Na Totoka ni Veika e Bulia o Jiova
‘Oni sa Levu Vakaidina Mai na Veiulunivanua’
E GUIGUILECAVI dredre na saravi ni kaca ni rarama mai na dela ni ulunivanua o Fuji. E rarabota na roka ni matanisiga ni cabe vakamalua mai na vunilagi, me lai tatatibitibi wale kina na ucacevata e solega tu na ulunivanua. Ni sa rarama cake tale e dua na siga vou, e teteva e vica vata tale na kilomita ena veidelana kei na veibuca na iyaloyalo ni ulunivanua oqo.
Me vaka na ulunivanua o Fuji—e kena ibalebale vakajapani “sega ni dua erau tauvata kaya”—era dau vakadrukai keda na veiulunivanua lelevu. Eda somidi sara ga ni vakatauvatani kei na kedra vakaitamera! Na kedra cere tale ga na veiulunivanua e dau solegi tu ga ena kabu kei na o, era vakabauta kina e levu nira vakaitikotiko kina na veikalou.
Na veiulunivanua cecere oqori e vakacaucautaki duadua ga kina na Kalou o Jiova, na Dauveibuli. O koya ga a “bulia na veiulu-ni-vanua.” (Emosi 4:13) Rauta ni duanaikava kei vuravura e kovuta na veiulunivanua. Na gauna tale ga a bulia kina na noda vuravura na Kalou, sa kotora vata tu kei na kaukaua levu e rawa ni yavala me buli rawa kina na veidelana kei na veiulunivanua. (Same 95:4) Me kena ivakaraitaki, e vakabauti ni basika na veiulunivanua na Himalaya kei na Andes ena levu ni kena yavalati kei na veitosoyaki ni iwasewase ena loma ni vuravura.
Eda sega ni kila na kawatamata na veika matailalai e vauca na veiulunivanua kei na vuna era buli kina. Sa rauta meda sega ni sauma rawa na taro a tarogi kina na tamata yalododonu o Jope: “Ko a tiko maivei ni ka’u [o Jiova] a tauyavutaki vuravura? . . . Sa tauyavutaki e na dela ni cava?”—Jope 38:4-6.
Eda kila ga ni vakatau na noda bula ena veiulunivanua. Era vakatokai mera ivurevure ni wai, ni veiuciwai lelevu kece era vure mai kina. Era vakanuinui tale ga e veimama na lewe i vuravura ina wai mai na veiulunivanua. (Same 104:13) E kaya na ivoladraudrau na New Scientist, ni “ono mai na 20 na kau e dau laukana vakalevu duadua era bula taumada mai na veiulunivanua.” Ni sa na daumaka na ituvaki ni qele kei na draki kei vuravura ena vuravura vou e yalataka na Kalou, “ena sa tu e vuravura e na dela ni veiulu-ni-vanua na sila e qumi rawarawa ga; ena kurekure na vuana.”—Same 72:16; 2 Pita 3:13.
Vei ira e levu, ni cavuti na veiulunivanua era lai nanuma kina na veiulunivanua na European Alps. Na veiulunivanua oqori, e okati tiko kina na ulunivanua o Civetta mai Itali, e taba tu oqo, e ivakadinadina vinaka ni bula dina tiko o koya a bulia. (Same 98:8) Era vakacaucautaki Jiova, o koya “sa vakataudeitaka na veiulu-ni-vanua e na nona kaukauwa.”—Same 65:6.a
E vakatubuqoroqoro dina na totoka ni veiulunivanua na Alps, kei na ucacevata e ubia tu na kena veitokaitua kei na kena veiqakilo, na veibuca, drano kei na kena veico. O Tui Tevita e tukuni Jiova me “o koya sa vakatubura na co e na veiulu-ni-vanua.”—Same 147:8.
Na delana lelevu—me vaka na kena e tabaki tu oqo e Guilin, mai Jaina—era na sega sara beka ni vakatubuqoroqoro me vaka na veiulunivanua lelevu na Alps, ia era rairai totoka dina. Ni tuvani ravita toka na uciwai o Li, e dau vakadrukai ira na vulagi na totoka ni kena veivatu. Ni laurai na drodro ni wai makare ena delana lelevu qai kabukabu oqo, ena rairai nanuma kina e dua na vosa ni daunisame: “Sa vakatubura ko . . . [Jiova] na mata-ni-wai e na buca, ka sa lako voli e na maliwa ni veiulu-ni-koro.”—Same 104:10.
Eda qoroya na veiulunivanua nida kila nira isolisoli uasivi ni Dauveibuli me bula qai marau kina na kawatamata. Era na vakaitamera sara beka na veiulunivanua, ia era sega ni tautauvata kei na cecere i Jiova, ni o koya e “levu vakaidina, mai na veiulu-ni-vanua.”—Same 76:4.
[iVakamacala e ra]
a Raica na 2004 Calendar of Jehovah’s Witnesses, Maji/Epereli.
[Katona ena tabana e 9]
E tini na pasede ni lewe i vuravura era vakaitikotiko ena veiulunivanua. Ia oqo e sega ni tarovi ira na daukacivaka na itukutuku vinaka ni Matanitu ni Kalou. Era cakacaka vakaukaua na italatala lotu Vakarisito oqo ena levu na veiulunivanua cecere. Sa dua na ka “na kena lagilagi e na ulu-ni-vanua na yava i koya sa kauta mai nai rogorogo vinaka, sa vakarogoya mai na sautu, sa kauta mai nai rogorogo vinaka ni ka vinaka, ka vakarogoya mai na veivakabulai!”—Aisea 52:7.
E lagata na daunisame: “Na veiulu-ni-vanua cecere sa nodrai drodro na me kila.” (Same 104:18) Na me kila ni ulunivanua, me vaka na me ileu levu na Nubian ibex, e dua vei ira na manumanu era bula ena veiulunivanua, era kenadau ena veidewayaki ni rawa sara mada ga nira muria na vanua qiqo e dredre me lakovi. Na ibulibuli tale ga ni ibex e rawa kina ni bula ena vanua dredre. E veivuke vakalevu na ibulibuli ni itaukuku ni yavana. Na kena bi tale ga na me oqo e tawase kina na kena itaukuku, e dei vinaka kina ni duri tu se veilakoyaki voli e dela ni veivatu qiqo. Sa rauta me dua na ibulibuli vakatubuqoroqoro na ibex!
[iYaloyalo ena tabana e 9]
Ulunivanua o Fuji, e Honshu, mai Japani