Soli​—Kevaka Mada ga e Rui Tarabi

“E SEGA sara ga ni milamila vei au ke oni kaya niu dau kerekere, baleta niu kerekere tiko ena vuku i Jisu.” Oqori na ka e kaya e dua na italatala ni lotu Tawase e vakavotuya na veileti e dau basika ni veivosakitaki na kena vakailavotaki na lotu. E rawa wale ga ni cicivaki na isoqosoqo ni lotu ke levu era cuqena vakailavo. Ena gadrevi mera saumi na italatala, me tara ra qai vakavinakataki na valenilotu, me vakailavotaki tale ga na cakacaka ni kaulotu. Ena kau gona mai vei na ilavo?

Na duanaikatini, e kena iwali vei ira e vuqa na lotu.a “E vakayagataka na Kalou na duanaikatini me qaravi kina vakailavo nona matanitu e vuravura,” e kaya e dua na dauvunau o Norman Robertson. “Oya na sala ni rawailavo me vakarogoi kina na Kosipeli.” Ni sega ni madua ni uqeti ira nona lewenilotu ni dodonu mera soli, a tukuna kina ena doudou: ‘Na duanaikatini e sega ni ka o solia baleta ni o rawata. Oqo e ivakaraitaki ni talairawarawa. Ke o sega ni solia na duanaikatini, o sa voroka tiko na ivakaro ni Kalou. O sa vakayagataka tiko vakatawadodonu na ilavo.’​—Tithing​—God’s Financial Plan.

O na rairai duavata ni tiki ni sokalou vakarisito na soli. Ia, e sega li ni vakatuburarawa qai veivakasosani na kerei wasoma ni ilavo? Na daunicioloji mai Brazil o Inácio Strieder, a beitaka na lotu ni vakayagataka na duanaikatini me wali kina na “leqa vakailavo ni nodra isoqosoqo ni lotu,” qai kuria ni veika e caka oqo e “cala, torosobu qai veicalati.” E tukuna kina, “nira sa lai nanuma o ira na sega ni cakacaka, o ira na yada, o ira na tu ena itikotiko vakaloloma, kei ira e rawarawa ni moici nodra vakasama ni sa biuti ira na Kalou, ni sa nodra itavi ga mera soli ilavo vakalevu vua na italatala veitalia ke ra mani sega ni kana na nodra dui vuvale.”

O na taroga beka: ‘Era sa muria tiko beka na ivakavuvuli vakaivolatabu na veilotu era lavaka tiko me soli na duanaikatini? Se tiko beka e so na lotu era vakarerei ira na lewenilotu nira kaya ni na totogitaki ira na Kalou ke ra sega ni soli? Se me vaka era kaya e so ni namaka vei keda na Kalou meda soli kevaka mada ga e rui tarabi?’

[iVakamacala e ra]