakacabea . . . na nona mata-ni-siga vei ira na tamata ca kei ira na tamata vinaka, a sa vakatauca mai na uca vei ira na tamata yalododonu, kei ira na tamata tawa yalododonu.” (Maciu 5:45) E tukuna tale ga na yapositolo o Paula vei ira na lewenikoro e Lisitira: “[Na Kalou e] sega ga ni laiva me sega na nonai vakatakilakila, ni sa caka vinaka tiko ko koya, a sa solia mai vei keda na uca mai lomalagi, kei na yabaki e levu kina na vuata, a sa vakamamautaka na lomada e na kakana kei na marau.”—Cakacaka 14:17.
E Bale Vei Cei na Ca?
E bibi tale ga na ka e tukuna o Paula vei ira na kai Lisitira: “E a laivi ira na veimatanitu ko koya [na Kalou] e na veitabatamata sa oti yani me ra dui muria ga na nodra sala.” O ira sara ga oqo na veimatanitu kei ira na tamata era vakavuna tiko na leqa. E sega kina ni dodonu me beitaki na Kalou.—Cakacaka 14:16, VV.
Na cava e vakalaiva kina na Kalou me yaco tiko ga na leqa? Ena cakava beka kina e dua na ka? Na kena isau e kune ga ena Vosa ni Kalou. Na vuna ni vauci kina e dua na ibulibuli vakayalo kei na ile e vakavurea vei ira na ibulibuli tawarairai tale e so.
[iYaloyalo ena tabana e 4]
Era dau veikauaitaki na tamata. E kauaitaka beka na Kalou na rarawa ni kawatamata?
[iTaba ni Credit Line ena tabana e 2]
WAQANA: Taqe ni ivalu: UN PHOTO 158181/J. Isaac; uneune: San Hong R-C Picture Company
[iTaba ni Credit Line ena tabana e 3]
E cake imawi, Croatia: UN PHOTO 159208/S. Whitehouse; gone waloloi: UN PHOTO 146150 BY O. MONSEN