Na Mataqali Loloma Uasivi

ENA vuqa na gauna ena iVolatabu Vakirisi Vakarisito, se na Veiyalayalati Vou, na vosa “loloma” e dau vakadewataki mai na vosa vakirisi na a gaʹpe.

Me vakamacalataki na ibalebale ni vosa oqo, e kaya e dua na kena ivakamacala ena ivola na Insight on the Scripturesa: “Na [a·gaʹpe] e sega ni mataqali loloma eda sucukaya mai me vaka na loloma vakaveiwekani, ia oqo na kena e yavutaki ena ivakavuvuli e vulici me vaka na itavi, se na ivakarau, e raica ga na itovo vinaka ni tamata. Na a·gaʹpe (loloma) e ulabaleta na veicacati, qai sega ni vakalaiva na veika vaka oya me biuta kina na ivakavuvuli dodonu, se me sauma na ca e caka vua.”

Na a·gaʹpe e rawa ni okati tale ga kina na loloma e vu dina mai lomada. E veiuqeti kina na yapositolo o Pita: “Mo dou dauveilomani vakalevu [a·gaʹpe] vakai kemudou; ni na ubia nai valavala ca e vuqa na loloma.” (1 Pita 4:8) Oya na vuna e rawa ni tukuni kina ni mataqali loloma oqo e vauci kina na lomada kei na noda vakasama. Vakacava mo dikeva e so na tikinivolatabu e vakaraitaka na kaukaua kei na rabailevu ni mataqali loloma uasivi oqo? E rawa ni vukei iko na veitikinivolatabu oqo: Maciu 5:​43-​47; Joni 15:​12, 13; Roma 13:​8-​10; Efeso 5:​2, 25, 28; 1 Joni 3:​15-​18; 4:​16-​21.

[iVakamacala e ra]