Mo Dau Yalololoma ena Vuravura Ca
“Ni sa yalololoma na tamata sa dauvinakati kina ko koya.”—VOSA VAKAIBALEBALE 19:22.
1. Na cava e dredre kina ni vakaitovotaki na yalololoma?
O KILAI beka ni o dau yalololoma? Ke vaka kina, e sa na bau ka ni sasaga toka oqori ena gauna oqo. Na yalololoma dina e cavuti ena iVolatabu e dua na ‘vua ni yalo tabu,’ ia na cava e dredre kina ni vakaitovotaki ena veivanua mada ga era kaya voli nira lotu Vakarisito? (Kalatia 5:22) Me vaka ga eda sa dikeva mai ena ulutaga sa oti, na kena isau e kune ena ka a vola na yapositolo o Joni—ni liutaka tu na vuravura o Setani na Tevoro, e sega ni dau yalololoma. (1 Joni 5:19) E vakatokai koya o Jisu Karisito me “turaga ni vuravura oqo.” (Joni 14:30) Sa rauta me ucui koya na iliuliu dau veivorati oqori na vuravura e laurai levu kina na itovo kaukaua.—Efeso 2:2.
2. Na cava e ka ni bolebole kina na noda dau yalololoma?
2 E dau cakayaco sara ga ena noda bula na ca ni nodra ivalavala vei keda e so tale. E vakadinadinataki ni so na gauna era sega ni dau veinanumi o ira eda tiko veitikivi, o ira eda sega ni veikilai, o ira na noda itokani kei ira na wekada. E dau veivakayalolailaitaki na noda veitaratara tiko e veisiga kei ira na dau veibeci, o ira na dau karakara, kei ira na dau veiru. Na lailai ni nodra yalololoma e rawa ni uqeti keda meda vakatotomuri ira. Ke ra sega gona ni yalololoma vei keda, eda na sega tale ga ni yalololoma vei ira. Oqo e rawa ni vakatauvimatetaki keda vakayalo, vakayago tale ga.—Roma 12:17.
3. Na veileqa cava era sotava na tamata e vakatovolei kina na nodra yalololoma?
3 Na veileqa lelevu e tarai vuravura tu e rawa tale ga ni vakadredretaka na noda dau yalololoma. Kena ivakaraitaki, e dau nuiqawaqawataki vakalevu na nodra vakacaca na batikadi, kei na kena leqataki na nodra na vakayagataka na iyaragi vakaniukilia e so na ilawalawa era tu. Kuria oya, e milioni era bula dravudravua. E lailai ga na kedra, era sega ni vakavale vinaka, era vakaisulu kakadresudresu, qai takiveiyaga na veiqaravi vakavuniwai ena vukudra. E ka ni bolebole gona na kena vakaitovotaki na yalololoma ena ituvaki leqaleqa vaka oqo.—Dauvunau 7:7.
4. Na cava era dau nanuma cala e so me baleta na yalololoma?
4 E rawa ni nanuma e dua ni sega soti ni yaga vua me dau yalololoma, ni na raici kina me tamata dadatuvu. Ke vakaitovotaka, ena beci kina se buturaki sobu. (Same 73:2-9) Ia, e dusimaki keda na iVolatabu ni kaya: “A vosa vakayalovinaka sai vakamalumu ni cudru: ia na vosa vakararawa sa vakatubura na cudru.” (Vosa Vakaibalebale 15:1) Erau vua ni yalo tabu erau veisemati vinaka na yalomalumalumu kei na yalomalua, e dau yaga sara ga ena gauna e sotavi kina e so na ituvaki dredre.
5. Na cava e so na vanua ena gadrevi meda vakaitovotaka kina na yalololoma?
5 Ni bibi vei keda na lotu Vakarisito na kena vakaitovotaki na vua ni yalo tabu ni Kalou, e vinaka meda vakasamataka na sala eda rawa ni vakaitovotaka kina e dua vei ira na itovo oya—na yalololoma. E rawa beka nida yalololoma ena vuravura ca oqo? Ke vaka kina, cava e so na sala eda na yalololoma tiko ga kina, e dina ni na saga o Setani me kauta laivi vei keda na yalo oqori, vakauasivi nida sotava e so na ituvaki leqataki sara? Meda dikeva mada na sala meda na yalololoma kina ena matavuvale, e vanua ni cakacaka, e koronivuli, vei ira eda tiko veitikivi, ena cakacaka vakavunau, kei ira eda vakabauta vata.
Yalololoma ena Matavuvale
6. Na cava e bibi kina ena vuvale na yalololoma, ia eda na vakaitovotaka vakacava?
6 E bibi meda vakaitovotaka sara na vua ni yalo tabu me qai vakalougatataki keda o Jiova, me dusimaki keda tale ga. (Efeso 4:32) Meda dikeva mada na ka ena gadrevi vei ira na lewenivuvale mera dau yalololoma kina. Ena nodrau bula e veisiga, me rau dau yalololoma na veiwatini ni rau tiko taurua, me rau yalololoma tale ga vei ira na gone. (Efeso 5:28-33; 6:1, 2) Na yalololoma oqo me laurai ena ivakarau ni nodratou veivosaki vakavuvale, vei ira na gone ena nodra veivakarokorokotaki, vaka kina vei rau na itubutubu ena nodrau ivalavala vei ira na luvedrau. Mo kusarawa ni veivakacaucautaki, ia mo berabera ga ena veivakalewai.
7, 8. (a) Na itovo cava me kua ni tiko vei keda me rawa kina nida vakaraitaka na yalololoma dina ena vuvale? (b) E vakaukauataka vakacava na vuvale na vinaka ni veivosaki? (c) O na vakaraitaka vakacava na yalololoma ena nomu vuvale?
7 Na noda yalololoma ena noda vuvale e okati kina na noda muria na veivakadreti i Paula: “Ia oqo, mo dou luvata na ka kecega oqo, a daucudru, na daulesa, na lomaca, na vosa ca, na vosa dukadukali mai na gusumudou.” Mera dau veivosaki e veisiga ena sala veidokai na vuvale lotu Vakarisito. Na cava na vuna? Ena vakaukauataka, ena vakabulabulataka tale ga na matavuvale na nodra veivosaki wasoma. Ni tubu e dua na veileti, me kua ni nomu inaki mo qaqa ena veiba, ia mo walia na leqa. Na vuvale mamarau era na saga ena nodra igu mera vakaliuca tiko ga na yalololoma, ra qai veikauaitaki.—Kolosa 3:8, 12-14.
8 E dau raica na yasana vinaka na yalololoma, ena via cakava tu ga na ka vinaka. O koya gona, eda na via veitokoni, eda na dau veinanumi, da qai veivukei vakavuvale. Ena gadrevi na noda sasaga yadudua kei na noda sasaga vata vakavuvale me qai basika na mataqali yalololoma ena rogorogo vinaka kina na noda vuvale. Na ka oqo ena vakalougatataki keda kina na Kalou, qai vakavuna mera dokai Jiova, na Kalou yalololoma na ivavakoso, kei ira ena taudaku ni ivavakoso.—1 Pita 2:12.
Yalololoma e Vanua ni Cakacaka
9, 10. Vakamacalataka e so na leqa e rawa ni tubu ena vanua ni cakacaka, qai vakamacalataka na sala vakayalololoma e rawa ni wali kina.
9 Ena ka ni bolebole toka vua na lotu Vakarisito na yalololoma ena veisiga vei ira era cakacaka vata. Na veiqati e vanua ni cakacaka e dau vakaleqa na nona cakacaka e dua, baleta beka ni qitocataki mai vei koya erau cakacaka vata, qai rawa sara ga ni vakaleqa na nona veiwekani kei na iliuliu ni cakacaka. (Dauvunau 4:4) E dredre gona me vakaitovotaki na yalololoma ena ituvaki vaka oqo. Ia ni dau dodonu tu ga na veika e caka ena yalololoma, me saga gona na dauveiqaravi i Jiova me rawai ira era sega ni dau veiriti ena vanua ni cakacaka. Na veikauaitaki e rawa ni veivuke ena ituvaki vaka oqo. E rawa ni caka oqo ke tauvimate o koya drau cakacaka vata se dua na lewe ni nona vuvale. Na nomu vakataroga mada ga na nona bula kei na nodratou bula na lewe ni nona vuvale e rawa ni tarai koya sara ga. Io, me saga tiko ga na lotu Vakarisito me guta na veiyaloni kei na veisaututaki. E dau yaga ena so na gauna na vosa vakayalovinaka kei na veikauaitaki.
10 Ena so tale na gauna era dau veivakasaurarataki na iliuliu ni cakacaka vei ira na tamata cakacaka mera cakava e dua na ka, ena vinakata mera vakaitavi kece ena so na soqo vakavanua, se so tale na soqo e veisaqasaqa kei na ivakavuvuli vakaivolatabu. Ke vakacala na nona lewaeloma e dua na lotu Vakarisito me vakaitavi, ena rawa ni tarogi koya kina na iliuliu ni cakacaka. Ena gauna oqori, e sega ni ka vakavuku mo vakamacalataka vakamatailalai ni cala na ka e kerea tiko na iliuliu ni cakacaka. Nida sega ni vakabauta vata, na ka e kerea tiko oya meda cakava ena rairai donu sara tu ga vua. (1 Pita 2:21-23) E rawa ni o vakamacalataka vakayalovinaka na vuna o na sega ni vakaitavi kina. Mo kua ni sauma na vosa ni veivakalialiai ena vosa ni veivakalialiai. E vinaka me muria na lotu Vakarisito na ivakasala ena Roma 12:18: “Kevaka sa rawa, mo dou vakatovolea me veilomani kei ira na tamata kecega.”
Yalololoma e Koronivuli
11. Na cava e sega ni rawarawa kina vei ira na itabagone mera yalololoma vei ira nodra icaba e koronivuli?
11 E sega ni dau rawarawa vei ira na itabagone mera yalololoma vei ira nodra icaba e koronivuli. Era dau vinakata tu na itabagone mera ciqomi vei ira nodra icaba. E so na gonetagane era dau vakaivukivuki me rawa nira sakitaki kina mai vei ira nodra icaba, e so era dau tini veivakasagai sara kina. (Maciu 20:25) E so tale era dau via dokadokataka nira gone vuku, se nira dau qito, se ra dua na ka ena so tale na sasaga. Na nodra dokadokataka gona na veika oqo, era tawayalololoma kina vei ira nodra icaba e koronivuli, e dau tu vei ira na nanuma cala ni nodra cakava oqo era sa dua toka kina na ka mai vei ira nodra icaba. Me qarauna na itabagone lotu Vakarisito me kua ni vakatotomuri ira na gone vaka oya. (Maciu 20:26, 27) E kaya na yapositolo o Paula ni sa “dauvosota vakadede na loloma . . . sa sega ni vosa doudou na loloma, sa sega ni viavialevu.” E tiko gona na nodra itavi na lotu Vakarisito, mera kua ni muria na nodra ivakaraitaki ca o ira na tawayalololoma, ia mera muria ga na ivakaro vakaivolatabu ena nodra veimaliwai kei ira na gonevuli.—1 Korinica 13:4.
12. (a) Na cava ena dredre kina vei ira na itabagone mera na yalololoma vei ira na nodra qasenivuli? (b) Mera qara veivuke e vei na itabagone ke ra vakatovolei mera tawayalololoma?
12 Mera dokai ira nodra qasenivuli na gonevuli. E levu na gonevuli era dau taleitaka mera vakacudrui ira na qasenivuli. Era nanuma nira vuku cake ke ra cakava e so na ka e vakatabui e koronivuli ena vakavuna mera beci kina na qasenivuli. Nira dau veivakalialiai era dau mai tomani ira tale ga kina e so na nodra icaba. Ke sega ni via tomani ira e dua na gone lotu Vakarisito, era na tini vakalialia koya ra qai vosavakacacataki koya. Na sotavi ni ituvaki vaka oqo ena gauna ni vuli, e vakatovolei sara ga kina na nona na via yalololoma tiko ga e dua na gone lotu Vakarisito. Ia mo nanuma tiko ni bibi na nomu qaravi Jiova ena yalodina. Mo nuidei ni na tokoni iko o koya ena yalona tabu ena ituvaki dredre o sotava.—Same 37:28.
Yalololoma Vei Ira Eda Tiko Veitikivi
13-15. Na cava e rawa ni vakalatilati ena kena vakaraitaki vei ira na tiko veitikivi na yalololoma? Ena wali vakacava na leqa oqo?
13 Ke o vakaitikotiko ena dua na vale, se dua na rumu, se dua tale na vanua, ena vinaka ke o vakasamataka e so na sala mo yalololoma kina mo qai kauaitaki ira era tiko tikivi iko. Ia, e sega ni ka rawarawa oqori.
14 Vakacava ke ra sega ni taleitaki iko o ira era tiko tikivi iko baleta ni duidui na roka ni kuli ni yagomu, o gole mai na dua tale na vanua, se duidui nomu lotu? Vakacava ke ra dau veibeci, se ra sega sara ga ni via kilai iko? Ni o dua o qaravi Jiova, e yaga mo vakaraitaka tiko ga ena kena iyacoyaco o rawata na yalololoma. Ena laurai vinaka ni o duatani, qai ka oqori ena vakarokorokotaki kina o Jiova—o koya na ivakaraitaki uasivi ni yalololoma. O cei e kila, de dua ena veisau o koya drau tiko veitikivi ena vuku ni nomu yalololoma. E rawa sara ga ni mai vakacaucautaki Jiova kina.—1 Pita 2:12.
15 Me vakaitovotaki vakacava na yalololoma? Me vinaka na nomudou itovo vakavuvale ena nomudou vakaitovotaka na vua ni yalo tabu oqo. Era na rairai raica tu mai oqo na tiko tikivi kemudou. Ena so na gauna o na cakava beka kina e dua na ka vinaka vua drau tiko veitikivi. Mo nanuma tiko ni o sa yalololoma sara tiko ga ena nomu kauaitaki ira e so tale.—1 Pita 3:8-12.
Yalololoma ena Cakacaka Vakavunau
16, 17. (a) Cava e bibi kina na yalololoma ena cakacaka vakavunau? (b) E rawa ni vakaitovotaki vakacava na yalololoma ena basoga e so ni noda cakacaka vakavunau?
16 Me yavu mada ga ni noda cakacaka vakavunau vakarisito na yalololoma, nida saga meda tarai ira na tamata ena nodra vale, ena vanua ni veivoli, kei na vanua tale e so era dau tu kina vakalevu. Meda nanuma tiko nida matataki Jiova, na Kalou dau yalololoma.—Lako Yani 34:6.
17 Cava e okati ena noda saga meda yalololoma ena cakacaka vakavunau? Kena ivakaraitaki, ni o vunau tu e salatu, o na yalololoma ke o veinanumi, o qai vosa tale ga vakalekaleka. E dau osooso na veiyasa ni sala, mo qarauna kina mo kua ni veivakaosoosotaki. Ke o vunau ena vanua ni bisinisi, mo yalololoma ena nomu vosa ga vakalekaleka, baleta ni tu tale na nodra itavi na itaukei ni bisinisi mera qaravi ira na lai volivoli yani.
18. Na cava erau salavata kina na yalomatua kei na yalololoma ena cakacaka vakavunau?
18 Mo yalomatua ena cakacaka vakavunau e veivale. Mo kua ni dede ena dua na vale, vakabibi ke draki ca. O rawa beka ni vakila ni sa votivoti vei itaukeinivale se veivakasosataki na nomu tiko? De dua, era sa dau lako vakawasoma e veivale na iVakadinadina i Jiova ena vanua o tiko kina. Ke vaka kina, mo veikauaitaki tiko ga, vosa tiko ga vakayalovinaka. (Vosa Vakaibalebale 17:14) Tovolea mo kila na vuna era sega kina ni rogoci iko ena dua na siga na itaukeinivale. Mo nanuma tiko ni na dua tale na tacida lotu Vakarisito ena sikova na vale oya ena dua tale na siga. Ke o sotava e dua e veibeci, saga mo yalololoma tiko ga. Kua ni vosa vakaukaua se mata cudrucudru, vosa ga vakamalua. Na lotu Vakarisito yalololoma ena sega ni tukuna na ka me vakacudruya na itaukeinivale. (Maciu 10:11-14) Ena rawa ni tiko na siga ena qai rogoca kina na itukutuku vinaka ni Matanitu ni Kalou.
Yalololoma ena Soqoni ni iVavakoso
19, 20. Na cava e bibi kina ena ivavakoso na yalololoma? Me vakaitovotaki vakacava?
19 E bibi sara ga na noda yalololoma vei ira eda vakabauta vata. (Iperiu 13:1) Nida lewe tiko ni dua na mataveiwekani levu vakayalo, e bibi kina na yalololoma ena noda veitaratara.
20 Ke vakayagataka tiko e dua na Kingdom Hall e dua, se rua, se vica tale na ivavakoso, e bibi meda yalololoma vei ira na ivavakoso oqori, meda veidokai nida veitaratara kei ira. Na yalo ni veiqati ena vakadredretaka na veiyaloni, vakabibi ena kena tuvanaki na gauna ni soqoni, samaki, kei na vakavinakataki ni Kingdom Hall. Mo yalololoma qai veinanumi, dina ga ni dau basika ena so na gauna na duidui ni rai. Ena sala oqo ena qaqa ga kina na yalololoma, ena vakalougatataka dina o Jiova na nomu dau kauaitaki ira e so tale.
Yalololoma Tiko Ga
21, 22. Me salavata kei na e tukuni ena Kolosa 3:12, na cava meda nakita dei?
21 E tara na basoga kece ni noda bula na yalololoma. Me tiki mada ga ni noda itovo vakarisito. Me ivakarau sara ga ni noda bula.
22 Meda yalololoma mada ga vei ira tale e so ena veisiga, meda qai muria yadudua na ka e tukuna na yapositolo o Paula: “O koya mo dou qai vakaisulu me vaka dou sa nona digitaki na Kalou, oi kemudou sa yalosavasava ka daulomani, e na yalo dauloloma, e na yalovinaka, e na yalomalumalumu, e na yalomalua, e na dauvosota vakadede.”—Kolosa 3:12.
O se Nanuma Tiko?
• Na cava ena dredre kina vua e dua na lotu Vakarisito me dau yalololoma?
• Na cava e bibi kina ena vuvale na yalololoma?
• Na cava e ka ni bolebole kina na vakaitovotaki ni yalololoma e koronivuli, e vanua ni cakacaka, vaka kina vei ira eda tiko veitikivi?
• Vakamacalataka na sala e vakaraitaka kina e dua na lotu Vakarisito na yalololoma ena cakacaka vakavunau.
[iYaloyalo ena tabana e 18]
Na yalololoma ena matavuvale e uqeta na yalo ni duavata kei na veitokoni
[iYaloyalo ena tabana e 19]
Mo vakaraitaka nomu yalololoma ke tauvimate e dua drau cakacaka vata, se dua na wekana
[iYaloyalo ena tabana e 20]
O Jiova e dau tokoni ira e sega ni veivakaisini na nodra yalololoma dina ga nira vakalialiai
[iYaloyalo ena tabana e 21]
E ivakaraitaki ni yalololoma na noda vukei ira eda tiko veitikivi era gadreva dina tu na veivuke