O sa Lokuca na Gauna mo Vuli iVolatabu Kina?
ENA yabaki sa oti, a vakarogoya kina na iLawalawa Dauvakatulewa e dua na veisau me baleta na soqoni vakaivavakoso. Na veisau qori ena levu kina na gauna ni vuli iVolatabu kei na veivosaki vakavuvale. Ke o ulunivuvale, mo vakadeitaka me caka e veigauna na vuli iVolatabu vakavuvale e veiganiti. O ira na veiwatini sega ni vakaluveni, e gauna vinaka qori mera vulica vata kina na iVolatabu. O ira na sega ni vakawati qai sega nodra icolacola ena vuvale, e gauna vinaka qori mera vuli iVolatabu kina vakataki ira.
E levu era marautaka na ituvatuva ni kena lokuci na bogi ni Sokalou Vakavuvale. Kena ivakaraitaki, a vola o Kevin e qase ni ivavakoso: “E sega ni dua na vosa me vakamacalataki kina na neimami vakavinavinaka na lewe ni ivavakoso. Keitou a veivosakitaka na qase na sala me vakayagataki kina na bogi galala qori, me muri sara ga kina na ka e vakarota na iLawalawa Dauvakatulewa—ya na vuli vakavuvale.”
A vola o Jodi, e qase ni ivavakoso o watina: “E tolu na luvei keirau yalewa, e yabaki 15, 11, koya e gone duadua e yabaki 2. Keitou toki ena dua na ivavakoso vosa vagalu. E taura na gauna qai ka ni sasaga me keitou vakavakarau ena soqoni kece. Ni caka gona na veisau qo, sa tiko na bogi e vakatabakidua ena sokalou vakavuvale!”
Rau vola na veiwatini o John kei JoAnn, rau veiqaravi vakapainia tudei: “Levu na gauna e sega ni dei na neitou vuli iVolatabu vakavuvale ni lailai na gauna, keitou qai ogaoga vakalevu ena itavi vaKarisito. E isolisoli dina i Jiova na ituvatuva vou qo, e vu ni veivakaukauataki vakayalo—ke vakayagataki na gauna ena inaki dina a soli kina.”
O Tony, e dua na cauravou yabaki 20 vakacaca, e nakita dei me nona bogi ni vuli na Tusiti. E vakayagataka na vo ni gauna ena loma ni macawa me vakavakarau ina soqoni ni ivavakoso. Ia e tukuna o Tony, “Au dau nanamaki vakalevu ena siga Tusiti.” Na vuna? “E gauna vinaka duadua meu veikilai kina kei Jiova. Au vulica ena loma ni rua na aua na ulutaga ena vaqaqacotaka noqu veiwekani kei Jiova. Ni levu na gauna meu vuli kina, e rawa niu vakasamataka vakatitobu na veitikinivolatabu.” Na cava e yaco kina? “Sa qai uqeta dina na lomaqu na ivakasala i Jiova ni vakatauvatani ena gauna eliu.” A tukuna sara e dua na kena ivakaraitaki. “Au wilika ena ivola na Insight na nodrau veitokani o Tevita kei Jonacani. Levu sara na ka au vulica ena nona sega ni dau nanumi koya ga o Jonacani. Na ivakaraitaki ya e uqeti au meu raica vakabibi na ka e okati ena itokani vinaka. Au vakanamata ena bogi ni Tusiti meu vulica kina eso tale na ka talei!”
Sega ni vakabekataki ni na yaga sara vei ira na dauveiqaravi i Jiova na nodra vakayagataka vinaka na gauna galala ena vuli iVolatabu kei na sokalou vakavuvale e veiganiti.