Sala me Marautaki Kina na Cakacaka Vakaukaua

INAKI DONU NI CAKACAKA

Se o mani vakayagataka vakalevu nomu vakasama ena nomu cakacaka, se nomu igu se cava ga o cakava, mo kila tiko ni “yaga na cakacaka kaukaua kece.” (Vosa Vakaibalebale 14:​23, NW) Yaga vakacava? Dua na yasana eda na qarava kina na veika vakayago eda vinakata. Yalataka tale ga na Kalou ni na vakarautaka na ka vei ira era sokaloutaki koya ena yalodina. (Maciu 6:​31, 32) Ia e namaka meda vakayacora na noda itavi meda cakacaka vakaukaua, meda kua ni vakasavuliga se rawaka vakailoa.​—2 Cesalonaika 3:​10.

Rawa gona nida raica noda cakacaka me vaka e dua na isausau me sauvi. Na cakacaka e sala vinaka me colata kina e dua na nona itavi. E kaya o Josua e yabaki 25: “Ni o qaravi iko ga, o sa colata tiko na nomu itavi. Ke o sauma rawa na veika o gadreva, sa yaga nomu cakacaka.”

Ke da dau cakacaka vakaukaua eda na sega ni beci keda. Na cakacaka e vinakati ga kina na gumatua. Ke vakavucesa mada ga na cakacaka se dredre, ia eda saga meda dei tiko kina, eda na kila nida sa sauva e dua na ivakatagedegede vinaka. Eda na sega ni rawai meda vakaiulubale meda kua ni cakacaka vakaukaua. (Vosa Vakaibalebale 26:14) Eda na marautaka kina vakalevu na noda cakacaka. E kaya o Eroni, sa cavuti oti: “Au dau vakila na marau ni levu na ka au cakava ena dua na siga. Deu na oca, ra sega tale ga ni raica na kena vo na noqu cakacaka, ia au kila niu sa rawata e dua na ka.”

DAU CAKACAKA

Na iVolatabu e vakacaucautaka na turaga e “daugumatua e na nona cakacaka” kei na yalewa e “makututaka na cakacaka ni ligana.” (Vosa Vakaibalebale 22:29; 31:13) Sega ni tu tu ga sa maqosa e dua ena nona cakacaka. Vica ga era dau taleitaka na cakava na ka era sega ni vinaka kina. De dua qori na vuna era sega ni marautaka kina e levu na nodra cakacaka, era sega ga ni sasaga mera vinaka cake kina.

Ia se mani cava eda cakava, e rawa nida marautaka ke donu na vuna eda cakava kina, kena inaki, da maqosa tale ga kina. E kaya o Viliame e yabaki 24: “Ni o solia nomu vinaka kece ena dua na cakacaka, o na marautaka. O na sega ni marau ke o muria eso na sala me oti totolo ga kina na cakacaka, se o dau vakasavuliga.”

ME YAGA

Kua ni vakasamataka tiko ga na ilavo o na rawata. E vinaka mo taroga: ‘Cava e bibi kina na cakacaka qo? Cava ena yaco ke sega ni caka, se me caka vakavinaka? O cei tale ena yaga vua noqu cakacaka?’

Bibi na iotioti ni taro, ni dau marautaki na cakacaka nida raica na kena yaga vei ira eso tale. E kaya sara mada ga o Jisu: “E marau vakalevu o koya e solia na ka, vakalailai o koya e taura na ka.” (Cakacaka 20:35) Sega ni yaga ga noda cakacaka vakaukaua vei ira na dauvolivoli se o ira na vakacakacakataki keda, dua tale na iwasewase e yaga vei ira. Qo o ira na lewe ni noda vuvale kei ira na leqa tu.

Noda vuvale. Rua na sala ena yaga kina nona cakacaka vakaukaua na ulunivuvale. Kena imatai, e raica me tiko na ka me bula kina nona vuvale, na kakana, isulu, kei na vale. E vakayacora kina nona itavi lesi vakalou me “qaravi ira na kainona.” (1 Timoci 5:8) Kena ikarua, ke cakacaka duadua tiko o koya, sa vakavulica tiko nona vuvale ena bibi ni cakacaka vakaukaua. E kaya o Savenaca, a tukuni ena ulutaga sa oti: “iVakaraitaki vakasakiti o tamaqu ni dau cakacaka. E turaga daudina, e cakacaka vakaukaua ena nona bula taucoko, levu na gauna e cakacaka kina vakamatai. Au vulica ena nona ivakaraitaki nida rawa ni ligamaqosa, meda ta iyaya kina me yaga.”

Ira na leqa tu. E vakarota na yapositolo o Paula vei ira na lotu vaKarisito mera “cakacaka ga vakaukaua . . . [mera] solia kina e dua na ka vei koya e leqa tu.” (Efeso 4:​28) Nida cakacaka vakaukaua me baleti ira noda vuvale, eda rawa tale ga ni vukei ira era sega soti ni rawaka. (Vosa Vakaibalebale 3:​27) Noda cakacaka gona vakaukaua eda vakila kina na marau e rawati ga ena noda dausolika.

CAKACAKA VAKALEVU

Ena nona ivunau rogo o Jisu ena Ulunivanua, e kaya kina: “Ke vakasaurarataki iko e dua na vakailesilesi mo drau lako vata ena dua na kilomita, tomani koya me rua na kilomita.” (Maciu 5:​41) O na muria vakacava na ivakavuvuli qori ena nomu cakacaka? Kua ni vakasavuliga, qara e levu tale na ka mo cakava mai na kena ga e soli vei iko. Me dua nomu isausau, saga mo vakavinakataka nomu cakacaka se me totolo cake mai na kena e namaki vei iko. Kua ni vakawalena na cakacaka lalai mada ga o cakava.

Ni levu tale na ka o cakava, o na marau kina. Na vuna? O iko sara ga o lewa tiko na ka o cakava. O cakava e levu na ka ni o vinakata sara ga, sega ni dua e vakasaurarataki iko kina. (Filimoni 14) Eda nanuma kina na ivakavuvuli ena Vosa Vakaibalebale 12:​24, NW: “Na ligadra na gugumatua ena veiliutaki, ia na ligadra na vucesa ena vakacakacakataki vakaukaua.” E dina qo ni so era dau vakabobulataki se vakacakacakataki vakaukaua. O koya e dau vakasavuliga ena nanuma ni vaka tu na bobula ni colata tiko nodra ivua eso tale. Ia o koya e levu na ka e cakava, baleta ni vinakata, e lewa vinaka nona bula. E sega ni dua e lewa vua na ka e cakava.

ME TIKO GA NA GAUNA NI CAKACAKA

Era dau qoroi na cakacaka vakaukaua, ia sega ni tukuni mo sa cakacaka tu ga. E uqeta tale ga na iVolatabu na gumatua. (Vosa Vakaibalebale 13:​4, NW) E sega ga ni uqeta me dua e bobula ina nona cakacaka. E kaya na Dauvunau 4:6: “Sa vinaka ni tawa tu e dua bau na liga ni sa tu vata kei na vakacegu, ka ca ni sa tawa tu na liga ruarua ka tu vata kei na oca kei na yalorarawa.” Cava kena ibalebale? Koya e bobula ena nona cakacaka ena rairai sega ni marautaka na ka e cakava ni sa vakayagataka kece kina nona gauna galala kei na kaukaua. Ena sega ni yaga nona cakacaka ni tu vata na “oca kei na yalorarawa.”

E rawa ni vukei keda na iVolatabu me donu noda rai me baleta na cakacaka. E tukuni kina meda dau cakacaka, e vakasalataki keda tale ga meda “vakadeitaka kina na veika era bibi sara.” (Filipai 1:​10) Na cava na veika bibi qo? Okati kina noda gauna vata kei ira noda vuvale vaka kina o ira noda itokani. Bibi sara na veika vakayalo, me vaka na wiliki ni Vosa ni Kalou kei na noda vakasamataka vakatitobu.

O ira na dau tuvanaka vinaka na ka era cakava era rawa ni marautaka vakalevu nodra cakacaka. E kaya o Viliame, sa cavuti oti mai: “iVakaraitaki vinaka e dua noqu boso makawa, ni dau tuvanaka vinaka nona cakacaka. E cakacaka vakaukaua, e totoka nona veimaliwai kei ira e dau veivoli kei koya, ni vinaka na ivakarau ni nona cakacaka. Ni cava e dua na siga, e kila ni sa oti tale ga nona cakacaka, me sa kauaitaka nona vuvale kei na nona sokalou. Kena yaga? E dua vei ira na turaga mamarau meu bau kila!”