Na Vuvale i Jisu​—O Cei o Iratou?

E NA vula o Tiseba e dau laurai kina vakalevu ena vuqa na vanua na ivakatakarakara ni gonedramidrami o Jisu, rau qai karoni koya toka na tinana o Meri kei na tamana vakacabecabe o Josefa. Era dau kauai sara mada ga kina o ira na sega ni lotu Vakarisito. Me vaka ni vakatabakidua tiko vei Jisu na ivakatakarakara oya, na cava sara mada e kaya na iVolatabu me baleta na vuvale e susugi kina e vuravura?

E veivakurabuitaki na vuvale i Jisu. A kunekunetaki koya e dua na goneyalewa bera ni tara tagane o Meri, mani lewe kina ni dua na vuvale e vuravura. E kaya na iVolatabu ni a tokia nona bula mai lomalagi na yalo tabu qai biuta ena katonigone i Meri. (Luke 1:​30-​35) Ni bera ni kunekunetaki ena sala veivakurabuitaki o Jisu, a sa veimusumusuki oti tu o Meri kei na dua na turaga o Josefa, e qai tama i Jisu vakacabecabe.

Ni sucu oti o Jisu, rau a qai vakaluveni tale o Josefa kei Meri mani vica kina na tacina kei na ganena vakacabecabe. E qai vakadinadinataki oqori ena taro era taroga na vakaitikotiko e Nasareci me baleti Jisu: “E sega li ni ko koya oqo na luve ni matai? E sega li ni yaca i tinana ko Mere, ka sega li ni ratou tacina ko Jemesa kei Josefa, kei Saimoni, kei Jiutasa? E sega li ni ratou tiko oqo vata kei keda na ganena kece?” (Maciu 1:​25; 13:​55, 56, VV; Marika 6:3) Eda kila mai na itukutuku oqo na lewe ni vuvale i Jisu, o rau na nona itubutubu, iratou na va na tacina kei rau na ganena.

Ia, era sega ni vakabauta e so edaidai ni ratou luve i Meri kei Josefa na vo ni taci Jisu. Baleta? E kaya na New Catholic Encyclopedia: “Mai na kena itekivu, sa dau vakatavulica na Lotu ni o Meri a savasava tu ga qai sega vakadua ni bau tara tagane. Ena rai gona oqo, ena sega ni dua e vakatitiqataka nona sega ni vakaluveni tale o Meri.” E kaya na ivola vata tiko ga oya ni vosa “tacina” kei na “ganena” e rawa ni tukuni ga vua e “dua, se o ira era lotu vata, se veivolekati” se ra veiwekani, se veitatacini.

E dina beka oqori? E so mada ga na vuku ni lotu Katolika era saqata na ivakavuvuli tudei ni lotu, ra qai tokona na vakasama nira tiko na taci Jisu vakayago. E vola o John P. Meier, a peresitedi tu e liu ni Catholic Bible Association of America: “Ni vakayagataki na vosa adelphos [tacina] ena N[ew] T[estament], oqori e sega ni vosa wale tiko ga vakaivakatakarakara se vosa vakaibalebale, ia e vakaraitaka sara ga e dua na veiwekani, ni rau veitacini dina, se tacina ga vakacabecabe.”a Io, e vakaraitaka sara tu ga na iVolatabu ni tiko e so na taci Jisu kei na ganena, era luve tale ga i Josefa kei Meri.

E tukuni ira e so tale na weka i Jisu na Kosipeli, ia meda dikeva mada na vuvale voleka i Jisu kei na ka eda rawa ni vulica vei iratou.

[iVakamacala e ra]