“Toro Voleka Yani Vua na Kalou, Ka na Toro Voleka Mai Vei Kemudou Ko Koya”

Veisau na Bula ni Vulici na iVolatabu

KE O sotavi Tony ni se cauravou lailai, o na raica ni o koya e dua na gone ca qai voravora e dau lakova wasoma na nodra igadigadi na gone ca e Serene, Ositerelia. Era bau nona itokani tale ga na ilala ca. Dau levu na gauna era butako, veivala vakailala ra qai veivanavanai e gaunisala.

A tekivu vakatavako o Tony ni se qai yabaki ciwa. Ni yabaki 14, sa dau vakayagataka wasoma na mariwana qai vakasisila nona itovo. Ni qai yabaki 16, sa bobula ena wainimate gaga na heroin, sa vakayagataka tale ga na cocaine kei na LSD​​—⁠“au vakayagataka na wainimate gaga cava ga meu mateni kina,” e kaya o Tony. A qai tauyavutaka tale ga na volitaki wainimate gaga kei na rua na ilala era dau vakacaca. Sega ni dede, sa kilai o Tony ni dua e dauvolitaki wainimate gaga nuitaki ena tokalau kei Ositerelia.

E vakalusia ena dua na siga o Tony e $160 ina $320 na ilavo ni Mereke ena wainimate gaga na heroin kei na mariwana. Eratou sotava tale ga kina vakavuvale na rarawa. E kaya: “Era dau dodoka e mata i keirau vakaveiwatini na dakai leka kei na isele na gone ca era vaqara mai na wainimate gaga kei na ilavo e tu e vale.” Ni oti nona curu vakatolu e valeniveivesu o Tony, e nanuma me dikeva mada vakavinaka na vanua e sa mua tiko kina nona bula.

Dina ga ni daulotu o Tony, ia e vakila ga ni se sega ni volekati koya na Kalou e dau totogitaki ira na ivalavala ca i eli. Ni sikovi koya e rua na iVakadinadina i Jiova, a kurabuitaka o Tony ni sega ni vaka tu oya na ivalavala ni Kalou. Na ka oqo e marautaka sara ga o Tony ni rawa vua me veisautaka nona ivakarau ni bula, me qai vakalougatataki koya na Kalou. E uqeti Tony na ka e tukuna o Jisu Karisito: “Ni sa rawarawa vua na Kalou na ka kecega.” (Marika 10:27) E tarai Tony tale ga vakabibi na veivosa oqo: “Toro voleka yani vua na Kalou, ka na toro voleka mai vei kemudou ko koya.”​​—⁠Jemesa 4:⁠8.

E ka ni bolebole dina vei Tony me veisautaka nona bula me salavata kei na ivakatagedegede ena iVolatabu. E kaya: “Na imatai ni ka au biuta na tavako, oqo e dua na ka e dredre niu biuta, dina ga niu a saga vakavica vata. Ena kaukaua ga i Jiova, au sa biuta kina na wainimate gaga na heroin kei na mariwana, na veika sa vesuka tu noqu bula ena loma ni 15 na yabaki. Au sega vakadua ni nanuma niu na biuta rawa na ivakarau ni bula oqo.”

Rau sa sega ni qai rerevaka o Tony kei watina e dua na Kalou e tawamudu nona vakararawataki ira na tamata i eli​​—⁠na ivakavuvuli e sega sara ga ni kune ena iVolatabu, ia rau sa ciqoma na inuinui ni bula tawamudu ena parataisi e vuravura. (Same 37:​10, 11; Vosa Vakaibalebale 2:​21) “E taura e levu na gauna kei na sasaga meu muria na ivakatagedegede ni Kalou,” e kaya o Tony, “ia ena veivuke ga i Jiova au rawata rawa kina.”

Io, a dau bobula tu o Tony ena vakayagataki ni wainimate gaga, ia oqo e sa mai dua na lotu Vakarisito. Rau solia tu vakaveiwatini na nodrau gauna kei na veika e tu vei rau, ni rau vakayagataka e vica na udolu na aua ena cakacaka ni veivakavulici ena iVolatabu. Rau ogaoga tale ga ena nodrau tubera na luvedrau me rau qarava na Kalou. Na veisau levu oqo e rawati ga ena kaukaua ni Vosa ni Kalou na iVolatabu. Io, me vaka ga e tukuna na yapositolo o Paula, “ni sa bula na vosa ni Kalou, ka kaukauwa.”​​—⁠Iperiu 4:​12.

Ena ivakaraitaki vinaka oqo, era se kaya tiko ga e so ni cakacaka ni veivakavulici ena iVolatabu era cakava tiko na iVakadinadina i Jiova, e vakacaraka na bula vakavuvale, e kauta laivi tale ga na ivakavuvuli yaga vei ira na itabagone. Ia, na ivakaraitaki nei Tony e vakacala sara ga na rai cala oya.

Me vakataki Tony, e levu era vulica ni rawa nira sereki mai na veika ca era bobula tu kina. Ena sala cava? Nodra vakabauta na Kalou, nodra vakararavi vua kei na nona Vosa, kei na nodra veitokoni na lotu Vakarisito dau loloma. A qai tinia ena marau o Tony: “Au vakadinadinataka na kena taqomaki rau na luvequ na ivakavuvuli ni iVolatabu. E vukea tale ga na noqu bula vakawati. Ia oqo sa qai rawa vei ira na tiko tikivi keitou mera moce vinaka, niu sa sega tale ni vakasosataki ira me vaka e liu.”

[Tikina bibi ena tabana e 9]

‘Ena kaukaua i Jiova, au biuta kina na wainimate gaga a vesuka tu na noqu bula ena loma ni 15 na yabaki’

[Kato ena tabana e 9]

Yaga ni iVakavuvuli Vakaivolatabu

E vuqa na ivakavuvuli vakaivolatabu e sereki ira e levu era bobula tu ena wainimate gaga. Oqo e so vei ira na ivakavuvuli oya:

“Me da vakasavasavataki keda mai na dukadukali kecega ni yago kei na yalo, me da ia sara na ka savasava e na rere vua na Kalou.” (2 Korinica 7:⁠1) E veisaqasaqa kei na ivakaro ni Kalou na vakayagataki ni wainimate gaga.

“A rerevaki Jiova na vu ni vuku; kei na kilai Koya sa Yalosavasava sa ka ni veivakayalomatuataki.” (Vosa Vakaibalebale 9:​10) Na rerevaki Jiova e yavutaki ena noda kilai koya kei na noda muria nona sala, e vuqa gona era vukei mera sereki mai na vakayagataki ni wainimate gaga.

“Mo vakararavi vei Jiova e na vu ni yalomu: ka mo kakua ni vakararavi ki na nomu yalomatua: mo vakarogotaka vua na nomu sala kecega, ia ena vakadodonutaka na nomui lakolako ko koya.” (Vosa Vakaibalebale 3:​5, 6) E rawa ni cavuraki na ivakarau ca e sa matau tu vei keda ena noda nuitaka na Kalou mai vu ni lomada kei na noda vakararavi vua.