Dau Dikeva na Vosa i Jiova e Veisiga!

¹ Ena vakatovolei na noda vakabauta ena veisiga kece. De sega ni cegu e dua nomu itokani vakavuravura ena nona sagai iko tiko ga mo drau lai sota taurua ena dua na vanua. E vinakata beka o nomu qasenivuli mo kakavaka e dua na cakacaka isau vinaka, se vinakata o nomu boso mo tosoya nomu cakacaka ena vica tale na aua. Se sa vaka mo tautauvimate mai. O na rawa ni sotava ena dua ga na gauna e so na ka dredre vaka oqo, ia e tiko e dua e rawa ni vukei iko. E tu vakarau o Jiova me vakayalomatuataki iko mo walia rawa kina na veika oqori. Na nomu dau dikeva na tikinivolatabu kei na kena ivakamacala ena Dikevi na iVolatabu e Veisiga e dua na sala o rawa ni tugana kina e lomamu na Vosa i Jiova e veisiga. O dau vakayagataka beka vakavinaka na ivola oqo?

² Sa Tu na iVukevuke: Na Aisea 30:20 e kaya ni o Jiova na ‘ivakavuvuli’ mera na qara veivuke kina na tamata ni Kalou. Ena vukei iko ena ka sara ga o gadreva mo tudei rawa kina ni vakatovolei na nomu vakabauta. Ena sala cava? E vakamacalataka na tikina e tarava: “Dou na qai rogoca e dua na vosa mai dakumudou ka vaka, oqo na sala, dou mai lako tu ga kina.” Nikua, e vakacaudreva o Jiova me cila na nona “vosa” ena iVolatabu, kei na ivola e tabaka “na dauveiqaravi yalo dina.” (Maciu 24:45, VV) Dua na ka na itukutuku e vakarautaki ena Vale ni Vakatawa era sa taba oti, ni veika era tabaki kina e sa voleka ni tara kece ga na veibasoga ni noda bula na lotu Vakarisito. Na noda railesuva na kena era lavetaki ena Dikevi na iVolatabu e Veisiga ena vukei keda meda tawana tiko ga ena noda lololo na kilaka ena yaga vei keda nida sotava na veimataqali leqa.​—Aisea 48:17.

³ Biuta Vakatikitiki na Kena Gauna: E dina ni dau osooso sara na veimataka lailai, e dau saga ga e dua na tina me wilika qai veivosakitaka vata kei na luvena na tikinivolatabu ni dua na siga ena gauna e katalau tiko kina o luvena. Na veivosa oqo kei na masu e iotioti ni vosa e rogoca e veimataka ni bera ni lai vuli. Na rua na ka oqo e vakaukauataki koya me saqata nona temaki me veiyacovi, me kua ni tovaka e dua na matatamata, me vunau tale ga ena doudou vei ira nona icaba e koronivuli kei ira na qasenivuli. Dina ni iVakadinadina duadua ga ena nona koronivuli, ia e sega vakadua ni galili.

⁴ Dau vakararavi vei Jiova kei na nona Vosa me dusimaki iko. Ke o vakayacora oqo, ena qai ka dina vei iko o koya, me vaka sara ga e dua nomu itokani nuitaki. Rai vua ena veisiga kece! Mo duavata mada ga kei ira na vica vata na milioni ena veiyasa i vuravura era dau raica e veisiga na Vosa ni Kalou, me qai ‘raici koya tiko mada ga na iVakavuvuli na matamu.’