O Dau Muria na “Sala Sa Uasivi Cake” ni Loloma?

“SA LOLOMA na Kalou.” Na vosa qori i Joni e vakaraitaka na itovo e kilaitani kina na Kalou. (1 Joni 4:8) Nona lomani keda na kawatamata, a rawa kina nida torovi koya da qai veiwekani voleka kei koya. Na sala cava tale e uqeti keda kina na loloma ni Kalou? E tukuni ni “dau yavutaki noda rai ena veika eda taleitaka.” E dina taucoko qori. Ia, e yavutaki tale ga noda rai ena noda lomani ira eda taleitaka, kei ira na taleitaki keda. Nida buli meda ucuya na Kalou eda rawa sara ga ni vakatotomuria nona loloma. (Vkte. 1:27) E vola na yapositolo o Joni nida lomana na Kalou baleta ‘ni a lomani keda taumada’ o koya.​—1 Joni 4:19, VV.

Va na Vosa e Vakamacalataka na Loloma

E vakatoka na yapositolo o Paula na loloma me “sala sa uasivi cake.” (1 Kor. 12:31, VV) Na cava e vakamacalataki kina va qo na loloma? Na loloma cava e vakaibalebaletaka tiko o Paula? Meda sauma na taro qo, ena vinaka meda dikeva mada na ibalebale ni “loloma.”

Era dau vakayagataka na kai Kirisi makawa e va na vosa, e taurivaki ena vica na sala me vakamacalataka kina na loloma: na stor·geʹ, eʹros, phi·liʹa, kei na a·gaʹpe. E vakayagataki na a·gaʹpe me vakamacalataka ni “sa loloma” na Kalou.a E kaya me baleta na loloma o Parofesa William Barclay ena ivola na New Testament Words: “Na agapē e vauci kina noda vakasama: e sega ni ivakarau ni yalo e basika ga mai e lomada, ia e ivakarau ni bula eda vinakata meda bulataka. Na agapē e lakolakovata kei na ka o vakasamataka mo cakava.” Macala gona ni a·gaʹpe e vakaibalebaletaki ena loloma e dusimaki ena ivakavuvuli, ia e dau salasalavata kei na ivakarau ni lomada. Me vaka nira tu na ivakavuvuli vinaka kei na ivakavuvuli ca, ena vinakati gona mera dusimaki na lotu vaKarisito ena ivakavuvuli vinaka, e vakarautaka qo na Kalou o Jiova ena iVolatabu. Nida vakatauvatana na a·gaʹpe kei na so tale na vosa e vakayagataki ena iVolatabu e dusia na loloma, eda na qai kila kina na loloma me bulataki.

Loloma ena Loma ni Vuvale

E ka marautaki meda lewena na vuvale era duavata qai veilomani na lewena! Na vosa vaKirisi na stor·geʹ e dusia na veilomani e laurai vei ira na lewenivuvale. Era sasagataka na lotu vaKarisito mera lomani ira na lewe ni nodra vuvale. A parofisaitaka o Paula ni levu na tamata ena iotioti ni veisiga qo era na “caca veiwekani.”b​—2 Tim. 3:​1, 3.

E rarawataki ni sega ni laurai e vuravura nikua na loloma vakaveiwekani ena kedra maliwa na lewenivuvale. Na cava era vakalutu kina na yalewa? Na cava era sega ni kauaitaki ira kina nodra itubutubu qase e levu na vuvale? Na cava e tubu tiko ga kina na iwiliwili ni veisere? Ni sa sega na veilomani vakaveiwekani.

Kena ikuri, e tukuna na iVolatabu “sa ka dauveivakaisini duaduaga na yalo ni tamata.” (Jere. 17:9) Na loloma vakaveiwekani e okati kina na lomada kei na ivakarau ni lomada. E vakayagataka o Paula na a·gaʹpe me vakamacalataka kina na mataqali loloma me vakaraitaka o tagane vei watina. A vakatauvatana gona o Paula na loloma qori kei na loloma e vakaraitaka o Jisu ina ivavakoso. (Efeso 5:28, 29) E yavutaki ena ivakavuvuli i Jiova na loloma qori, ni o koya ga e tauyavutaka na vuvale.

Noda lomani ira dina noda lewenivuvale ena uqeti keda meda kauaitaki ira noda itubutubu qase se nodra qaravi na luveda. Ena uqeti ira tale ga na itubutubu mera vakavulici ira vakayalololoma na luvedra ena gauna veiganiti, ra qai sega ni vakademeni ira na luvedra.​—Efeso 6:1-4.

Loloma ni Veidomoni kei na iVakavuvuli Vakaivolatabu

Na nodrau veilomani na tagane kei na yalewa ena vakawati e isolisoli vakalou. (Vkai. 5:15-17) Ia, na vosa na eʹros, e vakaibalebaletaka na loloma ni veidomoni, ra qai sega ni vakayagataka qo na dauvolaivolatabu. Na vuna? Ena vica na yabaki sa oti, e vakaraitaka Na Vale ni Vakatawa: “Na vuravura nikua e vakayacora na cala vata ga era cakava na kai Kirisi makawa. Era sokaloutaki Eros me nodra kalou, ra cuva ena kena valenisoro ra qai vakacaboisoro vua. . . . Ia, e vakaraitaka na ivolatukutuku makawa ni sokalou va qo e yavutaki ena loloma ni veiyacovi e vakasisila, e ivalavala torosobu qai vakavuna na veitawasei. De dua, oya na vuna era sega ni vakayagataka kina na dauvolaivolatabu na vosa qori.” E bibi me lewai keda na ivakavuvuli vakaivolatabu me kua kina ni yavutaki noda veiwekani ena kena irairai e dua kei na veidomoni. Meda dui taroga, ‘E veiraurau beka noqu loloma ni veidomoni kei na loloma dina vei noqu itokani?’

E kaukaua sara ena gauna ni “bula vakaitabagone” na gagadre ni veiyacovi. Nira dei na itabagone ena ivakavuvuli vakaivolatabu era na savasava tiko ga kina. (1 Kor. 7:36, NW; Kolo. 3:5) Eda raica me isolisoli talei i Jiova na vakawati. E kaya o Jisu me baleti ira na veiwatini: “Na ka sa vauca vata na Kalou, me kakua ni tawasea rua na tamata.” (Maciu 19:6) Eda dei ena noda bula vakawati baleta nida raica vakabibi, e sega ni noda veivinakati wale ga. Ni yaco na duidui ena vakawati, eda na sega ni vaqara na iwali rawarawa duadua, ia eda na saga meda vakaitovotaka na itovo vakalou me marautaki tiko ga kina na bula vakavuvale. Na sasaga va qori ena vakavu marau me tawamudu.​—Efeso 5:33; Iper. 13:4.

Loloma ni Veitokani

Ena vakavucesa na bula ke sega na itokani! E dua na vosa vakaibalebale e kaya: “Sa dua na wekada [“itokani,” NW] sa veikabiti dina sara ka sa sega ni vakakina na veitacini.” (Vkai. 18:24) E vinakata o Jiova meda vakaitokani vinaka. E kilai vinaka nodrau veitokani voleka o Tevita kei Jonacani. (1 Sam. 18:1) A vakaraitaka tale ga na iVolatabu ni o Jisu e dau “veivolekati” kei na yapositolo o Joni. (Joni 20:2, NW) Na phi·liʹa e vosa vaKirisi ni “veivolekati” se “veitokani.” E sega ni cala meda veitokani voleka kei na dua ena loma ni ivavakoso. Ia, ena 2 Pita 1:7, eda uqeti meda vakaraitaka na loloma (a·gaʹpe) ena “veilomani vakaveitacini” (na phi·la·del·phiʹa, e yavutaki ena vosa phiʹlosʹ, e vosa vaKirisi ni “itokani” kei na a·del·phosʹ, e vosa vaKirisi ni “veitacini”). Me rawa ni dei na veitokani, ena vinakati me muri na ivakasala qo. Eda na taroga, ‘E veiraurau beka noqu veitokani kei na ivakavuvuli vakaivolatabu?’

E dusimaki keda na Vosa ni Kalou meda kua ni veivakaduiduitaki. Me kua ni veivakaisini noda ivalavala, oya meda yalorawarawa vei ira noda itokani qai yalodredre vei ira na sega ni noda itokani. Kena ikuri, eda na sega ni marimari meda na veitokani rawa kina. E bibi duadua, noda vakamuria na ivakavuvuli vakaivolatabu ena vakavukui keda meda digitaka kina vakavuku na noda itokani da qai yawaki ira na ‘vakacala na ivalavala vinaka.’​—1 Kor. 15:33.

iVau ni Loloma e Duatani!

E duatani na ivau e vakaduavatataki keda na lotu vaKarisito! A vola na yapositolo o Paula: “Me kakua ni veivakaisini na nomuni loloma. . . . Ni veilomani ena veilomani ni veitacini.” (Roma 12:9, 10, NW) Era vakaraitaka na lotu vaKarisito na ‘loloma (a·gaʹpe) e sega ni veivakaisini.’ Na loloma qo e sega ni dua na ivakarau ni yalo e tu ga e lomada. Ia, e yavutaki ena ivakavuvuli vakaivolatabu. E cavuta tale ga o Paula na “veilomani” (phi·la·del·phiʹa) kei na “veilomani ni veitacini” (na phi·loʹstor·gos, na vosa e buli ni cokovata na phiʹlos kei na stor·geʹ). E kaya e dua na dauvakadidike, ni “veilomani vakaveitacini” oya na “loloma e veitarai cake, e veikauaitaki, e veinanumi qai veivukei.” Ni salasalavata kei na a·gaʹpe, era na veitokani voleka kina na dausokaloutaki Jiova. (1 Ces. 4:9, 10) Na vosa e vakadewataki me “veilomani ni veitacini,” e basika vakadua ena iVolatabu qai dusia na veivolekati ena vuvale.c

E vakaduavatataki ira na lotu vaKarisito dina na kena vakaitovotaki na loloma vakaveiwekani kei na loloma ni veitokani, ra qai dusimaki na veiwekani kece qo ena loloma e yavutaki ena ivakavuvuli vakaivolatabu. Na ivavakoso vaKarisito e sega ni isoqosoqo ni veimaliwai se dua na kalavo, ia eda dua na matavuvale eda duavata na qaravi Jiova. Eda vakatokai ira eda vakabauta vata mera tacida ra ganeda vakayalo tale ga. Era okati mera lewe ni noda vuvale vakayalo, eda lomani ira me vaka noda itokani, qai yavutaki ena ivakavuvuli vakaivolatabu na ivakarau ni noda veimaliwai. Meda vaqaqacotaka tiko ga na loloma e vakaduavatataki keda, e ivakatakilakila tale ga ni ivavakoso dina vaKarisito.​—Joni 13:35.

[iVakamacala e ra]

[Tikina bibiena tabana e 12]

O na vaqaqacotaka vakacava na loloma e vakaduavatataki keda?