Raica na Yasana Era Vinaka Kina na Tani

“Mo ni nanumi au na noqu Kalou, ena ka au vinaka kina.”​—NIEMAIA 13:31, NW.

1. E dau caka vinaka vakacava o Jiova vei ira na tamata kece?

NI OTI e vica vata na siga rugurugua qai vakaturubuto, na basika ni matanisiga e dau vakavureki. Eda marautaka qai vinaka kina na lomada. E vakatale ga oya ke cila warumisa tu vakadede na siga qai mamaca na draki, na mimiri ni uca se kena tau bi sara, e malumu kina na yago qai vakacegui keda. Na kena dau veisau na draki e dua na isolisoli totoka sa tuvanaka tu noda Dauveibuli dauloloma ena gauna a bulia kina na vuravura. A vakabibitaka gona o Jisu nona lomasoli na Kalou ni vakavulica: “Dou lomani ira na nomudou meca, . . . ka masulaki ira sa vakalialiai kemudou, . . . mo dou luvena na Tamamudou sa tiko mai lomalagi; ni sa vakacabea ko koya na nona mata-ni-siga vei ira na tamata ca kei ira na tamata vinaka, a sa vakatauca mai na uca vei ira na tamata yalododonu, kei ira na tamata tawa yalododonu.” (Maciu 5:​43-​45) Io, o Jiova e dau caka vinaka vei ira kece na tamata. Dua gona na sala e rawa nira vakatotomuri koya kina na nona dauveiqaravi, oya mera saga mera raica na yasana era vinaka kina na tamata kece.

2. (a) Na cava e yavu ni nona dau caka vinaka o Jiova? (b) E raica vakacava o Jiova na veika eda cakava meda dolea lesu kina nona vinaka?

² Na cava e yavu ni nona dau caka vinaka o Jiova? Me tekivu sara mai na gauna a valavala ca kina o Atama, sa dau raica ga o Jiova na yasana e vinaka kina na kawatamata. (Same 130:​3, 4) E nona inaki me vakalesui ira tale na kawatamata talairawarawa mera bula ena Parataisi. (Efeso 1:​9, 10) Na nona loloma sa rawa nida nuitaka kina meda vagalalataki mai na ivalavala ca kei na bula tawasavasava ena vuku ni Kawa yalataki. (Vakatekivu 3:​15; Roma 5:​12, 15) Na ciqomi ni ivoli e dolava na sala me rawati tale kina na bula uasivi. Dua gona vei ira na ka e vakaraica vei keda yadudua o Jiova, oya se cava eda sa cakava tiko meda vakaraitaka kina na noda vakavinavinakataka nona lomasoli. (1 Joni 3:​16) E ciqoma gona o Jiova na veika kece eda cakava ena noda via dolea lesu nona vinaka. A vola na yapositolo o Paula: “Ni sa sega ni tawa dodonu na Kalou me guilecava na nomudou cakacaka, kei na loloma, dou a vakatakila ki na yacana.”​—Iperiu 6:10.

3. Na taro bibi cava me vakasamataki?

³ E rawa gona vakacava nida vakatotomuri Jiova nida raica na yasana era vinaka kina na tani? Meda dikeva mada na isaunitaro oqo ena va na basoga ni bula: (1) ena cakacaka vakavunau, (2) ena vuvale, (3) ena ivavakoso, kei (4) na noda veimaliwai kei ira tale e so.

Ena Vunau kei na Veivakatisaipelitaki

4. Na noda vakaitavi ena cakacaka vakavunau vakarisito, e vakaraitaka vakacava nida raica na yasana era vinaka kina na tani?

⁴ “Na were ko vuravura,” e vakamacalataka o Jisu me sauma kina nodratou vakatataro nona tisaipeli me baleta na ibalebale ni vosa vakatautauvata ni sila vinaka kei na sila ca. Nida tisaipeli i Karisito ena gauna oqo, eda vakadinata na dina ni vosa oqo nida lako ena cakacaka vakavunau. (Maciu 13:​36-​38; 28:​19, 20) Na noda cakacaka vakavunau eda sa tusanaka sara tiko ga kina na noda vakabauta. Na kena kilai levu gona na cakacaka vakavunau ni iVakadinadina i Jiova e veivalevale, vaka kina ena salatu, e vakadinadinataka na noda gugumatua meda qarai ira kece e ganiti ira, se yaga vei ira na itukutuku ni Matanitu ni Kalou. Ni oqo ga na ka a vakarota o Jisu: “Ia na koro kei na koro lailai vakaaduaga dou na curu kina, taroga se ko cei sa yaga kina.”​—Maciu 10:11; Cakacaka 17:17; 20:20.

5, 6. Na cava me kua kina nida vakacauoca ni sikovi ira tiko ga na tamata ena nodra vale?

⁵ Nira sega ni namaki keda na itaukeinivale, e rawarawa gona kina nida raica se vakacava nodra veiciqomi. Ena so na gauna eda raica ni vakarorogo e dua ena lomanivuvale, ia ena gauna vata oya e rawa ni kailavaka mai kina e dua tale vei iratou na tiko e lomanivale, “Keitou sega ni taleitaka,” mai mudu e kea na veivosaki. E ka ni rarawa ni nona veitusaqati se sega ni tataleitaki e dua, e lai cakayaco vua e tataleitaki! Na cava gona e rawa nida cakava me kua nida vakacauoca kina ni raica na yasana era vinaka kina na tani?

⁶ Nida sikova tale na vale oya ena noda vunau ka tarava ena kena yalava, ena rairai dolava na sala meda vosa vakadodonu kina vua a tarova na imatai ni veisiko. Na noda nanuma lesu na ka a yaco e liu e rawa ni vukei keda meda vakavakarau tu yani. Ena dela ni nona lecaika, a rawa kina vua na dauveitusaqati me nanuma ni dodonu vakaoti na ka a cakava, oya me tarovi koya e tataleitaki mai na nona rogoca na itukutuku ni Matanitu ni Kalou. De dua, e vakavuna na nona itovo ni rai na nona rogoca na itukutuku lasutaki me baleta noda cakacaka. Ia na veika oya e sega ni dodonu me tarovi keda ena noda sasaga ni vunautaka ena vale oya na itukutuku vinaka ni Matanitu ni Kalou, kei na noda vakadodonutaka na rai cala. Nida kauaitaka meda vukei ira kece na tamata mera mai kila na ivakavuvuli dina ni Kalou, da qai nuitaka ni o Jiova ga ena qai vakayarayarataki ira vua.​—Joni 6:​44; 1 Timoci 2:4.

7. Na cava ena vukea me donu tiko ga noda rai nida vunau?

⁷ Na ivakadre i Jisu vei iratou nona tisaipeli e vauci tale ga kina na veitusaqati ena vuvale. A sega beka ni kaya: “Ka’u sa lako mai me tawasei rau na veitamani-tagane, kei na veitinani-yalewa, kei na veivugoni-yalewa talega”? A qai kuria o Jisu: “Ena nona meca na tamata ko ira na nona lewe-ni-vale.” (Maciu 10:​35, 36) Ia, e dau veisau na ituvaki kei na itovo ni rai. Na tauvimate vakasauri, mate ni itokani voleka, leqa lelevu, yalorarawa, kei na vuqa tale na ituvaki e rawa nira vakarogoci keda kina e so nida vunau vei ira. Ia kevaka eda sa nanuma tu mada ga vakailiu nira na sega ni tataleitaki o ira eda vunau kina​—eda sa raica tiko beka na yasana era vinaka kina? Vakacava meda sikovi ira ena marau e nodra vale ena dua tale na gauna? De dua, sa ra na veiciqomi. Ena so na gauna, e sega ni veika eda kaya ia na ivakarau eda kaya kina ena vakavuna mera tataleitaki. Na noda masu tale ga vagumatua vei Jiova ni bera nida tekivu vunau ena vukei keda me donu noda rai, qai vakatuituinataki na ivakarau ni noda wasea na itukutuku vinaka ni Matanitu ni Kalou vei ira na tamata kece.​—Kolosa 4:6; 1 Cesalonaika 5:​17.

8. Na cava e rawa ni yaco ke ra raica na lotu Vakarisito na yasana era vinaka kina na wekadra voleka era sega ni tiko ena vakabauta?

⁸ Ena so na ivavakoso, era qaravi Jiova e levu era lako mai ena dua ga na vuvale. E dau vakawasoma mera dau kauaitaka ra qai doka vakalevu na gone ena dua na matavuvale na nona tudei e dua na lewenivuvale qase. Na vinaka ni nona veimaliwai kei ira na vo ni matavuvale, se na vinaka ni nona bula vakawati e rawa sara ga ni veisautaka na lomadra na gone ena matavuvale oya. Na kena muri tale ga na ivakasala ni yapositolo o Pita sa vukei ira e levu na yalewa lotu Vakarisito mera rawai watidra “e na nodrai valavala.”​—1 Pita 3:​1, 2.

Ena Vuvale

9, 10. Na cava erau cakava o Jekope kei Josefa me vakaraitaka ni rau raica na yasana e vinaka kina nodrau vuvale?

⁹ Na veivolekati e vakaduavatataka na vuvale, e dua tale na basogana eda rawa ni raica kina na yasana era vinaka kina na tani. Dikeva mada na ka eda vulica mai na nona veimaliwai o Jekope kei iratou na luvena. Ena Vakatekivu wase 37, tikina e 3 kei na 4, e dusia na iVolatabu ni o Jekope e dau lomani Josefa vakalevu. Eratou vuvutaki Josefa kina na tacina me lai yacova sara nodratou bukiveretaki koya me ratou vakamatea. Ia, dikeva nodrau itovo ni rai o Jekope kei Josefa ena dua na gauna e muri. Erau raica na yasana era dui vinaka kina na lewe ni nodrau vuvale.

¹⁰ Ni sa lewa o Josefa na wasei ni kakana ni sa dausiga na vanua o Ijipita, a ciqomi iratou vinaka na tuakana. Dina ni sega ni vakatakilai koya sara, a raica ga me caka na veika me ratou taqomaki vinaka kina qai tiko tale ga na kakana me ratou kauta lesu vei tamadratou sa kena turaga sara. Io, e dina ni ratou a cati koya na tuakana ena dua na gauna, ia a qaravi iratou vinaka ga o Josefa. (Vakatekivu 41:53–42:​8; 45:23) E vaka kina o Jekope, ni sa voleka ni mate a vosa vakalougatataki iratou kece na luvena tagane. E dina ni a kau tani e so nodratou itavi dokai ena vuku ni nodratou dui caka cala, ia eratou a votai kece ena nodratou ivotavota ni vanua. (Vakatekivu 49:​3-​28) Sa dua na ivakaraitaki totoka dina ni yalololoma a vakaraitaka o Jekope!

11, 12. (a) Na ivakaraitaki vakaparofisai cava e vakabibitaka na yaga ni kena raici na yasana vinaka ena loma ni vuvale? (b) Na cava eda vulica mai na ivakaraitaki nei tama ena vosa vakatautauvata i Jisu ni gone cidroi?

¹¹ Na nona vosovoso tale ga o Jiova ni veitaratara kei na matanitu sega ni vakabauta o Isireli, e vakavotuya na sala e dau raica kina na veika era vinaka kina na nona tamata. A vakayagataka o Jiova na ituvaki ni vuvale ni parofita o Osea me vakatakila kina nona loloma. A veitaravi nona veibutakoci na wati Osea, o Komera. Dina ni yaco oya, ia a vakasalataki Osea o Jiova: “Mo lako tale, mo mani lomana na yalewa sa daulomani vua na wekana, ka sa dautagane ga, me vaka na loloma i Jiova vei ira na Isireli, era golevi ira na kalou tani, ka vinakata na bilo waini.” (Osea 3:1) Na cava e vakasalataki kina vaka oqo? Ni kila o Jiova ni dina era lewe levu ena matanitu o Isireli era tiva tani mai na nona sala, ia era na tiko e so ena kedra maliwa ena tarai ira na nona vosovoso. E kaya o Osea: “Ka oti, era na qai lesu mai na Isireli, ka qaravi Jiova na nodra Kalou, kei Tevita na nodra tui; ka ra na rerevaki Jiova kei na nona loloma e na gauna maimuri.” (Osea 3:5) Oqo e ivakaraitaki vinaka meda vakatotomuria nida sotava na leqa ena vuvale. Na noda raica tiko ga na yasana era vinaka kina na vo ni noda vuvale ena rawa ni dua na ivakaraitaki vinaka mada ga ni vosota.

¹² Na vosa vakatautauvata i Jisu me baleta na gone cidroi e vakamatatataka tale ga se rawa vakacava nida raica na yasana vinaka vei ira e loma ni noda dui vuvale. A suka lesu i vale na gone cidroi ni sa biuta mai na ivakarau ni nona bula torosobu. A lomani koya o tamana. Ia e vakacava na itovo ni rai i tamana ena nona vosa kudrukudru o luvena tagane qase a se sega vakadua ni biuta nodratou vale? Ni vosa vei luvena qase, sa qai kaya o tamana: “Na luvequ, edaru sa tiko vata vakadua, ia na ka kecega sa tu vei au sa nomu.” Oqo e sega ni vosa me sabaya kina na vosa i luvena, ia e vakaraitaka ga na loloma i tamana. E tomana: “Sa dodonu ga me da reki, ka marau; ni sa mate na tacimu oqo, ka sa qai bula tale; sa yali, ka sa qai kune tale.” O keda tale ga meda dau raica na yasana era vinaka kina na tani.​—Luke 15:​11-​32.

Ena iVavakoso Vakarisito

13, 14. Na cava e dua na sala me bulataki kina na lawa vakaturaga ena loma ni ivavakoso?

¹³ Nida lotu Vakarisito, eda saga meda bulataka na lawa vakaturaga ni loloma. (Jemesa 2:​1-9, VV) Eda na rairai ciqomi ira na lewe ni noda ivavakoso e duidui na ivakatagedegede ni nodra rawaka vakayago mai vei keda. Ia vakacava ke ra duatani tale na matatamata, se duidui nodra itovo vakavanua, se ra sega ni susu mai na dina, oqo beka e yavu ni noda dau ‘veivakaduiduitaki’? Ke vaka kina, eda na muria vakacava na ivakasala i Jemesa?

¹⁴ Na noda kidavaki ira kece era tiko ena soqoni vakarisito e ivakadinadina ni noda yalololoma. Nida vakaliuliu meda vosa vei ira na ka vou era lako mai ena Kingdom Hall, ena vakaseavutaka nodra mamadua se rere. Sa rauta mera kaya kina e so ena imatai ni gauna era tiko kina ena soqoni vakarisito: “Dua na ka nodra veilomani. E vaka sara ga keimami sa veikilai rawa tu. E rawarawa neimami veimaliwai.”

15. E rawa vakacava nira vukei na itabagone ena ivavakoso mera kauaitaki ira na itabaqase?

¹⁵ Ena so na ivavakoso, e so na itabagone era na rairai kumukumuni vata toka ga e loma se taudaku ni Kingdom Hall ni cava na soqoni, ra qai sega ni via veimaliwai kei ira na itabaqase. Na ka vakayalomatua cava e rawa ni caka me muduki kina na itovo oqo? Na imatai sara ga ni ikalawa, oya vei ira na itubutubu mera vakavulici luvedra e vale mera vakavakarau ena soqoni. (Vosa Vakaibalebale 22:6) E rawa nira vakacolati mera vakarautaka rawa na ivola kece ena vakayagataki ena gauna ni soqoni. E veiganiti tale ga vei ira na itubutubu mera vakauqeti luvedra rawa mai vale mera dau veitalanoa kei ira sa qase kei ira na malumalumu ena Kingdom Hall. Na nodra tukuna e dua na ka yaga vei ira vaka oqori ena rawa sara mada ga ni vakamarautaki koya na itabagone.

16, 17. E rawa vakacava nira raica na itabaqase na veika era vinaka kina na itabagone ena ivavakoso?

¹⁶ Ia ena yasana kadua, o ira na mataveitacini qase, tagane kei na yalewa mera nanumi ira tale ga na itabagone ena ivavakoso. (Filipai 2:4) E rawa nira vakaliuliu mera vakayaloqaqataki ira na itabagone. Ni dau vakawasoma me tukuni e so na tikina bibi ena gauna ni soqoni, e rawa sara ga nira tarogi ira na itabagone kevaka era a marautaka na soqoni, se dua beka na tikina e tarai ira e rawa nira cakacaka kina. Nira dua na iwase vakamareqeti ni ivavakoso na itabagone, e dodonu mera dau vakavinavinakataki ena nodra dabe ra vakarorogo, ra qai vakacaucautaki ena nodra ivakamacala ena gauna ni soqoni, se nodra vakaitavi ena dua na kena porokaramu. Na ivakarau ni nodra veimaliwai na itabagone kei ira na itabaqase ena ivavakoso, kei na sala era qarava kina na itavi lalai mai vale, ena rawa ni vakaraitaka na nodra na rawata, se sega, ni colata na itavi lelevu sara ena nodra bula mai muri.​—Luke 16:10.

¹⁷ Nira vakaraitaka e so na itabagone nira colata rawa na itavi, era toso kina mera lai yacova na ivakatagedegede vakayalo sa rawa nira colata kina e so tale na ilesilesi bibi. Nira ogaoga ena veika oqori ena vukei ira tale ga mera vakuai ira mai na gagadre ca. (2 Timoci 2:​22) Na ilesilesi vaka oqo ena rawa nira “vakatovolei” mada kina e liu na tacida tagane era kakavaka tiko mera dauveiqaravi vakaitalatala. (1 Timoci 3:​10) Na nodra tu vakarau ni vakaitavi ena soqoni kei na nodra gumatua ena cakacaka vakavunau, vaka kina na yalo ni veikauaitaki era vakaraitaka vei ira kece ena ivavakoso, sa ra na kila kina na qase ni ivavakoso na ka e rawa nira vakayacora na tacida vaka oqo nira vakaturi ena so tale na ilesilesi.

Raica na Yasana Era Vinaka Kina na Tani

18. Na leqa cava me levei ni caka na veilewai? Na cava na vuna?

¹⁸ “Sa sega ni vinaka me vinakati ira loa [se, “vakaduiduitaki ira,” NW] na tamata ni ia na veilewai,” e kaya na Vosa Vakaibalebale 24:23. Na vuku mai lomalagi e vinakata mera kua ni veivakaduiduitaki na qase ni ivavakoso nira veilewai ena ivavakoso. E kaya o Jemesa: “Na vuku maicake sa savasava mada, emuri sa dauia na veivakacegui, sa yalomalua, sa vakamasuti rawarawa, sa sinai e na loloma kei na vua vinaka, sa sega ni digitaki ira vakatani na tamata, se dauveivakaisini.” (Jemesa 3:​17) O koya gona, nira raica tiko na qase na yasana era vinaka kina e so tale, mera qarauna me kua ni vakatau nodra vakatulewa ena veiwekani vakayago se na nodra loloma vakasivia. A vola na daunisame o Esafa: “Sa tu na Kalou e na nodrai soqosoqo na kaukauwa; sa lewa e na kedra maliwa na kalou [se “o ira era vaka na kalou,” e dusi ira na tamata era dauveilewai]. A cava na kena dede ni dou na lewa vakatawadodonu tiko, ka goleva na tamatai valavala ca?” (Same 82:​1, 2) O koya gona, mera kua vakadua ni veitovaki na qase ni ivavakoso vakarisito ke mani dua na veilewai e vauci ira na nodra itokani se wekadra. Na sala oqo era taqomaka kina na duavata ni ivavakoso qai vakavuna me drodro vinaka kina na yalo tabu i Jiova.​—1 Cesalonaika 5:​23.

19. Ena sala cava soti eda na raica kina na yasana era vinaka kina e so tale?

¹⁹ Nida raica na yasana era vinaka kina na tacida tagane kei na yalewa, eda sa muria tiko kina na itovo ni rai i Paula ni vosa vei ira ena ivavakoso mai Cesalonaika. A kaya: “Ia keitou sa vakadinata na Turaga e na vukumudou, ni dou sa qai cakava ka dou na cakava emuri na veika keitou sa vakarota vei kemudou.” (2 Cesalonaika 3:4) Eda na raibaleta na nodra malumalumu e so nida raica na yasana era vinaka kina. Eda na qara na sala meda vakacaucautaki ira kina na tacida, da qai kua ni veivakalewai. A vola o Paula: “Sa kilikili kei ira na dauniyau me vakadinadinataki ni ra sa tamata yalo dina.” (1 Korinica 4:2, VV) Na nodra yalodina na ivakatawa ni ivavakoso kei ira kece na tacida tagane kei na yalewa lotu Vakarisito, era ka talei kina vei keda. Eda veivolekati kina, qai vaqaqacotaka na ivau ni noda veiwekani vakarisito. Na noda rai sa na vakatale ga na ivakarau ni rai i Paula vei ira na mataveitacini ena nona gauna. Era “i tokani e na cakacaka ni matanitu ni Kalou” ra qai “dau veivakacegui” vei keda. (Kolosa 4:​11, VV) Na noda cakava oqo eda sa vakatotomuria sara tiko ga kina na itovo ni rai i Jiova.

20. Na veivakalougatataki cava era na sotava o ira era raica na yasana era vinaka kina na tani?

²⁰ Sega ni vakataratututaki ni lomada meda cavuqaqataka tale ga na qaqanimasu i Niemaia: “Mo ni nanumi au na noqu Kalou, ena ka au vinaka kina.” (Niemaia 13:​31, NW) Dua na ka noda marau nida kila ni raica o Jiova na yasana eda vinaka kina! (1 Tui 14:13) Meda cakava vakatale mada ga kina o keda nida veimaliwai kei ira na tani. Eda na nuitaka kina na veisereki kei na bula tawamudu ena vuravura vou sa voleka sara.​—Same 130:3-8.

O na Sauma Vakacava?

• Na cava e yavu ni nona dau caka vinaka o Jiova vei keda kece?

• E rawa vakacava nida raica na yasana era vinaka kina e so tale

• ena cakacaka vakavunau?

• ena noda vuvale?

• ena noda ivavakoso?

• kei na noda veimaliwai?

[iYaloyalo ena tabana e 18]

Dina nira cati koya taumada na tacina, a raica ga o Josefa na yasana eratou vinaka kina

[iYaloyalo ena tabana e 19]

Na veitusaqati e sega ni tarovi keda meda vukei ira na tamata kece

[iYaloyalo ena tabana e 20]

Dina ni ratou a cala, eratou vosa vakalougatataki kece na luve i Jekope

[iYaloyalo ena tabana e 21]

Dau kidavaki ira kece na lako mai ena soqoni vaKarisito