Era Veivakamuai Tiko Beka na Kaukaua Tani?

“Na kena sa veilecayaki tu o vuravura, e vaka sara ga ni curuma tu e dua na mataqali kaukaua e sega ni dro bula rawa mai kina e dua.”​—Jean-Claude Souléry, dauvolaitukutuku.

‘Nona sega ni lewai koya rawa e dua, e vaka sara ga e vakila ni dua na kaukaua levu vakatevoro e sa curumi koya tu.’—Josef Barton, daunitukutuku makawa.

E VAKAVURE vakasama vei ira e lewe vuqa na ka vakadomobula a yaco ena 11 Sepiteba, 2001. A vola e dua na dauvolavola ena Financial Times mai Igiladi o Michael Prowse: “E sega ni dua na manumanu ena cakava tu na ivalavala vakadomobula oqo.” A tukuna na edita ni New York Times, ni sega ni kena lalawataki ga na vakacaca oqo, “e bibi tale ga me vakasamataki na kaukaua ni veicati me vakayacori kina na vakacaca. Na veicati vaka oqo e ulabaleta na ivalavala ni veivaluvaluti, e sega ni vakaiyalayala, qai sega ni kauai ina dua na veidinadinati.”

Era vakabauta e levu na tamata lotu ni oqo na veivakamuai ni dua na kaukaua tani. E kaya e dua na daunibisinisi mai Sarajevo a vakadinadinataka na vakadomobula ni veicati vakawatamata mai Bosnia: “Ni oti e dua na yabaki ni ivalu e Bosnia, au vakabauta ni vakavuna tiko o Setani, sa mani sivia tale na veivakalolomataki.”

A tarogi na daunitukutuku makawa o Jean Delumeau ke vakabauta na Tevoro, a qai sauma: “Meu vakalasuya vakacava na kaukaua ni vunica ena gauna au a sucu mai kina me yacova na gauna oqo: Na iKarua ni iValu Levu, era a mate kina e sivia e 40 na milioni; na veivakararawataki ena keba mai Auschwitz; na veivakamatematei vakamatatamata e Cambodia; na dauvakadavedra vakadomobula ni veiliutaki i Ceauşescu; na nodra veivakararawataki na matanitu era dauveiliutaki e veiyasa i vuravura. E sega ni wiliki rawa na veika vakadomobula era yaco tu oqo. . . . Au vakabauta ni dodonu vinaka me vakatokai na ivakarau vaka oqo me ‘ivalavala ni Tevoro,’ e sega ni baleta ni uqeti ira tiko e dua na Tevoro e vakaileu qai basogairua me vaka na itaukuku ni bulumakau na yavana, ia e vakatayaloyalotaka ga ni Tevoro e dua na kaukaua vuni vakayalo e veivakamuai tiko e vuravura.”

E levu nikua era na duavata kei Jean Delumeau nira vakatoka me “ivalavala ni Tevoro” na veika vakadomobula e sa yaco tu ena bula ni kawatamata ena gauna oqo, ena matavuvale me yacova sara na vuravura taucoko. Na cava e kena ibalebale? E vatavatairalago beka na vakadomobula ni kaukaua ni ca, se tiko beka e so na kaukaua e biliga tiko na tamata me cakava na ivalavala ca torosobu e sega ni bau tadrai ni rawa ni cakava na tamata? E liutaki ira tiko beka na igu kaukaua oqori na nodra turaga​—na luve ni ca o Setani na Tevoro?

[iTaba ni Credit Line ena tabana e 3]

O ira na gone: U.S. Coast Guard photo