Taro na Dauwiliwili
E cala beka nona tukuna o Jekope ena Vakatekivu 27:18, 19 ni o koya ga o Iso?
O sa na rairai kila vinaka na italanoa oqo. Ni sa qase sara o Aisake, a kerei Iso me lai vakasasa manumanu me kana kina. E kaya: ‘Meu kana, meu vosa vakalougatataki iko ni bera niu mate.’ Ni rogoca o Repeka na vosa i Aisake, a vakarautaka sara e dua na kakana vinaka qai tukuna vei Jekope: “Ko na qai kauta [na kakana] vei tamamu, me kania ko koya, ka me vosavakalougatataki iko ni sa bula tiko.” A dara o Jekope na isulu i Iso kei na kulinime ena ligana kei na domona qai kauta vei tamana na kakana. Ni tarogi koya o Aisake, “Ko cei ko iko, na luvequ?” a sauma o Jekope: “Koi au ko Iso na nomu ulumatua.” A vakabauta o Aisake, mani vakalougatataki koya.—Vakatekivu 27:1-29.
E sega ni kaya na iVolatabu na vuna rau cakava kina oya o Repeka kei Jekope, ia e vakaraitaka ga ni a yaco vakasauri na ituvaki oya. E dodonu meda nanuma tiko ni a sega ni vakadonuya se vakacala na Vosa ni Kalou na ka rau cakava o Repeka kei Jekope, ia e sega ni dodonu me vakayagataki na ivakaraitaki oqo me caka kina na lasu se na veivakacalai. E vakamatatataka ga na iVolatabu na ka e yaco.
Kena imatai, e tukuna vakamatata na italanoa oqo ni a dodonu ga me vakalougatataki Jekope o tamana, sega ni o Iso. Ni sega ni taura vakabibi o Iso na veika vakayalo, a volitaka ena dua na gauna e liu na nona itutu vakaulumatua vei Jekope me rawa ni kana kina. Oqo e vakaraitaka na nona “beca ko Iso na nonai tutu ni ulumatua.” (Vakatekivu 25:29-34) O koya gona, nona lakovi tamana o Jekope, a vinakata ga na vosa ni veivakalougatataki e dodonu me nona.
Kena ikarua, ni liaca o Aisake ni a vosa vakalougatataki Jekope, a sega ni veisautaka na ka a cakava. De dua, a nanuma o koya na vosa a tukuna o Jiova vei Repeka ni bera ni rau sucu na drua: “Ko koya sa qase ena qaravi koya sa gone.” (Vakatekivu 25:23) Meda vakasamataka tale ga ni gauna a vakarau biubiu kina o Jekope me gole i Karana, a qai vosa vakalougatataki koya tale o Aisake.—Vakatekivu 28:1-4.
Kena ikatolu, meda nanuma tiko ni a kila, e kauaitaka tale ga o Jiova na ka e yaco oya. Na veivakalougatataki a tauca o Aisake e veisemati kei na yalayala ni Kalou vei Eparama. (Vakatekivu 12:2, 3) Kevaka a sega ni vinakata me vosa vakalougatataki o Jekope, ke a tarova o Jiova. Ia, a qai vakadeitaka vei Jekope o Jiova na tikina oqo ni kaya: ‘Ena kalougata ena vuku ni nomu kawa na veimataqali kece ga e vuravura.’—Vakatekivu 28:10-15.