Taro na Dauwiliwili
E Vakadonuya Beka na Kalou me Dua e Vica Vata na Watina?
Sega; ena imatai ni vakawati ena were o Iteni a tuvanaka na Kalou me dua ga na watina na tagane. A vakabibitaka tale na ituvatuva qori o Jisu Karisito vei ira na nona imuri.—Vakatekivu 2:18-24; Maciu 19:4-6.
Ni bera na gauna vaKarisito, a sega beka ni sivia na dua na watidratou o Eparama, Jekope, Tevita, kei Solomoni? Io e vakakina, ia na cava e kaya na iVolatabu ni a yaco me baleta na vakawati va ya? A yaco na veivala kei na veimaliwai ca ena vuvale i Eparama kei Jekope. (Vakatekivu 16:1-4; 29:18–30:24) Ena dua na gauna emuri sa qai okati ena Lawa ni Kalou na ivakaro qo vei ira na tui: ‘Me kua ni levu na watidra, me kua kina ni gole tani na yalodra.’ (Vakarua 17:15, 17) A sega ni muria na lawa ya o Solomoni, ni vakawatitaka e 700 na yalewa! Ena nodra veivakamuai cala na watina, a sega ni dodonu kina na yaloi Solomoni vei Jiova. (1 Tui 11:1-4) Na iVolatabu e tukuna vakamatata na leqa e yaco ni dua e vica vata na watina.
Eso era na lomatarotarotaka na vuna a vakatara kina na Kalou na ivalavala ni vakawati oya vei ira na nona tamata. Vakasamataka mada qo: De dua o vosota mo cakava tiko vakalekaleka e dua na cakacaka o sega ni taleitaka, baleta o vakasamataka ni se sega ni veiganiti mo kere vakacegu ena gauna sara ga ya ni na vakaleqai kina nomu vuvale. Ia na ivalavala kei na vakanananu ni Kalou e cecere sara vei keda na tamata. (Aisea 55:8, 9) Meda raica mada eso na vuna vinaka e vakatara kina ena dua na gauna na Kalou me dua e vica vata na watina.
Ena were o Iteni a yalataka kina o Jiova e dua na “kawa” ena vakarusai Setani. Sa qai tukuni vei Eparama ni na tama ni dua na matanitu levu, na Kawa yalataki tale ga ena basika mai na nona iyatukawa. (Vakatekivu 3:15; 22:18) A saga o Setani me tarova na nona tadu mai na Kawa ya. A saga me vakawabokotaka na matanitu o Isireli, ena nona dau temaki ira mera caka cala me kua ni vakadonui ira kina na Kalou, me kua tale ga ni taqomaki ira.
Me kua nira coriti na Isireli ena ilawaki i Setani, e dau talai ira kina nona parofita o Jiova me vakaroti ira na nona tamata ke ra sa sega tiko ni muria na ivakatagedegede savasava. Ia e kila nira na sega ni rawa ni muria e veigauna na ivakaro rawarawa mada ga me vaka na qaravi matakau. (Lako Yani 32:9) Ke sa dredre mera muria ya, ena rawa vakacava mera rokova na lawa e vakatabui kina me dua e vica vata na watina? Ni kila vinaka na ivakarau ni tamata, e raica o Jiova ni se sega ni kena gauna me vakatabuya kina na ivalavala sa dede na kena muri voli mai. Ke a sa vakatabuya ena gauna ya, ena rawarawa sara vei Setani me temaki ira na Isireli mera valavala ca.
E vakatara vakalekaleka o Jiova me dua e vica vata na watina me tubu totolo kina na matanitu. Na levu ga ni wiliwili ni lewenivanua, na kena dei tiko ga na matanitu me yacova ni tadu mai na Mesaia. Era na rairai taqomaki tale ga kina eso na yalewa ena gauna dredre, me dua nodra vale, mera vakavuvale tale ga.
Meda nanuma tiko ni vakawati va ya e sega ni tuvatuva i Jiova. A vakatara ena dua na gauna lekaleka, ia e kotora na kena lawa me muri, me kua kina ni vakatanitaki. (Lako Yani 21:10, 11; Vakarua 21:15-17) Ni vakatulewataka o Jiova me muduka na ivalavala ni vakawati oya vei ira era sokaloutaki koya, a vakayagataki Luvena me vakadeitaka na ituvatuva ni vakawati a yaco mai Iteni. A vakatabuya o Jisu vei ira nona imuri me dua e vica vata na watina. (Marika 10:8) Sa qai mai matata vinaka sara na ka dina qo: Na Lawa a soli vei Mosese e vinaka ena kena gauna, ia na “vunau [“lawa,” NW] i Karisito” e uasivi sara.—Kalatia 6:2.