Sala Mo Veiraurautaka Kina Nomu Raica na Cakacaka
NI YACO tu e vuravura na ivakarau ni bula osooso ni veivoli, na veiqatitaki ni kena rawati na ka, kei na kena sa vakayagataki ga na misini me buliyaya, e vuqa era sa sega ni via lai cakacaka kina e veisiga. Ia, e dodonu meda marautaka na noda cakacaka. Cava na vuna? Nida a buli ga meda ucuya na Kalou—ni dau marautaka o koya na ka e cakava. Me kena ivakaraitaki, nona vakaraica tiko na veika sa bulia ni cava na ikaono ni “siga,” se dua na gauna balavu, a tukuna na Vakatekivu 1:31: “A sa vakaraica na Kalou na ka kecega sa bulia ko koya, ka raica, sa ka vinaka sara.”
Sega ni vakabekataki ni dua na vuna e vakatokai kina o Jiova me “Kalou mamarau” baleta ni dau marautaka na ka e cakava. (1 Timoci 1:11, NW) O koya gona, sega li nida na marau vakalevu cake ke da vakatotomuri koya ena levu na gauna? Ena tikina oqo, a vola kina o Solomoni na tui Isireli makawa, e dua na dautaravale maqosa qai dau maqosa tale ga na tuvanaka na ka e cakava: “Me kana . . . ka gunu na tamata yadua, ka kunea na kena vinaka ni nona cakacaka kecega, sai koya oqo nai solisoli ga ni Kalou.”—Dauvunau 3:13.
E ka ni bolebole na nomu saga mo bucina na rai e veiraurau qai vinaka me baleta na cakacaka ena gauna oqo, ni dau veiveisau vakalevu na vanua ni cakacaka. Ia na Kalou o Jiova ena vakalougatataki ira era talairawarawa ina nona veidusimaki yalololoma. (Same 119:99, 100) O ira na tamata cakacaka vaka oqo era dau taleitaki qai nuitaki, e dredre kina mera vakayalia na nodra cakacaka. Era vulica gona mera kua ni kauaitaka ga na nodra bula vakayago, mera kauaitaka tale ga na nodra bula vakayalo. Ena vukei ira mera vakatulewataka vinaka kina na nodra bula ra qai raica tale ga ni nodra marau kei na nodra nuidei e sega ni vakatautaki ina nodra cakacaka se na ivakarau veilecayaki ni cakacaka e vuravura. (Maciu 6:31-33; 1 Korinica 2:14, 15) E vukei ira mera bucina na rai e veiraurau me baleta na ivakarau ni nodra cakacaka.
Me Vakalou na iVakarau ni Nomu Cakacaka
E so era sa dau cakacaka tu ga, era vakaliuca ga na nodra cakacaka. So tale era vinakata me totolo ga mai na gauna ni suka mera lako i vale. Ia, na cava na rai e veiraurau? E sauma na iVolatabu: “Sa vinaka ni tawa tu e dua bau na liga ni sa tu vata kei na vakacegu, ka ca ni sa tawa tu na liga ruarua ka tu vata kei na oca kei na yalorarawa.” (Dauvunau 4:6) E tawayaga ke sa sivia tale na noda cakacaka, se mani sa rui balavu na gauna ni cakacaka—ni na kunei wale kina “na oca kei na yalorarawa.” Cava na vuna? Ni na rawa ni vakacacana sara ga na ka e dau vakavuna na noda bula marau dina: noda veimaliwai e vale kei ira na noda itokani, noda bula vakayalo, noda bula vakayago, kei na balavu ni noda bula sara mada ga. (1 Timoci 6:9, 10) Na rai e veiraurau, oya na noda lomavakacegu ga ina veika lailai eda sa rawata, sega ni noda cakacaka vakasivia me levu kina na ka eda rawata qai kune kina na veileti kei na leqa.
Dina ni vakauqeta na rai e veiraurau oqo na iVolatabu, ia e sega ga ni tokona na vucesa. (Vosa Vakaibalebale 20:4) Na vucesa e vakavuna me beci koya kina e dua, ra qai beci koya tale ga kina na tani. O koya e ca sara, ni na vakacacana na noda veiwekani kei na Kalou. Na iVolatabu e kaya vakadodonu me kua ni kana na tamata e sega ni cakacaka mera kua ni vakaleqai kina e so. (2 Cesalonaika 3:10) Ia, ena dodonu me veisautaka na nona ivakarau ni bula qai cakacaka vakaukaua tale ga me qaravi koya vinaka kina kei ira era vakararavi vua. Nona cakacaka vakaukaua ena rairai vukei ira kina na gadreva dina tu na veivuke—na itovo e uqeta na Vosa ni Kalou.—Vosa Vakaibalebale 21:25, 26; Efeso 4:28.
Vakavulici ni se Gone me Taleitaka na Cakacaka
Na ivakarau ni cakacaka vinaka e sega ni dau basika ga vakacalaka; e dodonu me vulici ni se gonelailai e dua. Oya na vuna, e vakaroti ira kina na itubutubu na iVolatabu: “Vakatavulica na gone e na sala e dodonu me lako kina: ia ni sa qase mai, ena sega ni lako tani maikina.” (Vosa Vakaibalebale 22:6) Me ikuri ni nodra virikotora na ivakaraitaki vinaka ni nodra dau cakacaka, era na tekivu veivakavulici na itubutubu yalomatua ena nodra lesia vei ira na gone mera cakava e so na itavi e vale me lako vata kei na yabaki ni nodra bula. Dina nira na vuturitaka beka e so na gone na itavi e soli vei ira, ia era na raica nira dua tale ga na lewenivuvale yaga—vakauasivi ke vosa vakacaucautaki ira o Ta kei Na ena vuku ni cakacaka vinaka era cakava. E ka ni rarawa, ni so na itubutubu era dau cakava na ka kece ga vei luvedra, de dua era nanuma ni oqo e ivakaraitaki ni nodra loloma. Ia, mera nanuma vinaka tiko na itubutubu ni o ira na gone vaka oqo era na sega ni dau vakavinavinaka nira qase mai.
O ira na itubutubu dau kauai era na kauaitaka na nodra ka ni vuli na luvedra, era na vakauqeti ira mera vuli qai cakacaka vakaukaua tale ga e koronivuli. Oqo ena vukei ira vakalevu na itabagone ena gauna era kunea kina e dua na nodra cakacaka.
Digitaka Vinaka Nomu Cakacaka
E sega ni tukuna vei keda na iVolatabu na cakacaka cava meda digia, ia e solia ga vei keda e so na idusidusi yaga me kua ni vakaleqa kina na noda toso vakayalo, noda veiqaravi vua na Kalou, kei na so tale na itavi bibi. Me kena ivakaraitaki, a vola na yapositolo o Paula: “Sa vakalekalekataki na gauna sa vo: ia oqo mera vakataki ira . . . era sa vakayagataka na veika ni vuravura oqo, mera vakataki ira [ga] era sa sega ni vakayagataka vakasivia: ni sa lako tani yani na ivalavala ni vuravura oqo.” (1 Korinica 7:29-31, NW) Sega ni dua na ka ena tudei ena ivakarau ni veika nikua. Ke da vakayagataka gona kina na noda gauna kei na noda kaukaua kece, e vaka sara ga nida vakayagataka na ilavo kece eda maroroya tu mai ena noda bula taucoko meda tara kina e dua na vale ena vanua e dau waluvu vakalevu. Sa dua dina na vakatulewa lialia!
E dua tale na ivakadewa ni iVolatabu e vakadewataka na yatuvosa “sega ni vakayagataka vakasivia” me “sega ni oga kina.” (Vakavakadewa Vou) Era sega ni lecava na tamata yalomatua na kena sa “vakalekalekataki” na gauna sa vo ena ituvaki oqo, o koya gona na nodra “oga” kina era na tini sotava na rarawa kei na leqa.—1 Joni 2:15-17.
‘Ena Sega Sara ni Laivi Iko na Kalou’
E kila vinaka cake o Jiova na ka e vinaka vei keda. E kila tale ga na gauna eda sa donuya tu oqo me salavata kei na nona inaki. O koya gona, e tukuna vei keda: “Mo dou kakua ni daukocova nai lavo: ia dou lomavinaka e na ka sa tu vei kemudou: ni sa kaya ko koya [na Kalou], Au na sega ni biuti iko, se vakalaivi iko.” (Iperiu 13:5) Sa dua dina na vosa veivakauqeti! Nona vakatotomuria na nona dauveikauaitaki vakayalololoma na Kalou vei ira na nona tamata, e vakayagataka kina o Jisu e dua na iwase levu ni nona Vunau ena Ulunivanua me vakavulici ira kina na nona tisaipeli, ena ivakarau ni rai donu me baleta na cakacaka kei na veika vakayago.—Maciu 6:19-33.
Era saga na iVakadinadina i Jiova mera muria tale ga na ivakavuvuli oya. Me kena ivakaraitaki, a vakasuka e dua na daunilivaliva e iVakadinadina na veisureti nei nona boso me dau cakacaka tale tiko nira sa suka. Na vuna? Ni a sega ni vinakata me butakoca na gauna e dodonu me vakayagataka vei iratou na nona vuvale kei na nona bula vakayalo. Nona tamata dau cakacaka vinaka qai nuitaki, a doka kina o nona boso na nona vakatulewa. E dina, ni na sega ni tini kece vaka oya na ka eda na sotava, rairai ena gadrevi vua e dua me qara e dua tale na nona cakacaka e veiraurau kina na ivakarau ni nona bula. Ia, o ira ga era vakararavi vakatabakidua vei Jiova era na kunea ni na dokai ira na nodra boso ni cakacaka, ke vinaka na nodra itovo kei na nodra ivakarau ni cakacaka.—Vosa Vakaibalebale 3:5, 6.
Gauna ena Marautaki Kina na Cakacaka Kece Ga
Ena ituvaki ni vuravura leqaleqa oqo, ena kune na leqa kei na ituvaki tawanamaki ena vanua ni cakacaka kei na vanua e nanumi ni na rawati kina na cakacaka. Na kena dina, ni na rawa ni ca sara ena levu ni tiko yavavala e vuravura qai veiveisau na ituvaki vakailavo se mani kasura sara mada ga. Ia, ena yaco vakalekaleka ga. Ni sega ni dede, era na cakacaka na tamata kece. Kuria oya, ena guta na lomadra na cakacaka kece ra qai marautaka tale ga. Ena rawa vakacava? Na cava ena vakavuna na veisau oqo?
Ena gusui nona parofita o Aisea, a cavuta kina o Jiova na gauna oya. “Ka’u sa bulia na lomalagi vou kei na vuravura vou,” e kaya o Jiova, “ia ena sega ni nanumi na ka eliu, ena sega ni curu tale ki na lomamudou.” (Aisea 65:17) A cavuta tiko o koya e dua na matanitu vou ena vakatura, ena cadra dina kina e dua na isoqosoqo tamata vou.—Taniela 2:44.
Me baleta na sala era na bula qai cakacaka kina na tamata ena gauna oya, e tomana na parofisai: “A ra na tara vale, ka tiko kina; era na tea eso na were-ni-vaini, ka kania na vuana; era na sega ni tara, ka tiko kina na tamata tani, era na sega ni tea, ka kania na tamata tani: ia me vaka na kena dede e dua na kau ena vakakina na nodra gauna na noqu tamata, ia era na rekitaka vakadede na cakacaka ni ligadra ko ira na tamata ka’u sa digitaka. Era na sega ni oca walega, se vakasucu gone me ka ni rarawa vei ira; ni ra sa nodra kawa na tamata era sa vakalougatataki maivei Jiova, ko ira kei na luvedra talega.”—Aisea 65:21-23.
Ena dua dina na veisau levu ena kauta mai na vuravura vou e tuvanaka na Kalou! Sega li ni o taleitaka mo na bula ena vuravura vaka oya, na vanua o na “sega ni oca walega” ia o na marautaka na vakayagataka na ‘vua’ ni nomu cakacaka? Dikeva se o cei ena marautaka na veivakalougatataki oqo: “[O i]ra sa nodra kawa na tamata era sa vakalougatataki maivei Jiova.” O na rawa ni dua vei ira na “vakalougatataki” oqo ena nomu vulici Jiova qai sauva na nona ivakatagedegede. A kaya o Jisu: “Sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.” (Joni 17:3) Era marautaka na iVakadinadina i Jiova mera vukei iko mo rawata na kilaka, ena rawati kina na bula mai na nomu vulica vakaikabakaba na Vosa ni Kalou, na iVolatabu.
[Kato ena tabana e 6]
‘RA VINAKATI VAKALEVU’
“Na ka kecega dou sa cakava, kitaka mai na vu ni yalomudou me vaka vua na Turaga, me kakua ni vaka vei ira walega na tamata,” e kaya na iVolatabu. (Kolosa 3:23) E macala nira na vinakati vakalevu na tamata cakacaka era yavutaka na nodra ivakarau ni cakacaka ena ivakavuvuli totoka oqo. A vakavuna kina me vakasalataki ira na itaukei ni cakacaka o J. J. Luna ena nona ivola na How to Be Invisible, mera digi ira ga era lewenilotu kaukaua ni so na lotu, ia a tomana: “Sa vaka me kena ivakarau mera dau tauri ga na iVakadinadina [i Jiova].” E dua gona na vuna a vakamacalataka o koya, oya na nodra kilai nira daudina, yaco kina mera “vinakati vakalevu” ena vuqa na taba ni cakacaka.
[iYaloyalo ena tabana e 5]
Vakavumarau na veiraurautaki ni cakacaka kei na veika vakayalo, vaka kina na ka ni veivakamarautaki