“Toro Voleka Yani Vua na Kalou, Ka na Toro Voleka Mai Vei Kemudou Ko Koya”
Veisau na Bula Dau Voravora e Liu, Yalomalua Nikua
“SA BULA na vosa ni Kalou, ka kaukauwa, ka gata vakalevu ka mucu ga nai seleiwau batirua, . . . a sa vakalewa sara na nanuma kei nai naki ni yaloda.” (Iperiu 4:12) Oqori na ka e kaya na yapositolo o Paula ena kaukaua ni ka e rawa ni vakayacora na itukutuku ni Kalou. E vakilai sara ga oqo ena imatai ni senitiuri S.K. na kena tara na lomadra na tamata. Dina ga ni levu tu na idre cala ena gauna oya, ia o ira na mai lotu Vakarisito era vakaisulutaki ira ena itovo vou.—Roma 1:28, 29; Kolosa 3:8-10.
Na veisau e vakayacora na vosa ni Kalou vei ira na tamata me vaka e volai ena iVolatabu, e vakilai tale ga ena gauna oqo. Kena ivakaraitaki o Richard, e turaga balavu qai kaukaua. Ni dau cudrucudru totolo, e dau veivacu ke vakacudrui. E vakaleqa nona bula na itovo kaukaua. A mani curu ena isoqosoqo ni veivacu o Richard. Ni dau tereni vakaukaua, a qai yaco me dua na jabeni ni heavyweight e Westphalia mai Jamani. E dau gunu vakasivia qai levu na gauna e dau tini ena veibuturaki. Dua na gauna ni veivala vaka oqo a mate sara ga kina e dua, qai voleka ni bala kina e valeniveivesu o Richard.
Ia, vakacava nona bula vakawati? A vakananuma lesu o Richard: “Ni bera ni keirau vulica na iVolatabu kei Heike, keirau dau dui muria ga na loma i keirau. Levu na gauna e dau tu vata ga kei ira nona itau goneyalewa o Heike, o yau tale ga au dau cakava ga na ka au taleitaka—vakabibi na veivacu, na vakasisisi e delaniwai, kei na nunu.”
Ni rau tekivu vulica na iVolatabu kei ira na iVakadinadina i Jiova o Richard kei Heike, a yalolailai o Richard ni vakasamataka ni na gadrevi vua me veisau me rawa ni salavata kina kei na Vosa ni Kalou na nona bula. Ni sa mai kilai koya vinaka na Kalou o Jiova, sa bucina o Richard na gagadre me vakamarautaki koya kina. A qai kila ni Kalou e sega ni taleitaki ira na dau vakayacora na itovo kaukaua, se o ira na cakava tu ga me ka ni lasa. A vulica o Richard, ‘ni o koya sa vinakata na ivalavala kaukaua, sa cati koya na yalo i Jiova.’—Same 11:5.
Ia, rau qoroya sara ga o Richard kei Heike na inuinui ni bula tawamudu ena vuravura parataisi. Rau vinakata me rau bula kina! (Aisea 65:21-23) E tarai Richard sara ga na veisureti meda ‘toro voleka yani vua na Kalou, ka na toro voleka mai vei keda o koya.’ (Jemesa 4:8) E raica tale ga na bibi ni kena muri na ivakasala oqo: “Mo kakua ni vuvutaka na tamatai valavala vakasaurara ka mo kakua talega ni digitaka e dua na nona sala: ni sa ka vakasisila vei Jiova na yalovakatani: a sa tiko ga kei ira na yalododonu na nona vosa vuni.”—Vosa Vakaibalebale 3:31, 32.
Dina ni gadreva o Richard me veisautaka na ivakarau ni nona bula, e kila ni sega ni rawa ni cakava ena nona kaukaua ga. E raica ni bibi me kerea na veivuke ni Kalou ena masu. A vakayacora kina o Richard na veika e tukuna o Jisu vei ira nona yapositolo: “Dou masu [tiko ga], me kakua ni rawai kemudou na vere: e dina ga sa gu na yalo, ia na yago sa malumalumu.”—Maciu 26:41.
Gauna e vulica kina o Richard ni sega ni taleitaka na Kalou na itovo kaukaua kei na cudrucudru, sega tale ni qai vakatitiqataka ni cala na veivacu. Ena veivuke i Jiova kei na nodra veivakayaloqaqataki o ira na vulica vata kei koya na iVolatabu, e rawa kina vua me biuta tani na ivakarau oya. E biuta tani na veivacu kei na veivala qai nakita me vakavinakataka nona bula vakavuvale. E kaya o Richard: “Noqu vulica na ka dina ena iVolatabu e vukei au meu tu mada vakadua, vakasama ni bera niu cakava e dua na ka,” ena gauna oqo e sa dua tiko na ivakatawa yalomalua ena dua na ivavakoso ni iVakadinadina i Jiova. E kuria: “Na ivakavuvuli ni loloma kei na veidokai e tuberi au ena noqu veiwekani kei watiqu kei rau tale ga na luvequ. Oqo e vakaduavatataki keitou vakavuvale.”
E so era vakacalai ra qai dau beitaki ira na iVakadinadina i Jiova nira vakavuna na kavoro ni matavuvale. Ia, e vakalasuya na nodra veibeitaki na ivakaraitaki e so me vakataki Richard. Na kena dina ga oya, na ka dina e vakavuvulitaka na iVolatabu ena rawa kina vei ira e voravora e liu na nodra bula me yalomalua ena gauna oqo.—Jeremaia 29:11.
[Tikina bibi ena tabana e 9]
“Na inuinui ni parataisi e vuravura e uqeti au meu veisau”
[Kato ena tabana e 9]
Yaga ni iVakavuvuli Vakaivolatabu
Na kaukaua ni iVolatabu e cakayaco ena bula ni tamata yadua. Oqo e so na ivakavuvuli vakaivolatabu e vukea e so na tamata voravora mera veisau:
“Sa vinaka cake ko koya sa berabera ni cudru ka ca na tamata qaqa; ko koya talega sa lewa na yalona vei koya sa kaba e dua na koro.” (Vosa Vakaibalebale 16:32) O koya e sega ni tarova rawa nona cudru e ivakaraitaki ni malumalumu ni sega vua na kaukaua.
“Nona yalomatua na tamata sa vakaberabera kina na nona cudru.” (Vosa Vakaibalebale 19:11) Na yalomatua kei na kilai vinaka ni so na ituvaki, e vukea e dua me kua ni raica vakamamada na vu ni veiba. Oqo ena rawa ni levei kina na cudru katakata.
‘Mo kakua ni veiwekani kei na tamata dau cudru de ko vulica na nona ivalavala.’ (Vosa Vakaibalebale 22:24, 25) Na lotu Vakarisito ena levea na vakailala kei ira era dau cudrucudru totolo.