Yaga na iVolatabu ena Bula Vakawati

BULA VAKAWATI​—na vosa oqo e dau vakavurea vei ira e so na vakasama vinaka. So tale, e dau vakavurea na mosi ni yalo. “E vaka sara ga keirau sa sere ni keirau sa sega ni lomavata,” e kaya e dua na yalewa vakawati. “Au vakila niu sa sega ni kauaitaki, au qai galili e veigauna kece.”

Na cava e vakavuna na nodrau dui cakanodrau ga e rua erau a bubuluitaka ni rau na veilomani qai veivakamareqeti? Dua na vuna oya ni rau a sega ni kila na veika e vauca na bula vakawati. “Eda vakawati, dina nida sega ni bau vakavulici kina,” e kaya e dua na dauvolaitukutuku ni tabana vakavuniwai.

Edaidai, e le lailai sara era kila na veika e vauca na bula vakawati me vaka eda raica ena dua na vakatataro a cakava na National Marriage Project, na tabana ni vakadidike ena Rutgers University e New Jersey, mai Mereke. “E levu vei ira na vakatarogi oqo era a susu mai ena vuvale kavoro se bula vakawati e sega ni marautaki,” era kaya na dairekita ni vakadidike oqo. “Era kila vinaka sara ga na bula vakawati e sega ni marautaki, ia era lecava ga se cava na bula vakawati mamarau. Era kaya gona e so ni bula vakawati mamarau e ‘veibasai kei na nodrau bula vakawati na noqu itubutubu.’”

Era sotava tale beka ga na leqa na lotu Vakarisito ena nodra bula vakawati? Io. E so sara mada ga na lotu Vakarisito ena imatai ni senitiuri era a vakaroti sara ga vakadodonu mera “kakua ni veisere.” (1 Korinica 7:​27, VV) E matata, ni rau veiwatini e rua e sega ni uasivi, ena tiko na gauna ena basika kina na veileqaleqataki ia e rawa ni rau vukei. Oya na nodrau vakavinakataka cake na nodrau veiwekani vakaveiwatini ni rau bulataka na ivakavuvuli vakaivolatabu.

E dina ni iVolatabu e sega ni ivola dusidusi ni bula vakawati. Ia, me vaka ni a uqeta na kena volai o Koya a tauyavutaka na vakawati, eda na namaka me yaga na kena ivakavuvuli. A kaya na Kalou o Jiova ena gusu i Aisea na parofita: “Koi au ko Jiova na nomu Kalou, ka’u sa vakavulici iko mo vinaka kina, ka’u sa tuberi iko e na sala mo lakova. De ko a vakarorogo ki na noqu vunau! sa na qai vaka na uciwai na nomu vakacegu, ka vaka na ua ni wasawasa na nomu cakacaka dodonu.”​—Aisea 48:​17, 18.

E sa seavu tiko beka na loloma drau a bucina vakaveiwatini ena dua na gauna? O vakila beka ni o sa vesuki tu ena dua na bula vakawati sega kina na veilomani? E kaya e dua na yalewa sa vakawati tu me 26 na yabaki: “Na rarawa e sotavi ena mataqali veiwatini vaka oqo e sega ni vakamacalataki rawa. E sega ni seavu rawa.” O koya gona, vakacava mo saga mo cakava kina e dua na ka, mai na nomu ciqoma tu ga ni sega ni vakainaki nomu bula vakawati? Ena vakamacalataka na ulutaga e tarava vei ira na tagane kei na yalewa vakawati na sala e rawa ni veivuke kina na iVolatabu ena dua na basoga ni nodra bula vakawati​—oya na nodrau veidinadinati.