Taro na Dauwiliwili
Na cava e kaya kina na Aisea 30:21 ni rogo mai ‘dakuda’ na vosa i Jiova, ni vakaraitaka na tikina e 20 ni duri tu e matada o Jiova, nida wilika ni “matamuni ena yaco me mata e raica na nomuni Dauniveivakavulici Levu”?
E kaya na Aisea 30:20, 21 (NW): “Ena sega tale ni vunitaki koya na nomuni Dauniveivakavulici Levu, na matamuni ena yaco me mata e raica na nomuni Dauniveivakavulici Levu. Kei na daligamuni ena rogoca e dua na vosa mai dakumuni ni kaya tiko: ‘Oqo na sala. Mo ni lako kina, oi kemuni na tamata,’ de oni lako ina imatau se oni lako ina imawi.”
E laurai e ke ni o koya e wiliwili tiko e raici Jiova, na Dauniveivakavulici Levu ni tu e matana, ia e vaka ni lako mai dakuna na rorogo ni vosa i Jiova. Me kua ni guilecavi ni veivosa oqo e vakatayaloyalo, ena vaka kina na kena ibalebale.
Na tikina e 20 e boroya e dua na iyaloyalo ni dua na tamata e tu e tiki ni nona turaga qai tu vakarau me cakava na ka kece e vinakata o koya. Ena dau raica matua na yavala ni liga i nona turaga me kila kina se cava e lomana. Era vaka tale ga oqo na tamata i Jiova nikua, nira raica matua na ivakasala e yavutaki vakaivolatabu sa qai makare tiko ga mai na nodra kila, e vakarautaka o Jiova ena nona vakayagataka na nona isoqosoqo e vuravura. (Same 123:1, 2) Io, era muria na veidusimaki i Jiova, ra qai yadrava na veika kece e vakatakila mai, ena nona vakayagataka “na dauveiqaravi yalo dina ka vuku.”—Maciu 24:45-47, VV.
Vakacava na vosa era rogoca na nona tamata e vaka ni lako mai dakudra? E rawa ni tukuni ni oqo na vosa ni Kalou a cavuta ena gauna makawa e volai ena iVolatabu, ia oqo sa vakamatatataka tiko na nona “dauniyau yalo dina.” (Luke 12:42, VV) O ira gona na tamata ni Kalou nikua era rogoca na domona ena nodra vulica vagumatua na iVolatabu, mera bulataka na kena ivakavuvuli qai dusimaki ira na ivolatabaki vakaivolatabu e vakarautaka “na dauveiqaravi yalo dina ka vuku,” o koya na “dauniyau.” Ena nodra raica matua, ra yadrava na nona veidusimaki na Dauniveivakavulici Levu ena kena gauna dodonu, ra qai vulica na nona Vosa a volai ena vica vata na senitiuri sa sivi, e sega wale ga ni vaka e tu e matadra o Jiova, e lako tale ga mai dakudra na rorogo ni domona.—Roma 15:4.