Taro na Dauwiliwili
A vakatara o Jiova vei ira nona dauveiqaravi na Isireli ena gauna makawa, me dua na tagane me levu na watina, ia e sa sega ni vakatara ena gauna oqo. E dau veiveisau beka na nona ivakarau?
E sega ni veisau na rai i Jiova me baleta na tagane e levu na watina. (Same 19:7; Malakai 3:6) Na ka oqo e sega ni tiki ni veika e tuvanaka vei ira na kawatamata mai na ivakatekivu me yacova mai nikua. Na gauna a buli Ivi kina me wati Atama, a vakamatatataka o Jiova na ituvatuva vakalou, oya me dua ga na watina na tagane. “Oqo sa na biuta kina na tamana kei tinana na tagane, ka kabita na watina: a rau na lewe dua ga.”—Vakatekivu 2:24.
Ena gauna a bula voli kina e vuravura o Jisu Karisito, a tokaruataka na ituvatuva oya ni sauma tiko na nodra taro o ira na via kila na veika me baleta na veisere kei na vakawati tale. E kaya: “Dou a sega beka ni wilika, ko koya sa buli rau e nai vakatekivu sa bulia ga na tagane kei na yalewa, a sa kaya, E na vuku ni ka oqo ena biuti tamana kei na tinana na tagane, ka kabita na watina: a rau na lewe dua? O koya oqo erau sa sega kina ni lewe rua tiko, erau sa lewe dua ga.” Tomana tale o Jisu: “O koya ena biuta tani na watina, ke sa sega ni dautagane, ka laki vakawati kei na dua tani, sa dauyalewa.” (Maciu 19:4-6, 9) E matata mai na tikina oqo ni okati tale ga me dauyalewa na tagane e levu tu na watina.
Ia na cava ga e vakatarai kina ena gauna makawa me levu na watina e dua na tagane? Nanuma tiko ni oqo e sega ni ituvatuva i Jiova. Na imatai ni tamata e cavuti ena iVolatabu me levu tu na watina o Lemeki, e kawa mai vei Keni. (Vakatekivu 4:19-24) Gauna e vakavuna kina o Jiova na Waluvu ena siga i Noa, o Noa kei iratou na tolu na luvena tagane e yadua ga na watidratou. Era vakarusai kece ena Waluvu o ira na levu tu na watidra.
Vica na drau tale na yabaki e muri, ena gauna a digitaki ira kina na Isireli o Jiova mera nona tamata e so vei ira e sa levu tu na watidra, sa kena ivakarau tu ena gauna oya me dua na tagane me dua ga na watina. Ia, e sega gona ni vinakata na Kalou mera veisei na vuvale e levu tu na watidra yalewa. A mani vakarautaka kina e dua na lawa mera muria.—Lako Yani 21:10, 11; Vakarua 21:15-17.
Na ivalavala oqo e sega ni tudei, e laurai oqo ena ka e tukuna o Jisu ena ituvatuva dei i Jiova me baleta na vakawati, kei na ka tale ga a vola na yapositolo o Paula ena veiuqeti ni yalo tabu ni Kalou. E kaya: “Na tagane yadua me dua ga na watina, na yalewa tale ga me dua ga na watina.” (1 Korinica 7:2, NW) E uqeti tale ga o Paula me vola ni o koya e digitaki me italatala qase se me tuirara ena ivavakoso vakarisito me “yadua ga na watidra.”—1 Timoci 3:2, 12; Taito 1:6.
E mai muduka na ivakarau ni veiwatini vaka oqo o Jiova ena gauna a tauyavu kina na ivavakoso vakarisito ena rauta na 2,000 na yabaki sa oti. Ena gauna oya sa vakalesui tale na ituvatuva ni vakawati me vaka ga na gauna a bulia kina na tagane kei na yalewa na Kalou, oya na tagane me dua ga na watina. Oqo tale ga na ituvatuva dei vei ira na tamata ni Kalou ena vuravura raraba edaidai.—Marika 10:11, 12; 1 Korinica 6:9, 10.