“Toro Voleka Yani Vua Na Kalou, Ka Na Toro Voleka Mai Vei Kemudou Ko Koya”
Veisau na Bula ena Kaukaua ni Vosa ni Kalou
E SEGA ni marautaki qai sega na betena vei Matsepang na bula! E marama ni Lesotho, ena loma i Sauca Aferika. A susugi ena lotu Katolika. E sega kina ni vukei me toro voleka vua na Kalou. Ia, era vakacacani koya ga na sisita ena vica vata na yabaki nira dau bacani koya ena ilavo me cakava na itovo vakasisila.
Na ka oqo e vakayalolailaitaki Matsepang kina na lotu qai dredre ni vakabauta ni tiko e dua na Dauveibuli yalololoma e kauaitaki ira dina na tamata. E vakararawataka vakalevu na lomana nona sega ni kauaitaki qai vakacacani, sa lai nanuma kina ni sega na kena yaga. Sa qai voravora ga nona itovo qai dau cudrucudru ni sa qase mai. E vakavuna kina nona dau basulawa.
E lewena sara o Matsepang e dua na ilawalawa era dau butakoci ira na pasidia ena sitimanivanua. A qai tobo mani totogitaki me curu ina valeniveivesu mai Sauca Aferika. E muri sa qai vakau lesu ina nona vanua e Lesotho, ia e lai tomana tiko ga na basulawa, mateni, ivakarau voravora kei na itovo vakasisila.
Ena gauna sara ga e lomabibi tu kina, a masu vagumatua vua na Kalou o Matsepang me vukei koya. E yalataka, “Kemuni na Kalou, keu bula, au na cakava na ka au rawata meu qaravi kemuni kina.”
Sega ni dede, sa ra sikovi koya yani na daukaulotu ni iVakadinadina i Jiova. Era sureti koya me vulica na iVolatabu. Ena nona vuli sa qai kila kina ni dau veikauaitaki qai dau loloma na Kalou. E kila tale ga ni vakayagataka o Setani, na ‘tama ni lasulasu,’ na ilawaki kei na iwalewale qaseqase me bucina e lomadra e so ni sega na kedra yaga, mera qai vakabauta ni na sega vakadua ni lomani ira o Jiova.—Joni 8:44; Efeso 6:11.
Me kena veibasai, e vakacegui Matsepang nona kila nida rawa ni savasava ke da veivutunitaka dina na noda ivalavala ca e liu, da kerea na veivosoti i Jiova, da qai saga meda vakamarautaki koya tiko ga! A vukei me kila ni “cecere cake na Kalou mai na yaloda” qai duatani sara na nona raici keda ni vakatauvatani kei na noda dui raici keda.—1 Joni 3:19, 20,VV.
Dua na ka nona marautaka o Matsepang na vosa i koya na daunisame o Tevita: “Sa voleka ko Jiova vei ira sa ramusu na yalodra; ka sa vakabulai ira sa dasila na lomadra.” (Same 34:18) Ni dua o koya e ‘dasila na lomana,’ sa mai kila ni o Jiova e sega ni biuti ira nona tamata, dina ni so era nanuma ni sa sega na kedra yaga se ra sega ni kauaitaki. E vakayaloqaqataki koya nona vulica ni kauaitaki ira kece nona sipi na Kalou qai tokoni ira nira sotava na ituvaki dredre. (Same 55:22; 1 Pita 5:6, 7) E tarai koya sara ga vakalevu na vosa: “Toro voleka yani vua na Kalou, ka na toro voleka mai vei kemudou ko koya.”—Jemesa 4:8.
E vakadinadinataki sara ga ena bula i Matsepang na kaukaua ni Vosa ni Kalou, na iVolatabu. E tekivu lakova wasoma na soqoni vakarisito qai biuta na itovo e sega ni vakaivolatabu. Na kena yaga? Sa sega tale ni qai vakasamataka ni beci koya na Kalou se guilecavi koya. Me tekivu mai na gauna e papitaiso kina me iVakadinadina i Jiova, e sa udolu vakacaca na aua e vakayagataka ena cakacaka vakaitalatala ni vunautaka voli na itukutuku vinaka ni Matanitu ni Kalou. Dina ni se vakila tu ga na revurevu ni veika sa oti, ia sa marautaki qai vakainaki na bula nei Matsepang ena gauna oqo. Sa dua na ivakadinadina levu ni kaukaua e tiko ena iVolatabu me vakavinakataka na bula!—Iperiu 4:12.
[Tikina bibi ena tabana e 9]
“Kemuni na Kalou, keu bula, au na cakava na ka au rawata meu qaravi kemuni kina”
[Kato ena tabana e 9]
Cakayaco na iVakavuvuli Vakaivolatabu
Oqo e so na ivakavuvuli vakaivolatabu e vakacegui ira era vakacacani:
“Ni sa rui levu na noqu nanuma sa leqa kina na lomaqu, sa vakamarautaka na yaloqu na nomuni dauveivakacegui.” (Same 94:19) E vu ni reki na ‘veivakacegui’ i Jiova e kune ena nona Vosa. Ni o vakananuma vakabibi na Vosa i Jiova kei na nomu masu ena vukea me kua ni leqa na lomamu vaka kina nomu nuitaka ni iTokani dau veikauaitaki na Kalou.
“Sa vakabulai ira sa ramusu na yalodra [o Jiova], ka sa vauca na nodra vue.” (Same 147:3) Kevaka eda marautaka na loloma i Jiova kei na nona soli luvena o Jisu me isoro ni noda ivalavala ca, eda na doudou ni torova na Kalou. Ena sega ni tukuni rawa noda lomavakacegu.
“E sega ni lako rawa mai vei au [Jisu Karisito] e dua na tamata, kevaka sa sega ni vakayarayarataki koya ko Tamaqu sa talai au mai: ia ka’u na vakaturi koya cake e na siga maimuri.” (Joni 6:44) Ena vuku ni yalona tabu kei na vunautaki ni nona Matanitu, e vakayarayarataki keda kina o Jiova vei Luvena qai solia vei keda na inuinui ni bula tawamudu.