Ka e Vulici Mai na iVolatukutuku ni Sucu i Jisu

MILIONI era kauaitaka na ka e yaco ni bera kei na gauna sa sucu kina o Jisu. E laurai oqo ena drama kei na ivakatakarakara e vakaraitaki me baleta na sucu i Jisu e veiyasa i vuravura ena gauna ni Kirisimasi. Dina ni solevutaki na veika era yaco ena sucu i Jisu, ia a sega ni volai oqori ena iVolatabu mera vakamarautaki ga kina na tamata. Era tiki ni iVolatabu e uqeta na Kalou me veivakavulici qai veivakadodonutaki.​—2 Timoci 3:​16.

Ke a vinakata na Kalou mera solevutaka na sucu i Jisu na lotu Vakarisito, ke a vakamatatataki ena iVolatabu na kena tikinisiga. Vakacava a tukuni beka ena iVolatabu? Ni tukuna oti o Albert Barnes, e dua e dau dikeva na iVolatabu ena ika19 ni senitiuri, ni sucu o Jisu ena bogi nira yadrava toka nodra qelenisipi e tautuba na ivakatawa, sa qai tinia: “E matata e ke ni sucu na noda iVakabula ni bera na ika25 ni Tiseba . . . E gauna batabata donuya na gauna oya, vakauasivi ena vanua cecere kei na veiulunivanua volekati Peceliema. E sega ni vakatakila na Kalou na gauna e sucu kina o [Jisu]. . . . E sega tale ga ni bibi me kilai; ke vinakati me kilai, ke a taqomaka na Kalou na kena ivolatukutuku.”

Kena veibasai, eratou vakamatatataka na le va eratou vola na Kosipeli na siga a mate kina o Jisu. E yaco ena siga ni Lakosivia, ena vulaitubutubu ni ika14 ni Naisani ena nodra ivolanivula na Jiu. Kuria, e vakaroti ira sara ga nona imuri o Jisu mera solevutaka na siga oya mera vakananumi koya kina. (Luke 22:19) E sega ni bau vakaroti ena iVolatabu me solevutaki na siganisucu i Jisu, se na nona siganisucu e dua tale. Ka ni rarawa, ni veiletitaki ni tikinisiga a sucu kina o Jisu e rawa ni vakaruguta na veika bibi cake sara era yaco volekata na gauna oya.

Digitaki Rau na iTubutubu na Kalou

Mai na vica vata na udolu na vuvale e Isireli, na itubutubu vakacava a digitaka na Kalou me susugi Luvena? A kauaitaka beka me digitaka na itubutubu erau rogo rau qai vutuniyau? Sega. A raica o Jiova na nodrau ivakatagedegede vakayalo. Dikeva mada na sere ni vakavinavinaka i Meri, e volai ena Luke 1:​46-​55 (VV), a lagata ni sa tukuni oti vua nona itavi dokai me na tinana na Mesaia. E kaya: “Sa vakalagilagia na Turaga [o Jiova] na yaloqu . . . ni sa nanuma na i tutu vakaloloma ni nona vada.” E vakatokai koya me dua e “vakaloloma,” me vada i Jiova. Koya e bibi sara, na totoka ni sere ni veivakacaucautaki i Meri e vakatakila ni daumaka na kena ituvaki vakayalo qai kila vinaka na iVolatabu. Dina ni takavi koya tale ga na ivalavala ca i Atama, a digitaki ga me tina ni Luve ni Kalou e vuravura.

Vakacava ga na wati Meri, me na tama i Jisu vakacabecabe? O Josefa e matai dau cakacaka. Ni dau cakacaka, e qaravi iratou rawa kina nona vuvale, eratou lewe lima na tagane qai rauta ni rua na yalewa. (Maciu 13:​55, 56) A sega ni vutuniyau o Josefa. Ni sa kena gauna vei Meri me lai vakaraitaka na luvena tagane ulumatua ena valenisoro ni Kalou, e rairai rarawa sara ga o Josefa ni sega ni vakarautaka rawa na sipi me isoro. Rau sa mani muria ga na ituvatuva e baleti ira na dravudravua. E kaya na lawa ni Kalou me baleta na tina e vakasucu qai tagane na luvena: “Kevaka sa sega ni rawata e dua na lami, me qai kauta e rua na soqe, se rua na ruve sa gone; e dua mei soro kama, ka dua mei soro ni valavala ca; ena qai sorovaki koya kina na bete, ena qai savasava ko koya.”​—Vunau ni Soro 12:8; Luke 2:​22-​24.

Na iVolatabu e kaya ni “yalododonu” o Josefa. (Maciu 1:​19) Kena ivakaraitaki, a sega ni veiyacovi kei watina me yacova sara na sucu i Jisu. Na ka oqo ena sega ni kilasevati kina na Tama i Jisu dina. Sa na bau dredre dina vei rau na veiwatini vou me rau sega ni veiyacovi ni rau tiko vata ga ena dua na vale, ia oqo e vakaraitaka ni rau raica vakatitobu na itavi dokai me rau susuga na Luve ni Kalou.​—Maciu 1:​24, 25.

Me vakataki Meri, o Josefa e dau gumatua ni qarava na Kalou. E dau cegu ena nona cakacaka e veiyabaki me kauta nona vuvale ena ilakolako siga tolu mai Nasareci i Jerusalemi ena soqo vakayabaki ni Lakosivia. (Luke 2:​41) Kena irairai ni dau vakavulici Jisu tale ga o Josefa me vakaitavi ena sokalou e veimacawa ena valenilotu, e wiliki qai vakamacalataki kina na Vosa ni Kalou. (Luke 2:​51; 4:​16) Sega kina ni vakatitiqataki ni digitaka donu na Kalou na tina i Luvena kei na tamana vakacabecabe.

Era Kalougata na iVakatawanisipi Yalomalumalumu

Dina ni sa vula ciwa tiko o Meri, a saga ga o Josefa me rau gole ina koro i tukana, me lai volai kina, me vaka na ivakaro i Sisa. Ni rau yaco na veiwatini i Peceliema, e sega ni dua na vanua erau kunea me rau vakaicili kina ena osodrigi ni koro. Rau mani vakayagataka ga na valenimanumanu me nodra icili mani sucu kina o Jisu qai vakotori ena ikanakana ni manumanu. Me vakaukauataka nodrau vakabauta, sa qai vakadeitaka o Jiova vei rau na itubutubu yalomalumalumu oqo ni vakadonuya na Kalou na sucu i Jisu. E talai ira beka e so na qase kilai mai Peceliema mera lai vakaukauataki rau na veiwatini? Sega. A vakatakila na veika a yaco na Kalou o Jiova vei ira na ivakatawanisipi gugumatua era yadrava toka nodra qelenisipi ena bogi.

E rairai vei ira na agilosi ni Kalou qai kaya mera lako i Peceliema, era na kunea kina na Mesaia se qai sucu ni “davo koto e na nodra i kanakana na manumanu.” Era kurabui beka se ra lomatarotaro na turaga yalomalumalumu oqo nira rogoca ni tiko ena valenimanumanu na Mesaia se qai sucu? Sega! Totolo ga nodra biuta tu yani nodra qelenisipi ra qai lako i Peceliema. Nira kunei Jisu, era tukuna sara vei Josefa kei Meri na ka e kaya na agilosi ni Kalou. E vakaukauataki kina nodrau vakabauta ni veika kece era yaco sa salavata tiko kei na veika e nakita na Kalou. Eratou mani “lesu tale na i vakatawa ni sipi,” ra qai “vakarokorokotaka, ka vakacaucautaka na Kalou e na vuku ni veika kece ga e ratou a rogoca ka raica.” (Luke 2:​8-​20, VV) Io, e digidigi donu o Jiova ni vakatakila na veika e yaco vei ira na ivakatawanisipi era rerevaki koya.

Eda vulica e ke na veika meda cakava me rawa ni vakadonui keda kina o Jiova. Meda kua ni vaqara rogo se vutuniyau. Me vakataki Josefa, Meri kei iratou na ivakatawanisipi, meda talairawarawa vua na Kalou da qai vakadeitaka nida lomani koya nida vakaliuca na veika vakayalo mai na qarai ni iyau. Io, e levu dina na ka me vulici ni vakasamataki vakatitobu na ivolatukutuku ni veika era yaco ni bera kei na gauna sa sucu kina o Jisu.

[iYaloyalo ena tabana e 7]

Cava e vakaraitaka na rua na ruve a kauta o Meri me isoro?

[iYaloyalo ena tabana e 7]

Digitaka na Kalou me vakatakila na sucu i Jisu vei iratou na ivakatawanisipi yalomalumalumu