Na Vakatulewa​—Dua na iTavi e Sega ni Levei Rawa

“E ITAVI dredre duadua na vakatulewa, sa rauta me ka vakamareqeti,” e kaya o Napoleon Bonaparte, na emapara ni Varanise ena ika19 ni senitiuri. O na rairai duavata kei koya ni dua na ka era vakamareqeta e levu, oya nodra rawa ni vakatulewataka na nodra bula. Ena gauna vata oqori era kila kina ni dau dredre ena so na gauna na vakatulewa.

Ke mani dredre se rawarawa, e sega ni dua e levea rawa na vakatulewa. Eda dau vakatulewa ena veisiga. Nida yadra mai ena mataka eda na vakatulewataka na isulu meda dara, na keda ikatalau, kei na levu tale na ka eda cakava ena loma ni dua na siga. E vuqa na vakatulewa oqori era sega soti sara ni bibi, nida sa dau kila ga na cava meda cakava. Ni okati e ke na ka lalai ga, e macala nida na sega ni lomanuiqawaqawataka se vinaka se ca na noda vakatulewa meda lai sega ni moce rawa sara kina.

Ena yasana adua, e so na vakatulewa e bibi. E levu na itabagone nikua era na vakatulewataka na cakacaka era na via cakava. Era na vakatulewataka beka na mataqali vuli era na gadreva kei na balavu ni gauna era na vuli tiko kina. Ni toso na gauna, e levu vei ira sa ra na lai vakatulewataka mera vakamau se mera dawai tu ga. O ira na via vakawati mera na vakatulewataka: ‘E sa ganiti au beka meu vakawati? Me mataqali tamata vakacava o koya au na vinakata me kequ isa, se na kena e bibi cake, o koya ena ganiti au?’ Na noda vakatulewataka gona na watida e dau cakayaco sara ga vakalevu ena noda bula.

Na ka bibi vaka oqori ena gadrevi kina na vakatulewa vakavuku, ni na vakatau kina na noda marau. E so era dau nanuma ni rawa mera vakatulewa ga vakataki ira, ra qai sega ni dau ciqoma na veivuke. E ka vakayalomatua beka oqori? Meda dikeva mada.

[iTaba ni Credit Line ena tabana e 3]

Napoleon: Ena ivola The Pictorial History of the World