Ra Taroga na iTabagone . . .

Au na Vunau Vakacava Vei Ira Keimami Vuli Vata?

“Sa dua na ka na noqu kidacala ni keirau sota kei na dua na noqu veikilai niu cakacaka tiko vakavunau. Au lai tavaiyaya wale. Qai tini vunau ga o koya keirau a cakacaka vata tiko.”​—Alberto.

“Au kila ni dua na lewe ni noqu kalasi e vakaitikotiko ena tolonisala oya. Au mani kerei taciqu me sa na nona itavi tiko mada na vunau. Ni keirau toso tiko e vaka sa via wawale mai, mani kerea me noqu mada na vale e tarava. O cei e dolava mai na katuba​—o koya sara ga keirau kalasi vata! Dua na ka na vuka ni yaloqu!”​—James.

ERA nanuma e levu na itabagone ni “ka beci” na veivosakitaki ni ka vakalotu. Vei ira na lotu Vakarisito, era vakamareqeta na itabagone na nodra itavi lesi vakalou mera wasea na nodra vakabauta vei ira na tani. E udolu na itabagone era iVakadinadina i Jiova era cakacaka vakavunau e veivale. Ia e so era cakava tu na cakacaka oqo ena dela ni madua, de dua era na sotava kina e dua na nodra icaba mai koronivuli. “Au dau madua keu sotava e dua na noqu icaba mai koronivuli,” e kaya o Jennifer, dina ga ni a biu vuli ena vica na yabaki sa oti.

Kevaka o dua na itabagone lotu Vakarisito, ena rawa ni vaka tale ga oya na nomu rai. Eda sega ni vinakata kece meda cati, sa rauta meda na maduataka na tukuna na noda vakabauta vua e dua na noda icaba mai koronivuli.a E sega ni kena ibalebale kina oya mo vakalaiva na madua mo lai tavaiyaya wale kina. O nanuma beka e dua na tamata ena iVolatabu o “Josefa, na kai Arimacea”? E vakabauta na veika a vakavulica vua o Jisu. Ia, na iVolatabu e vakamacalataki Josefa ni a dua na “tisaipeli i Jisu, ia ka vuni ga ni sa rerevaki ira na kai Jutia.” (Joni 19:38) O na raica vakacava e dua na nomu itokani e galuvaka na nomudrau veikilai? (Luke 12:8, 9) E sega gona kina ni kurabuitaki ni namaka na Kalou vei ira kece na lotu Vakarisito mera “vakatusa” na nodra vakabauta. (Roma 10:10) Oqo e okati kina na vunau tawalokuci mai koronivuli.

E valuta na nona madua o Josefa na kai Arimacea ena gauna a lai kerea na yago i Jisu me mai buluta. E rawa vakacava ni o valuta na madua?

Bucina Mo Guta na Vunau

E sega ni maduataka na yapositolo o Paula me wasea yani na nona vakabauta. E tukuni koya ena Roma 1:15, ni guta na kacivaka na Vosa ni Kalou. Na cava e uqeti koya? E kaya ena tikina e 16: “Ni’u sa sega ni maduataka nai tukutuku-vinaka kei Karisito: ni sai koya oqo na kaukauwa ni Kalou me vakabulai kina ko ira yadua era sa vakabauta.” Vakacava o iko? O sa vakadinata vakataki iko na ka dina? (Roma 12:2) O vakadinata ni itukutuku ni iVolatabu e ‘kaukauwa ni Kalou me rawati kina na bula’?

E sega ni rauta wale ga na nomu tiko ena soqoni kei rau na nomu itubutubu. “E rawarawa na vakamumuri tu ga ina soqoni, ni rau kaya na noqu itubutubu meu lako,’’ e kaya e dua na itabagone o Deborah. “Ia ni tarogi vei au e so na taro vakaivolatabu, au sega ni kila meu vakamacalataka vakacava.” E vakadinadinataka e dua na itabagone o Mi Young: “Meda vakadinata vakataki keda ni oqo sara ga na ka dina.”

Na cava e rawa ni uqeti iko mo wasea yani vei ira na tani na ka dina mai na iVolatabu? Vulica vakataki iko. E kaya e dua na itabagone o Sean: “Ni o vulica vakataki iko na iVolatabu, o na bulataka sara ga na ka dina. O vakavulici iko ga vakataki iko.” E dina ni sega ni o keda kece eda taleitaka na vuli. “Au sega ni dau taleitaka na wilivola,” e kaya o Shevon. “Ni se qai tekivu, e dredre vei au na wilika Na Vale ni Vakatawa kei na Yadra! se wilika e veisiga na iVolatabu. Ia ni sa toso tiko na gauna au sa qai rawata.”

Na cava ena rawati ena vuli vagumatua? E kaya na yapositolo o Paula: “Sa rawa na vakabauta e na vakarorogo.” (Roma 10:17) Ni tubu cake na nomu vakabauta, ena veisau tale ga na nomu itovo. E tinia e dua na itabagone mai Brazil o Elisângela: “E ka dokai nida dua na lotu Vakarisito, e sega kina ni dua na ka meda na madualaka.” Ni sa tubu cake na nomu vakabauta, ena uqeti iko mo vunau vei ira na tani​—okati kina o ira na nomu icaba mai koronivuli. E kaya o Paula: “Keitou . . . sa vakabauta, o koya ka’u sa vosa kina.” (2 Korinica 4:13) Ena rawa vakacava meda “sega ni cala e na vukuna e dua sa na cudruvi” kevaka o sega ni wasea yani vei ira na nomu icaba na itukutuku ni bula?​—Cakacaka 20:26, 27.

Era kaya e so na itabagone lotu Vakarisito nira sega ni kila tu na ka mera vakamacalataka mai na iVolatabu vei ira na tani. “Kevaka o sega ni kila na ka mo tukuna,” e kaya e dua na itabagone o Joshua, “o na sega ni marautaka na vunau.” Ia, ena vukei iko na nomu kila vinaka na iVolatabu. (2 Timoci 2:15) Ena ivavakoso ni iVakadinadina i Jiova, e rawa vei ira na itabagone mera kerea na nodra veivuke na qase ni ivavakoso mera vakavinakataka kina na nodra veivakavulici. E kaya e dua na itabagone mai Jamani o Matthias: “Niu tekivu veivosaki sara ga kei ira na tamata​—sega ni soli ivola vakaivolatabu wale tu ga​—au taleitaka kina na vunau.”

Kena ilutua, masulaka vua na Kalou me vukei iko mo vosa ena doudou. (Cakacaka 4:29) Ena tikina oqo e vakadinadinataka na veivuke ni Kalou na yapositolo o Paula. E kaya ena 1 Cesalonaika 2:2: “Keitou sa qai doudou ga e na vuku ni neitou Kalou me tukuna sara vei kemudou nai tukutuku-vinaka ni Kalou, a sa ka levu na veivorati.” E vakaraitaka e dua na ivola, ni vosa oya e rawa ni tukuni ni “Kalou e kauta tani na rere mai na loma ni tamata.” Vakacava mo masulaka vua na Kalou me kauta tani mai lomamu na rere?

Tukuna Vakadodonu

Me salavata kei na masu oya e rawa sara ga ni o tukuna vakadodonu. E veivakasalataki e dua na itabagone mai Peritania o Chic: “Tukuna vei ira na nomu icaba mai koronivuli ni o dua na lotu Vakarisito.” O na sega ni vinakata mo ‘tisaipeli vuni.’ Oqo e vakadinadinataka o Rebecca, e dua na itabagone e dau taqaya ni sotava e dua e kila ena gauna ni cakacaka vakavunau. E kaya o koya: “Kevaka o tukuna vei ira ni o dua na lotu Vakarisito o qai dau lako i veivalevale, era na taroga ena so na gauna, ‘Gauna cava o na lako mai kina ena neitou vale?’ ”

Kua tale ni waraka mo qai sotava e dua na nomu icaba. Qara na sala mo wasea kina na nomu vakabauta mai koronivuli. Nanuma na taro a taroga na yapositolo o Paula: “A ra na vakabauti koya vakacava era sa sega ni rogoca kina? A ra na rogoca vakacava, kevaka e sega e dua me tukuna?” (Roma 10:14) O iko sara ga o rawa ni vukei ira na lewe ni nomu kalasi mera vakarorogo. E kaya o Iraida, e dua na itabagone: “Na koronivuli e dua na yalava ni vunau e rawa ni noda vakatabakidua.” E levu na itabagone era vakayagataka vinaka na nodra gauna e kea mera vunau kina.

Ena so na gauna e dau soli na lesoni mai koronivuli mera vakadidike mai kina na gonevuli, oqo e dua na sala o rawa ni wasea kina na ka dina mai na iVolatabu. E kaya e dua na goneyalewa ni Peritania o Jaimie: “Ena kalasi ni saenisi, keimami a veitalanoataka tiko kina na bula vakaidewadewa, au mani vakamacalataka na noqu vakabauta. A vakalialiai au e dua na gonetagane ni kaya ni o ira na iVakadinadina i Jiova era sega ni tamata vuku, e sega kina ni ganiti ira mera vuli. Sega ni bera nodra totaki au na vo ni gone.” E vakavatukana na nona ivakaraitaki vinaka ni dua na lotu Vakarisito. Kuria o Jaimie: “Au mani solia kina vua e dua na noqu icaba mai koronivuli na ivola Is There a Creator Who Cares About You?”b

A sotava tale ga e dua na ituvaki vaka oya o Roxana mai Romania, e dua na goneyalewa yabaki 14: “E kaya o qasenivuli ni na dua tiko na veitalanoa vakalasi me baleta na ulutaga ni alakaolo, tavako kei na wainimate gaga. Au mani kauta na ilavelave ni Yadra! ni Julai-Sepiteba, 2000, ena ulutaga ‘Sala Mo Biuta Rawa Kina na Vakatavako.’ A raica na ilavelave oqo e dua na gone ena noqu kalasi, a taura qai sega ni via vakasuka tale mai. Ni sa wilika oti, e kaya ni na saga sara ga me kua ni vakatavako.”

O na rairai sega ni na sotava wasoma na tataleitaki vaka oya. Ia, e uqeti keda na Dauvunau 11:6: “E na mataka mo kaburaka na nomu sila, ia e na yakavi me kakua ni cegu na ligamu: ni ko sa sega ni kila se cava vei rau ena yaco.” Ke vuavuaivinaka se sega, nomu wasea na nomu vakabauta, o sa vakarawarawataka na nomudrau veivosaki kei na nomu icaba mai koronivuli ni o cakacaka vakavunau e veivale. E kaya e dua na itabagone mai Peritania o Jessica: “E rawarawa cake na vunau vei ira eda vuli vata nida sa veikilai rawa tu.” O na kurabuitaka nira na via kila e so na nomu icaba mai koronivuli na nomu vakabauta.

E dina, ni so era na sega ni ciqomi iko vakayalololoma. A solia na ivakasala yaga oqo o Jisu: “Ia ko koya sa sega ni vakacegui kemudou, se rogoca na nomudou vosa, ni dou sa lako tani e na [nona] vale . . . kuretaka laivi na kuvu-ni-soso mai na yavamudou.” (Maciu 10:14) E dua tale na kena ivosavosa, kua ni taura vakabibi kevaka o sega ni ciqomi. Biuti koya ga ena vakacegu, qara tale e dua e tu vakarau me vakarorogo. O na kunea ena dua na siga, e dua e lomadina e gadreva na ka dina qai tu vakarau me vakarorogo. E sega li ni ka ni veivakalougatataki kevaka e dua vei ira na lomadina oya e nomu icaba mai koronivuli? Ke vaka kina, o na marautaka ni o a valuta na nomu madua, mo wasea yani kina na nomu vakabauta vei ira na nomu icaba mai koronivuli.

[iVakamacala e ra]

[Tikina bibi ena tabana e 12]

“Ni o vulica vakataki iko na iVolatabu, o na bulataka sara ga na ka dina.”​—Sean.

[iYaloyalo ena tabana e 10]

Kua ni rere, tukuna vakadodonu ni o dua na lotu Vakarisito

[iYaloyalo ena tabana e 10]

Dua na sala e rawa ni wasei kina na ka dina mai na iVolatabu oya na lesoni e lesi mai koronivuli