Rawa na Vakacegu Nida Kilai Koya na Kalou

ERA lomatarotarotaka e so na ka e kaya na iVolatabu ni loloma qai dauveivosoti na Kalou. Era taroga: Ke via vakaotia na Kalou na ca, ke kila na sala me vakaotia kina, qai tu tale ga vua na kaukaua me cakava vaka kina, cava ga e se yaco tiko kina na ca? E dredre vei ira mera vakasotara vata na tolu na vakasama oqo: (1) e Kalou kaukaua; (2) e Kalou yalololoma qai vinaka; (3) e yaco tiko ga na leqa. Era kaya ni sega tale ni rawa ni vakatitiqataki na ikatolu ni vakasama, ke dina oqo, kena ibalebale ni na dua vei rau na imatai se ikarua ni vakasama ena sega ni dina. Era kaya gona, ke sega ni rawa vua na Kalou me vakaotia na ca, e sega beka ga ni dauveikauaitaki.

Ni oti e vica na siga mai na gauna a kacabote kina na World Trade Center e Niu Yoka, a kaya e dua na iliuliu ni lotu kilai levu e Mereke: “Au tarogi . . . vakavica na drau se cava na vuna e vakatara tu kina na Kalou me yaco tiko kina na leqa kei na rarawa. Meu kaya vakadodonu au sega mada ga ni kila vinaka na kena isau.”

A vola kina e dua na parofesa ni cioloji ni lauti koya na “ivunau momona” e vunautaka na iliuliu ni lotu oqo. E duavata tale ga kei na ka a vola e dua na vuku: “Eda na sega ga ni kila taucoko sara na vu ni rarawa ni oqori e tiki tiko ni nona veika vuni na Kalou.” E dredre beka meda kila na vuna e vakatara tu kina na ca na Kalou?

Na iTekitekivu ni Ca

Ni veidutaitaki na veika era tukuna na veiliuliu ni lotu, e sega sara ga ni dredre me kunei mai na iVolatabu na vuna e vakatara tu kina na ca na Kalou. Ia, ni bera nida kila na itekitekivu ni ca, e bibi meda kila taumada ni a sega ni bulia na Kalou na vuravura ca. A buli rau na imatai ni veiwatini me rau vinaka vakaoti, sega ni ivalavala ca. E raica kina o Jiova ni veika e bulia e “vinaka sara.” (Vakatekivu 1:​26, 31) A nakita me rau vakatetea o Atama kei Ivi na Paraitaisi e Iteni ena vuravura taucoko, mera qai tawana na tamata mamarau ena ruku ni nona veiliutaki loloma.​—Aisea 45:18.

E dua na ka bula vakayalo a dau yalodina tu vua na Kalou e vakavuna na ca, ni vinakata tale ga me qaravi. (Jemesa 1:​14, 15) E vakavatukana e vuravura na nona veivorati ena nona uqeti rau na imatai ni veiwatini me rau vorata na Kalou. Nodrau sega ni vakamalumalumutaki rau o Atama kei Ivi ena ivakaro matata i Jiova me rau kua ni kania se tara na vuanikau e kilai kina na ka vinaka kei na ca, rau mani taura rau qai kania. (Vakatekivu 3:​1-6) Na ka erau cakava oqo, erau sa talaidredre kina vua na Kalou, erau vakaraitaka tale ga na nodrau sega ni via muria na nona veidusimaki.

Votu na Ile Bibi

Na veivorati oqo mai Iteni e votu kina e dua na ile bibi, na dodonu ni veiliutaki. Na talaidredre oya e lomatarotarotaki kina na dodonu ni veiliutaki i Jiova vei ira na nona ibulibuli. E tu beka vua na Dauveibuli na dodonu mera talairawarawa vua na kawatamata? Se na vinaka cake ga mera liutaki ira?

Na loloma i Jiova, na nona lewadodonu, vuku kei na kaukaua e vakaraitaka na dodonu ni nona veiliutaki. E rawa sara ga ni vakayagataka na nona kaukaua me vakarusai ira kina na talaidredre vua. Ena rairai dodonu vinaka oya ni tu vua na kaukaua me cakava vaka kina. Ia, ke mani vakarusai ira ena sega ga ni sauma na ile oya. Ena dua tale na yasana e rawa vua na Kalou me raibaleta na ivalavala ca. Oqo ena rairai ka vakayalololoma vei ira na so era bula tu nikua. Ia, ena sega ga ni sauma na ile i Setani, ni vinaka mera liutaki ira ga vakataki ira na tamata. Kuria oya, ena sega li ni uqeti ira e so na ka oqo mera gole tani mai na sala i Jiova? Ena tawamudu ga kina na nodra rarawa.

Ni sa rui Kalou vuku o Jiova e vakalaivi ira kina na tamata mera lewai ira ga. Dina ni na yaco tiko ga kina na ca, ia ena lekaleka ga, e soli tale ga vei ira na gauna mera vakadinadinataka kina ni rawa vei ira mera liutaki ira ga, mera muria ga na nodra ivakatagedegede ni ka e vinaka kei na ka e ca. Cava e laurai kina? E duadua tu ga na ka e laurai mai na itukutuku ni kawatamata oya na ivalu, ivalavala tawadodonu, veivakasaurarataki, kei na rarawa. E mai vakalasuya vakadua na ile e vure cake mai Iteni na leqa e kauta mai na talaidredre vei Jiova.

Na nona loloma na Kalou e vakaraitaka ena nona solia mai na Luvena o Jisu Karisito me isoro ni veivoli. O ira na dau talairawarawa era na sereki mai na ivesu ni ivalavala ca kei na mate e vu mai na nona talaidredre o Atama. Na isoro oqo e dolava tale ga na sala mera bula tawamudu kina o ira era vakabauti Jisu.​—Joni 3:​16.

E veivakacegui na ivakadei i Jiova ni rarawa eda sotava tu oqo ena lekaleka ga. A vola na daunisame: “Malua mada vakalailai, ena qai takali na tamata ca; io, ko na vakananuma na nona yasana, ia sa na yali kina ko koya. Ia ko ira na yalomalumalumu era na taukena na vanua; ka na daumarau tiko e na veivakacegui vakaidina.”​—Same 37:​10, 11.

Na Marau kei na Tiko Nuidei ena Gauna se Bera Mai

Na vakayacori ni parofisai ena iVolatabu e vakaraitaka ni sa voleka na gauna me na vakaotia kina na Kalou na tauvimate, rarawa kei na mate. Raica mada na veika totoka e sa na vakarau yaco a raitayaloyalotaka na yapositolo o Joni. E vola: “Ka’u a raica na lomalagi vou kei na vuravura vou; ni sa takali na lomalagi makawa kei na vuravura makawa; ia sa segai sara na wasawasa. . . . ko koya na Kalou ena tiko vata kei ira [na kawatamata], me nodra Kalou. Ia na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa.” Me vakadinadinataki na dina ni vosa ni yalayala oqo, a tukuni vei Joni: “Vola mada: ni sa vosa mana oqo ka dina.”​—Vakatakila 21:​1-5.

Ia, vakacava ga o ira na vica vata na bilioni na tamata vinaka era sa mate tu me tekivu mai na gauna a yaco kina na veivorati mai Iteni? A parofisaitaka o Jiova ni na vakabulai ira tale mai na mate. A kaya kina na yapositolo o Paula: “Ka’u sa vakanuinui vua na Kalou, ni na tu cake tale ko ira na mate, ko ira na yalododonu kei ira na sega ni yalododonu.” (Cakacaka 24:15) O ira oqo era na marautaka na bula ena vuravura era “tiko kina nai valavala dodonu.”​—2 Pita 3:​13.

Me vaka ga na tama dauloloma e kila ni na bula vinaka na luvena ke caka vua na veisele mosi, e vaka tale ga oya o Jiova ni na vakatara meda vakadinadinataka vakalekaleka na ca ena vuravura oqo. Ia, o ira ga na cakava tiko na loma ni Kalou ena waraki ira tu na veivakalougatataki tawamudu. A vakamacalataka o Paula: “Ni sa vakamalumalumutaki ko vuravura me ca, a sa sega ni vinakata, e na vuku i koya ga sa vakamalumalumutaka, ni sa vakanuinui tiko ni na sereki talega ko vuravura mai na kena vakabobulataki ki na rusa, ka me lalaga tu ka vakaiukuukutaki vata kei ira na luve ni Kalou.”​—Roma 8:​20, 21.

Oqo e sega ni irogo eda sarava ga ena retioyaloyalo se wilika ena niusiveva, ia e itukutuku rogorogo vinaka. Na itukutuku vinaka duadua mai vei koya e kauaitaki keda dina, “na Kalou ni veivakacegui kecega.”​—2 Korinica 1:3.

[iYaloyalo ena tabana e 6]

E laurai mai na veitabagauna ni sega ni rawa nira liutaki ira ga na tamata, ena gadrevi na veidusimaki ni Kalou

[Credit Line]

Vuvale ni Somalia: UN PHOTO 159849/M. GRANT; gasaukuro vakaatomi: USAF photo; keba ni veivakararawataki: U.S. National Archives photo