Era Kacivaka na Agilosi na Sucu i Jisu

A vakarota o Sisa Akusito na iliuliu kei Roma mera lesu kece na Jiu ina nodra koro mera volayaca. Rau mani lako o Josefa kei Meri i Peceliema, na koro nei Josefa. Sa voleka sara tu ga ni sucu o Meri ena gauna qori.

Ni rau yaco i Peceliema, rau lai tiko sara ena valenimanumanu, qori ga na vanua rau raica rawa. E vakasucumi Jisu tale ga e keri o Meri. E ovici koya ena isulu malumu qai vakadavori koya ena ikanakana ni manumanu.

Ena bogi qori, eratou tiko e tautuba eso na ivakatawanisipi volekati Peceliema, eratou vakaraica tiko na nodratou sipi. E vakasauri ga ni mai duri e matadratou e dua na agilosi, e serauni ratou na lagilagi i Jiova. Dua na ka nodratou rere, ia e kaya na agilosi: ‘Dou kua ni rere. Au mai tukuna e dua na itukutuku marautaki. Sa sucu nikua na Mesaia e Peceliema.’ Ena gauna vata qori, era basika mai macawa e levu na agilosi, era kaya: ‘Me vakalagilagi na Kalou mai lomalagi, me vakacegu o vuravura.’ Oti era yali tale na agilosi. Na cava eratou cakava na ivakatawanisipi?

Ratou kaya na ivakatawa: ‘Tou sa lako sara ga qo i Peceliema.’ Eratou vakusakusa yani, ratou raici Josefa, Meri, kei na gone ena valenimanumanu.

Era qoroqoro kece o ira na rogoca na ka e tukuna na agilosi vei ratou na ivakatawa. E vakasamataka vakatitobu o Meri na vosa kece ya, e sega ni guilecava. Ratou mani lesu na ivakatawa ina nodratou qelenisipi, ratou vakavinavinakataki Jiova ena ka kece ratou raica se rogoca.