Ra iTabagone​—o Jiova ena Sega ni Guilecava Nomuni Cakacaka!

“Sa sega ni tawa dodonu na Kalou me guilecava na nomudou cakacaka, kei na loloma, dou a vakatakila ki na yacana ni dou a qaravi ira era sa lotu, ia dou sa qarava tikoga.”​—IPERIU 6:​10.

1. E vakaraitaka vakacava na ivola na Iperiu kei na Malakai ni kauaitaka o Jiova nomu veiqaravi?

O A CAKA vinaka beka vua e dua nomu itokani, ia a qai sega ni vakavinavinakataki iko? E rawa ni mosimosi dina ke raici tu ga vakamamada, se o koya e ca sara ke guilecavi na veika vinaka e vakayacori. E duidui sara oqo ke da qaravi Jiova ena lomada taucoko! E kaya na iVolatabu: “Ni sa sega ni tawa dodonu na Kalou me guilecava na nomudou cakacaka, kei na loloma, dou a vakatakila ki na yacana ni dou a qaravi ira era sa lotu, ia dou sa qarava tikoga.” (Iperiu 6:​10) Vakasamataka mada na kena ibalebale. O Jiova ena okata me tawayalododonu, me ivalavala ca, kevaka e guilecava na veika o a cakava kei na veika o sa cakava tiko ena vukuna. E Kalou dau veikauaitaki!​​—Malakai 3:​10.

2. Na cava e lavotaki dina kina na qaravi Jiova?

² E itavi dokai nomu sokaloutaka kei na nomu qarava na Kalou dau vakavinavinaka oqo. E kunekune dredre na nomu itavi dokai oqo baleta ni rauta nira le ono ga na milioni nomu itokani ena vakabauta, ni vakatauvatani kei na ononabilioni na lewe i vuravura. Kuria oya, ni nomu mai rogoca kei na nomu vakayarayarataki ina itukutuku vinaka, e vakaraitaka ni kauaitaki iko o Jiova. E kaya kina o Jisu: “E sega ni lako rawa mai vei au e dua na tamata, kevaka sa sega ni vakayarayarataki koya ko Tamaqu sa talai au mai.” (Joni 6:​44) Io, o Jiova e vukea yadudua na tamata mera vakila na yaga ni isoro i Karisito.

Ciqoma ena Marau Nomu iTavi Dokai

3. Eratou vakavinavinakataka vakacava na luve i Kora na itavi dokai ni qaravi Jiova?

³ Me vaka e veivosakitaki ena ulutaga sa oti, e ka dokai mo vakamarautaki Jiova. (Vosa Vakaibalebale 27:11) Oqo e dua na ka e sega ni dodonu mo raica vakamamada. Ena dua na nodratou same uqeti vakalou na luve i Kora, eratou vakavinavinakataka kina na itavi dokai ni qaravi Jiova. Eda wilika: “Ni sa vinaka e dua na siga e na nomuni lomanibai ka ca e dua na udolu na siga e na tikina tani. Ia ka’u sa vinakata ni’u sai vakatawa ni katuba ni vale ni noqu Kalou, ka cata ni’u sa tiko vakadua e nodra veivale laca nai valavala ca.”​​—Same 84:10.

4. (a) Na cava era na rairai nanuma kina e so ni sokalou vei Jiova e tagutuva nodra galala? (b) Sala cava e tu vakarau kina o Jiova me raica qai vakalougatataki ira nona dauveiqaravi?

⁴ E vakabeka oya nomu rai me baleta na itavi dokai mo qarava na Tamamu vakalomalagi? Ena so na gauna e dau kena irairai ni sokalou vei Jiova e vaka me tagutuva nomu galala. Io, e dina, na bulataki ni ivakavuvuli ena iVolatabu e gadrevi kina na yalo ni vakuai iko. Ia mo kua ni guilecava, ni ka kece e kerea vei iko o Jiova e baleta tiko na nomu vinaka. (Same 1:​1-3) Kena ikuri, ni o Jiova e raica nomu sasaga qai vakavinavinakataka nomu yalodina. E kaya o Paula, ni o Jiova ena “saumi ira talega era sa dauvakasaqarai koya.” (Iperiu 11:6) E vakasaqara o Jiova na sala me cakava kina oqo. E kaya e dua na parofita yalododonu e Isireli makawa: “Ni sa veiraiyaki na mata i Jiova e vuravura taucoko, me totaki ira vakaidina sa dodonu na lomadra vua.”​​—2 Veigauna 16:9.

5. (a) Na cava e dua na sala vinaka duadua mo vakaraitaka kina ni o tokoni Jiova dina? (b) Na cava ena rairai dredre kina mo wasea nomu vakabauta vei ira tale e so?

⁵ Dua vei ira na sala vinaka duadua o rawa ni vakaraitaka kina ni o tokoni Jiova dina, oya mo tukuni koya vei ira tale e so. O sa bau wasea vei ira e so nomu icaba e koronivuli na nomu vakabauta? Ni o tekivuna, ena rairai dredre toka qai vakavurere vakalailai. O na taroga beka: ‘Vakacava ke ra dredrevaki au?’ ‘Vakacava ke ra nanuma ni vou na noqu lotu?’ Ia, o Jisu mada ga e vakadinata ni sega ni tamata kece era na rogoca na itukutuku ni Matanitu ni Kalou. (Joni 15:20) E sega ni kena ibalebale ni o na vakalialiai tu ga, qai sega ni o taleitaki. Kena veibasai, e levu na itabagone iVakadinadina era rogoci, ra qai dokai vei ira nodra itokani nira tukuna nodra vakabauta ena doudou.

“O Jiova ena Vukei Iko”

6, 7. (a) A rawa vakacava ni vunau e dua na goneyalewa yabaki 17 vei ira nona icaba e koronivuli? (b) Na cava o vulica mai na ka a cakava o Jennifer?

⁶ Ia o na doudou vakacava ni vakamacalataka nomu vakabauta? Vakacava mo vakadeitaka mo dau vosa vakadodonu ke o tarogi me baleta na nomu lotu? Vakananuma mada na ivakaraitaki nei Jennifer, e yabaki 17. E kaya: “Au vakasigalevu tiko e koronivuli. Ratou veitalanoataka tiko na lotu na goneyalewa keitou teveli vata, mani tarogi au sara e dua vei iratou seu lotu cava.” A rere beka na sauma o Jennifer? “Io,” e kaya, “niu sega ni kila se ratou na ciqoma vakacava.” Na cava a qai cakava? E tomana: “Au kaya vei iratou niu iVakadinadina i Jiova. Taumada e vaka me ratou kidroataka. Rairai eratou dau nanumi keda vakatani na iVakadinadina i Jiova. Ratou mani vakatarogi au kina ena so na taro. Ni oti mada ga na siga oya, e so na goneyalewa era se dau vakatarogi au ga.”

⁷ A veivutunitaka beka o Jennifer ni tukuna nona vakabauta? Sega! E kaya: “Ni sa oti na gauna ni vakasigalevu, au marau sara ga niu a bau vakamacala rawa. Sa qai matata vinaka vei iratou na goneyalewa oya se o cei dina o ira na iVakadinadina i Jiova.” Na ivakasala gona nei Jennifer e rawarawa sara: “Ke dredre mo vunau vei ira nomu icaba e koronivuli se o qasenivuli, masu ga vakalekaleka. O Jiova ena vukei iko. O na marau ni o vakayagataka vinaka na gauna mo vunau kina.”​​—1 Pita 3:​15.

8. (a) A vukei Niemaia vakacava na masu ni sotava e dua na ituvaki a sega ni namaka? (b) Na cava e so na ituvaki e koronivuli ena rairai vinakati kina mo masu lo ga vakalekaleka vei Jiova?

⁸ Nanuma na ivakasala nei Jennifer, ni gadrevi mo “masu ga vakalekaleka” vei Jiova ni basika e dua na gauna veiganiti mo vakadinadinataka kina nomu vakabauta. Oqo sara ga na ka a cakava o Niemaia, e dau tu mena waini na Tui Perisia o Atakisekise, ni vakaraitaki vua e dua na ituvaki a sega ni namaka. E vakaveveku mata o Niemaia ni rogoca na kedra ituvaki ca na Jiu qai kila tale ga ni se rusa tu na bai kei na matamata kei Jerusalemi. E raica na tui ni vaka sa rui lomararawa o Niemaia, mani tarogi Niemaia se cava na leqa. Ni bera ni sauma na taro, e masuta o Niemaia na veidusimaki ni Kalou. Oti oya, sa qai kerea ena doudou me lesu i Jerusalemi, me lai veivuke ena vakacokotaki tale ni koro. A vakadonuya o Atakisekise na kerekere i Niemaia. (Niemaia 2:​1-8) Na cava o vulica e ke? Ke o rere ni basika e dua na ituvaki mo vakadinadinataka kina nomu vakabauta, kua ni tu vakasuka ni masu lo ga. A vola o Pita: “Biuta vei . . . [Jiova] na nomudou lomaocaoca kecega ni sa daunanumi kemudou ko koya.”​​—1 Pita 5:7; Same 55:22.

‘Vakarau Tu Mo ni Vakamacala’

9. A rawa vakacava ni solia e 23 na ivola na Young People Ask, o Leah, e yabaki 13?

⁹ Dikeva mada e dua tale na ivakaraitaki. A wilika tiko o Leah, e yabaki 13, na ivola Questions Young People Ask​​—Answers That Worka ena gauna ni nona vakasigalevu. E kaya: “Era vakaraici au tiko e so tale, qai sega ni bera sa ra sosovi au mai. Era vakataroga se cava au wilika tiko.” Ni cava na siga oya, eratou mani kerea vei Leah e va na goneyalewa me ratou yadua na ivola na Young People Ask. Ratou sa lai vakamacalataka tale ga na ivola vei ira tale e so, ra mani vinakata tale ga me dua na nodra. Ni oti e vica tale na macawa, e solia rawa o Leah e 23 na ivola na Young People Ask vei ira nona lewenikalasi kei ira na nodra itokani. A rawarawa beka vei Leah me vosa nira vakatarogi koya e so tale me baleta na ivola a wilika tiko? Sega! “Au a via madua vakalailai,” e kaya. “Ia, au mani masu, au kila tale ga ni tiko kei au o Jiova.”

10, 11. A rawa vakacava vua na goneyalewa lailai ni Isireli me vukea na kavetani ni mataivalu ni Siria me kilai Jiova, kei na veisau cava a qai cakava na kavetani?

¹⁰ O na rairai nanuma lesu ena ivakaraitaki nei Leah na ituvaki vata a sotava na goneyalewa lailai ni Isireli sa lai tu vakavesu e Siria. E vukavuka o Neamani, na kavetani ni mataivalu ni Siria. A rairai tekivutaka o watina yalewa na veivosaki e lai tukuna kina na goneyalewa lailai nona vakabauta, ena nona kaya: “Ke sa tiko mada na noqu turaga vei koya na parofita mai Samaria! ena qai vakabulai koya ko koya mai na nona vukavuka.”​​—2 Tui 5:​1-3.

¹¹ Ena vuku ni nona doudou na goneyalewa lailai oqo, e kila kina o Neamani ni “sega e dua na Kalou e vuravura taucoko, e Isireli duaduaga.” E vakadeitaka sara mada ga ni na “sega ni vakacabora tale . . . nai soro kama, se dua nai madrali, vei ira na kalou tani, vei Jiova duaduaga.” (2 Tui 5:​15, 17) A vakalougatataka o Jiova nona doudou na goneyalewa lailai oya. Ena cakava tale ga oya o Jiova vei ira na itabagone nikua. A vakadinata oqori o Leah. Ni toso na gauna, sa ra qai mai kaya vua e so nona lewenikalasi ni sa vakavinakataka tiko nodra itovo na ivola na Young People Ask. “Au marau dina,” e kaya o Leah, “niu kila niu sa vukea tale e so mera kilai Jiova vinaka ra qai veisautaka nodra bula.”

12. E rawa vakacava ni o doudou ni vakamacalataka nomu vakabauta?

¹² O rawa tale ga ni cakava na veika erau cakava o Jennifer kei Leah. Muria na ivakasala i Pita, ena nona a vola, ni o lotu Vakarisito e dodonu mo ‘dau vakarau tu ena veigauna kece ga mo vakamacalataka vua na tamata yadua e via kila na inuinui sa tu vei iko. Ia mo ni kitaka ena yalomalumalumu kei na vakarokoroko.’ (1 Pita 3:​15, 16, VV) O na cakava vakacava? Vakatotomuri ira na lotu Vakarisito ena imatai ni senitiuri era masuti Jiova mera vunau ena “doudou.” (Cakacaka 4:​29) Doudou sara ni tukuna nomu vakabauta vei ira tale e so. O na rairai kurabui ena ka o na rawata. Kena ikuri, o na vakamarautaki Jiova.

Vidio kei na Vakadidike ena Ka ni Vuli

13. Na cava era vakayagataka vinaka e so na itabagone mera vunau kina? (Raica na kato ena tabana e 20 kei na 21.)

¹³ Era vakayagataka e levu na itabagone na vidio mera vakamacalataka kina nodra vakabauta vei ira nodra lewenikalasi se qasenivuli. So na gauna, na nodra vakadidike ena ka ni vuli e rawa ni dolava na sala mera vakacaucautaki Jiova kina. Kena ivakaraitaki, e rua na gonetagane yabaki 15, erau iVakadinadina i Jiova, erau lesi me rau digia e dua na matalotu e vuravura me rau vola na kena itukutuku me tiki ni nodra lesoni. Erau mani veivuketaka ni vola na itukutuku ni iVakadinadina i Jiova, ni rau vakayagataka na ivola Jehovah’s Witnesses​​—Proclaimers of God’s Kingdom.b A dodonu tale ga me rau vosa me lima na miniti. Ni oti oya, ena levu ni nodra taro na qasenivuli kei ira na gonevuli, erau lai vakamacala sara kina me 20 na miniti. Ena vica tale na macawa e tarava, era se vakataroga tiko ga nodrau lewenikalasi na ka me baleta ira na iVakadinadina i Jiova!

14, 15. (a) Na cava e icori kina na rerevaka na tamata? (b) Na cava mo nuidei kina ni wasea vei ira tale e so nomu vakabauta?

¹⁴ Me vaka e laurai ena ivakaraitaki sa oti, ena vakilai na veivakalougatataki levu ke o tukuna vei ira tale e so nomu vakabauta ni o iVakadinadina i Jiova. Kua gona ni vakalaiva na rerevaka na tamata me muduka nomu itavi dokai kei na nomu marau ni o vukei ira tale e so mera kilai Jiova. E kaya na iVolatabu: “Na rerevaka na tamata sa da tacori kina: ia ko koya sa vakararavi vei Jiova ena tiko vinaka.”​​—Vosa Vakaibalebale 29:25.

¹⁵ Nanuma, ni o dua na itabagone lotu Vakarisito, o kila na ka e vinakati me dulaki tale ga vei ira na nomu icaba​​—na ivakarau ni bula vinaka duadua nikua kei na vosa ni yalayala ni bula tawamudu mai muri. (1 Timoci 4:8) E Mereke​​—na vanua o na rairai nanuma nira sega ni dau kauai ra qai sega ni lotu na lewena​​—e vakaraitaka e dua na vakatataro ni rauta ni veimama na itabagone era dau kauaitaka vakabibi na lotu, qai dua na ikatolu era kaya ni vakabauta vakalotu “e tiki bibi” ni nodra bula. Ena via vaka tale ga oqo na ituvaki e veiyasa i vuravura. Dodonu kina mo nuidei nira na marau ni vakarorogo nomu icaba e koronivuli ena ka o na kaya mai na iVolatabu.

Toro Voleka Vei Jiova ni O se iTabagone

16. Na cava e okati ena nomu vakamarautaki Jiova me ikuri ni nomu tukuni koya?

¹⁶ Na nomu vakamarautaki Jiova e sega ni okati wale ga kina nomu tukuni koya. E vinakati me salasalavata tale ga nomu itovo kei na nona ivakatagedegede. E vola na yapositolo o Joni: “Sai koya oqo na loloma vua na Kalou, me da muria na nona vunau: a sa sega ni ka bibi na nona vunau.” (1 Joni 5:3) O na vakadinata oqo ke o toro voleka vei Jiova. O na cakava vakacava oya?

17. O na toro voleka vakacava vei Jiova?

¹⁷ Me tiko na gauna mo wilika kina na iVolatabu kei na ivola yavutaki ena iVolatabu. Na levu ga ni nomu kilai Jiova, na kena rawarawa nomu talairawarawa vua kei na nomu tukuni koya vei ira tale e so. E kaya o Jisu: “A tamata vinaka sa kauta mai na ka vinaka mai na lololo vinaka ni lomana . . . ni sa vosataka na gusuda na ka sa oso vakalevu kina na lomada.” (Luke 6:​45) Vakatawa gona na lomamu ena ka vinaka. Vakacava me nomu isausau oqo? De rawa ni o tekivuna ena nomu vakarautaka vinaka na soqoni vakaivavakoso ena macawa e tarava. Tarava nomu saga me lekaleka qai momona nomu ivakamacala. Ia, mo kua ni guilecava ni bibi dina mo bulataka na veika o vulica.​​—Filipai 4:9.

18. Kevaka o tusaqati, na cava ga o nuidei kina?

¹⁸ Na veivakalougatataki e rawati ni qaravi o Jiova e tudei qai tawamudu. O na sotava ena so na gauna na veitusaqati kei na veivakalialiai ni o iVakadinadina i Jiova. Ia vakasamataki Mosese. Na iVolatabu e kaya ni “rai sara tiko ko koya ki na i covi sa wawa tu mai liu.” (Iperiu 11:​24-​26, VV) O rawa tale ga ni nuidei ni na vakalougatataka o Jiova nomu sasaga mo kilai koya kei na nomu tukuni koya. Ena sega vakadua ni ‘guilecava na nomu cakacaka, kei na loloma, o vakatakila ina yacana.’​​—Iperiu 6:​10.

[iVakamacala e ra]

O se Nanuma Tiko?

• Na cava o vakadeitaka kina ni kauaitaka nomu veiqaravi o Jiova?

• Na iwalewale cava ni vunau e koronivuli era raica e so na itabagone ni cakayaco?

• O rawa vakacava ni doudou ni vunau vei ira nomu lewenikalasi?

• O na toro voleka vakacava vei Jiova?

[Kato/iYaloyalo ena tabana e 20]

O Ira na Gone Sara Era Vakacaucautaki Jiova!

Era vunau e koronivuli na gone. Dikeva e so na ivakaraitaki oqo.

O Amber e yabaki tini, e kalasi lima, ra qai wilika tiko na nona kalasi na ivola ni nodra vakararawataki ira na Jiu na Nazi ena iKarua ni iValu Levu. Mani solia sara o Amber na vidio na Purple Triangles vei nona qasenivuli. E kurabui na qasenivuli ni sa qai kila nira a vakacacani tale ga na iVakadinadina i Jiova ena nodra veiliutaki na Nazi. Sa qai vakaraitaka na qasenivuli na vidio vei ira kece na lewenikalasi.

O Alexa e yabaki walu, a vola e dua na ivola vei ira nona lewenikalasi, e vakamacalataka kina na vuna ena sega ni vakaitavi kina ena marautaki ni Kirisimasi. E drukataka vakalevu o qasenivuli, mani tukuna vei Alexa me wilika i cake nona ivola ena nona kalasi kei na rua tale na kalasi! E tinia vaka oqo nona ivola: “Au vakavulici meu dokai ira e duidui nodra vakabauta, au vakavinavinakataki kemuni tale ga ni oni doka noqu vakatulewa meu kua ni solevutaka na Kirisimasi.”

Ni se qai tekivu vuli ga o Eric ena kalasi dua, a kauta i koronivuli na Noqu i Vola ni Talanoa ena i Volatabu qai kerea me vakaraitaka vei ira nona lewenikalasi. Ia, e kaya o qasenivuli: “Ena yaga sara ke o wilika e dua na italanoa vei ira na lewenikalasi.” Mani wiliwili sara o Eric. Oti oya, sa qai sureti ira kece era vinakata na ivola mera laveliga. Era le 18 kece era laveliga, wili kina o qasenivuli! Oqo sara ga sa yalava lavotaki tu ni vunau i Eric.

O Whitney sa yabaki ciwa, e vakavinavinakataka na ivola Na iVakadinadina i Jiova kei na Vuli.c E kaya: “E dau solia e veiyabaki o tinaqu na ivola oqo vei ira noqu qasenivuli, ia ena yabaki oqo au sa solia. Ena veivuke ni ivola oya, e digitaki au kina noqu qasenivuli meu ‘gonevuli vinaka duadua ena dua na macawa.’ ”

[iVakamacala e ra]

[Kato/iYaloyalo ena tabana e 21]

iTuvaki Era Vakayagataka Eso Mera Tukuna Kina Nodra Vakabauta

Nira lesi mera vakamacala se vakadidike ena ka ni vuli, e so era digia na ulutaga e rawa nira vunau kina

E levu na itabagone era solia vei nodra qasenivuli na vidio se ivola e salavata kei na veika e vulici

E so na itabagone era dau wilika nodra iVolatabu se ivola vakaivolatabu ena gauna ni vakacagicagi, e vakavuna na nodra dau vakatarogi mai vei ira e so tale na itabagone

[iYaloyalo ena tabana e 18]

O ira na matua cake e rawa nira vukei ira na itabagone mera qaravi Jiova