Cava e Dredre Kina na Kere Veivosoti?

ENA Julai 2000, a vakadonuya kina na matabose na California State Legislature mai Mereke e dua na lawa, oya ke kere veivosoti vua e dua e mavoa ena vakacalaka o koya e vakavuna, ena sega ni beitaki kina. Na cava e buli kina na lawa oqo? Ni yaco na vakacalaka, qai mavoa kina e dua se vakacacani e dua na iyaya, e dau dredre na kere veivosoti ni na nanumi kina ena mataveilewai ni o koya ga e kere veivosoti e cala. Ena yasana tale adua, era na rairai cudru o ira era namaka me caka vei ira na kere veivosoti ke sega ni caka, de a leqa lalai ga ia e dau lai tini sara me leqa levu.

E dina ni na sega ni gadrevi na kere veivosoti ke sega ni nomu cala. Ia, ena so na gauna e ka ga vakayalomatua mo dau qarauna na ka o tukuna. E kaya kina na vosa vakaibalebale ni gauna makawa: “Ni sa levu na vosa ena sega ni yali na ka ca: ia ko koya sa tarova na tebenigusuna sa vuku.” (Vosa Vakaibalebale 10:19; 27:12) Se rawa tiko ga mo dau veinanumi qai dau veivukei.

E sega li ni dina ni vuqa era sa sega ni dau kere veivosoti, ke sega mada ga ni okati kina na veilewai? Ena vuvale ena rairai rarawataka o yalewa, ‘E sega ni bau kere veivosoti vakadua o watiqu.’ E valenicakacaka ena rairai olevaka o koya na iliuliu ni cakacaka, ‘Era sega ni dau tukuna vakadodonu na noqu tamata cakacaka na nodra cala, ra qai sega ni dau kere veivosoti.’ E koronivuli ena rairai tukuna vaka oqo o qasenivuli, ‘Sa ra sega ni vakavulici na gone mera dau kere veivosoti.’

Dua na vuna era dau lomalomarua kina e so mera kere veivosoti, oya nira sega ni na taleitaki. Era leqataka tale ga de ra na matacati, era na sega ni rawa kina ni vakaraitaka na lomadra. O koya sara mada ga e vakaleqai ena saga me levei koya e vakavuna na leqa, oqo ena vakadredretaka nodrau veiyaloni.

Dua tale na vuna era sega ni dau kere veivosoti kina e so, oya na nodra sega ga ni dau kauai. Era na kaya beka, ‘E sega na betena na noqu kere veivosoti.’ E so tale era dau lomalomaruataka na veika e rawa ni yaco kina. Era na veinanuyaka, ‘Au na beitaki beka ena leqa oya, qai tukuni meu sauma vakailavo?’ Ia na vuna levu duadua ga era sega ni kere veivosoti kina e levu, oya na dokadoka. Ni dua e qaciqacia ena sega ni rawa ni kaya “Vosoti au” ni na rairai nanuma, ‘Au sega ni via madua meu vakadinata na noqu cala. Era na raici au sobu kina.’

Se mani ulubale cava ga, e levu era sega ni rawa ni kere veivosoti. E gadrevi dina li na kere veivosoti? Na cava na kena yaga?

[iYaloyalo ena tabana e 3]

“Sa ra sega ni vakavulici na gone mera dau kere veivosoti”

[iYaloyalo ena tabana e 3]

“Era sega ni dau tukuna vakadodonu na noqu tamata cakacaka na nodra cala”

[iYaloyalo ena tabana e 3]

“E sega ni bau kere veivosoti vakadua o watiqu”